ភ្នំពេញ៖ កម្ពស់ទឹកស្ទឹងព្រែកត្នោត ដែលហូរកាត់ក្នុងភូមិសាស្ត្រខណ្ឌដង្កោ រាជធានីភ្នំពេញ​គិតត្រឹម​ថ្ងៃនេះ គឺពុំមានការហក់ឡើងខ្លាំងគួរអោយបារម្ភនោះទេ។ ទោះទឹកស្ទឹងពុំទាន់កើនឡើងខ្ពស់ក្ដី ពួកគាត់នៅតែត្រៀមនិងប្រុងប្រយ័ត្នគ្រប់ពេល ។

ស្ថានភាពទឹកស្ទឹងព្រែកត្នោត គិតត្រឹមថ្ងៃទី ២៩ ខែកញ្ញា ឆ្នាំ២០២២នេះ គឺពុំទាន់ហក់ឡើងគួរ​អោយ​បារម្ភនោះទេ។ នេះជាការមើលឃើញរបស់ពលរដ្ឋ ដែលរស់នៅក្នុងភូមិសាស្រ្តសង្កាត់ស្ពានថ្ម ដែលរងការជន់លិចជាច្រើនឆ្នាំជាប់គ្នាមកនេះ។ ​ទោះស្ថានភាពទឹក ពុំទាន់កើនឡើងខ្លាំងក្ដី ពួកគាត់​ជាពលរដ្ឋគឺនៅតែមានការត្រៀម និងប្រុងប្រយ័ត្នគ្រប់ពេលវេលា។

ការត្រៀមនិងប្រុងប្រយ័ត្ន ព្រោះបទពិសោធន៍កន្លងទៅ ពួកគាត់កត់សម្គាល់ថា ទឹកស្ទឹងព្រែកត្នោត​អាចមានការជន់លិចគ្រប់ពេលវេលាក្នុងកំឡុងពេលនេះ​ រហូតដល់កំឡុងពេលបុណ្យកឋិនទាន។

ការត្រៀមនិងប្រុងប្រយ័ត្ននេះ ​ក៏ដោយសារពួកគាត់ទទួលបានព័ត៌មានថា កម្ពស់ទឹកស្ទឹងព្រែក​ត្នោត​ក្នុងភូមិសាស្រ្តខេត្តកំពង់ស្ពឺ ផ្នែកខាងលើ ​មានការកើនឡើងខ្លាំង ដែលអាចបង្កអោយផ្នែកខាង​ក្រោម​មានការជន់លិច។ ហេតុដូចនេះ​ គឺពួកគាត់ពុំដែលទៅណាមកណាចោលផ្ទះសម្បែងនោះទេ។

ពាក់ព័ន្ធនឹងស្ថានភាពទឹកស្ទឹងព្រែកត្នោតនេះ លោក លឹម សំបូរ ចៅសង្កាត់រងទី ១សង្កាត់ស្ពានថ្ម លើកឡើងថា អាជ្ញាធរសង្កាត់ ក្នុងពេលបច្ចុប្បន្ន បន្តតាមដានស្ថានភាពកម្ពស់ទឹករៀងរាល់ថ្ងៃ។ ករណីទទួលបានការប្រកាសអាសន្ន ​អាជ្ញាធរសង្កាត់ នឹងចុះបំពេញការងារជួយភ្លាមៗ​ទៅ​តាមលទ្ធភាព។

រដ្ឋបាលខេត្តកំពង់ស្ពឺ កាលពីថ្ងៃទី ២៧ កញ្ញាកន្លងទៅ​ បានចេញសេចក្ដីជូនដំណឹង អោយមានការ​ត្រៀម​បង្ការជាយថាហេតុដែលអាចបង្កឡើងដោយជំនន់ទឹកភ្លៀង ចំពោះពលរដ្ឋដែលរស់នៅតាម​តំបន់ទំនាបនានា ​និងតំបន់ផ្នែកខាងក្រោមស្របតាមបណ្ដោយដងស្ទឹងព្រែកត្នោត ក្នុងភូមិសាស្ត្រ​ខេត្តកំពង់ស្ពឺ។

សេចក្ដីជូនដំណឹងដដែល បញ្ជាក់ថា ប៉ុន្មានថ្ងៃកន្លងមកនេះ មានភ្លៀងធ្លាក់ខ្លាំងជាបន្តបន្ទាប់ ដែលធ្វើឱ្យទឹកផ្នែកខាងលើនៃដងស្ទឹងព្រែកត្នោតហក់ឡើងលឿន។ ស្ថានភាពបែបនេះ ធ្វើឱ្យ​ទឹក​ស្ទឹងព្រែកត្នោត​​ផ្នែកខាងក្រោមអាចបង្កឱ្យមានការលិចលង់តំបន់ខ្លះជាយថាហេតុ ហើយផ្នែកខ្លះ​ត្រូវទទួលរងផលប៉ះពាល់ដល់ដំណាំកសិកម្ម សត្វចិញ្ចឹម ផ្ទះសំបែង ​ហេដ្ឋារចនាសម្ព័ន្ធនានា ពិសេស​អាចបង្កគ្រោះថ្នាក់ដល់អាយុជីវិតបងប្អូន​ ប្រជាពលរដ្ឋផងដែរ៕ អត្ថបទ៖ គឹមហុក