ហ្សកហ្ស៊ី៖ ក្រុមអ្នកតវ៉ាបានប្រមូលផ្តុំគ្នានៅច្រកឆ្លងកាត់ព្រំដែនប្រទេសហ្សកហ្ស៊ី-រុស្ស៊ី នៅទីក្រុង Larsi កាលពីថ្ងៃពុធ ខណៈជួរដ៏វែងនៃពលរដ្ឋរុស្ស៊ីបានបន្តមកដល់ព្រំដែន។ ក្រុមអ្នកតវ៉ានៅក្នុងក្បួនធ្វើដំណើរពីទីក្រុង Tbilisi ប្រទេសហ្សកហ្ស៊ី ដើម្បីបង្ហាញពីការព្រួយបារម្ភរបស់ពួកគេ ចំពោះការជម្លៀសពលរដ្ឋរុស្ស៊ីមកកាន់ប្រទេសហ្សកហ្ស៊ី ដែលបានកើនឡើងចាប់តាំងពីលោក វ្ល៉ាឌីមៀ ពូទីន ប្រកាសពីការកេណ្ឌកងទ័ពមួយផ្នែកកាលពីថ្ងៃទី២១ ខែកញ្ញា។
មន្ត្រីម្នាក់បាននិយាយថា យើងជឿថា ការធ្វើអន្តោប្រវេសន៍បែបនេះពីប្រទេសរុស្ស៊ីមកក្នុងប្រទេសហ្សកហ្ស៊ី បង្កការគំរាមកំហែងដល់សន្តិសុខជាតិ សេដ្ឋកិច្ច និងស្ថិរភាពជាទូទៅរបស់ហ្សកហ្ស៊ី។ ការចាកចេញដ៏ច្រើនរបស់បុរស មានម្នាក់ឯង ឬជាមួយក្រុមគ្រួសារ ឬមិត្តភក្តិរបស់ពួកគេបានចាប់ផ្តើមកាលពីថ្ងៃទី២១ ខែកញ្ញា ភ្លាមៗបន្ទាប់ពីសុន្ទរកថារបស់លោក ពូទីន ទៅកាន់ប្រជាជាតិ ហើយបានបន្តពេញមួយសប្តាហ៍នេះ។ យោងតាមប្រព័ន្ធផ្សព្វផ្សាយអនឡាញ Yandex Maps បានឲ្យដឹងថា ការកកស្ទះចរាចរណ៍ដែលឆ្ពោះទៅដល់ប៉ុស្តិ៍ត្រួតពិនិត្យ Verkhny Lars ជាព្រំដែនឆ្លងកាត់ចូលទៅក្នុងប្រទេសហ្សកហ្ស៊ីពីតំបន់ North Ossetia របស់រុស្ស៊ី បានលាតសន្ធឹងចម្ងាយប្រហែល ១៥គីឡូម៉ែត្រកាលពីថ្ងៃអង្គារ បន្ទាប់ពីការប្រកាសកេណ្ឌកងទ័ពមួយផ្នែករបស់រុស្ស៊ី។
ប្រព័ន្ធផ្សព្វផ្សាយសង្គមបានបង្ហាញអ្នកថ្មើរជើងរាប់រយនាក់តម្រង់ជួរនៅប៉ុស្តិ៍ត្រួតពិនិត្យ បន្ទាប់ពីឆ្មាំព្រំដែនរុស្ស៊ីបន្ធូរបន្ថយបទប្បញ្ញត្តិ និងអនុញ្ញាតឱ្យពលរដ្ឋឆ្លងកាត់ដោយថ្មើរជើង។ ក្រសួងមហាផ្ទៃហ្សកហ្ស៊ីបាននិយាយថា ប្រជាជនរុស្សីជាង ៥៣,០០០នាក់បានចូលមកក្នុងប្រទេសនេះចាប់តាំងពីសប្តាហ៍មុន៕
អត្ថបទ៖ ប៊ុនថន