ភ្នំពេញ៖ គិតចាប់ពីដើមខែតុលាខាងមុខនេះ បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈនឹងចាប់ផ្តើមអនុវត្តប្រមូលភាគទានសម្រាប់របបសន្តិសុខសង្គមផ្នែកប្រាក់សោធន ខណៈយុទ្ធនាការ ៩០ថ្ងៃ ដើម្បីផ្សព្វផ្សាយការដាក់ឱ្យអនុវត្តរបបសន្តិសុខសង្គមផ្នែកប្រាក់សោធនត្រូវបានបញ្ចប់។
នៅក្នុងពិធីបិទយុទ្ធនាការផ្សព្វផ្សាយការដាក់ឱ្យអនុវត្តរបបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារជូនដល់ក្រសួង ស្ថាប័ន អង្គការដៃគូអភិវឌ្ឍន៍ សមាគមនិយោជក សហជីព និងតំណាងកម្មករនិយោជិតសរុបប្រមាណ ៥០០នាក់ នៅព្រឹកថ្ងៃទី២៩ ខែកញ្ញា ឆ្នាំ២០២២នេះ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាភិបាល នៃបេឡាជាតិសន្តិសុខសង្គម បានមានប្រសាសន៍ ប្រាក់ចូលនិវត្តន៍ កាលពីមុនប្រាក់សោធនមានតែចំពោះមន្ត្រីរាជការប៉ុណ្ណោះ ដែលមានសិទ្ធិទទួលបាន តែសម្រាប់កម្មករនិយោជិតក្នុងវិស័យឯកជនវិញ ពុំធ្លាប់ទទួលបានការធានារ៉ាប់រងប្រាក់សោធននេះទេ ហើយនេះជាប្រវត្តិសាស្ត្ររបស់កម្ពុជាហើយ ដែលកម្មករនិយោជិតក្នុងវិស័យឯកជនទទួលបានរបបសន្តិសុខសង្គមនេះ។
ជាមួយគ្នានេះ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានលើកឡើងថា ជាលទ្ធផលមានកម្មករនិយោជិតចំនួនជាង ១,៧លាននាក់ បានទទួលការផ្សព្វផ្សាយ ដែលស្មើនឹង ៧៣ភាគរយ បើធៀបទៅនឹងសមាជិក ប.ស.ស. សរុប ហើយបើធៀបនឹងចំនួនកម្មករនិយោជិតក្នុងវិស័យកាត់ដេរ គឺស្មើនឹង ១២៨ភាគរយ។
តាមរយៈការចុះផ្សព្វផ្សាយនេះ គឺមានការសារទរពីសំណាក់ភាគីនិយោជក ម្ចាស់-សហគ្រាស គ្រឹះស្ថាន និងភាគីបងប្អូនកម្មករនិយោជិត ដោយពួកគាត់បានបង្ហាញពីភាពពេញចិត្ត និងសប្បាយរីករាយដែលរាជរដ្ឋាភិបាលបង្កើតឱ្យមានរបបសន្តិសុខសង្គមផ្នែកប្រាក់សោធន ព្រមទាំងបានស្ម័គ្រចិត្តក្នុងការចូលរួមបង់ភាគទានជាចំណែករបស់ខ្លួន ដើម្បីទទួលបានអត្ថប្រយោជន៍នៅពេលចូលនិវត្តន៍ទៀតផង៕ អត្ថបទ៖ ឈិត បូរ៉ាវី