ភ្នំពេញ៖ បញ្ហាប្រេងឆៅចំនួនជិត ៣០ម៉ឺនបារ៉ែល ដែលនាវា MT Strovolos ដឹកចេញពីកម្ពុជា ត្រូវបានដោះស្រាយបញ្ចប់រឿងជាមួយភាគីពាក់ព័ន្ធ នឹងបានលក់ប្រេងចេញរួចរាល់ហើយ ដោយក្នុងនោះ កម្ពុជានឹងទទួលបាន ៧០% នៃចំណូលសរុប។
ឯកឧត្ដម ជៀប សួរ អគ្គនាយកនៃអគ្គនាយកដ្ឋានប្រេងកាត ក្រសួងរ៉ែ និងថាមពល ថ្លែងប្រាប់ភ្នាក់ងារអ្នកយកព័ត៌មាន BTV ស្តីពីការដោះស្រាយបញ្ចប់រឿង ករណីប្រេងឆៅ ដែលត្រូវបាននាវា MT Strovolos ដឹកចេញពីកម្ពុជា នៅថ្ងៃទី២៩ ខែ កញ្ញា ឆ្នាំ ២០២២ នេះថា ករណីប្រេងឆៅចំនួនជិត ៣០ ម៉ឺនបារ៉ែល ត្រូវបានដោះស្រាយរួចរាល់ហើយ ដោយប្រេងឆៅជិត ៣០ ម៉ឺនប៉ារ៉ែលនោះ ក៏ត្រូវបានលក់ទៅតាមកិច្ចព្រមព្រៀងផងដែរ កាលពីថ្ងៃទី ១០ ខែកញ្ញា កន្លងមកនេះ ចំណែកថវិកាយើងនឹងទទួលបានក្នុងរយៈពេល ៣០ថ្ងៃ បន្ទាប់ពីការលក់ប្រេងនេះ ក្នុងនោះចំណូលដែលទទួលបានពីការលក់នេះ គឺគិតតាមមធ្យមភាគក្នុងខែកញ្ញានេះ ដូច្នេះបន្ទាប់ពីដាច់ខែកញ្ញា ទើបយើងដឹងអំពីប្រាក់ចំណូលដែលទទួលបានជាក់ស្តែង។
ពាក់ព័ន្ធនឹងការបែងចែកនេះ, ឯកឧត្តមបន្តឲ្យដឹងថា បន្ទាប់ពីទទួលបានចំណូលរួចហើយ យើងនឹងទូ ទាត់ទៅតាមកិច្ចព្រមព្រៀងដូចជា ការចំណាយផ្សេងៗ, ចំណាយលើការផ្ទេរប្រេង, លើក្រុមហ៊ុនមេធាវីផ្លូវច្បាប់, ការចំណាយលើការថែទាំគុណភាពប្រេង និងលើកប៉ាលដឹកប្រេង ក្នុងនោះបន្ទាប់ពីការដកចំ ណាយ ប្រាក់ដែលនៅសល់ជាក់ស្តែង យើងនឹងត្រូវបែងចែកជាមួយភាគីពាក់ព័ន្ធរួមមានរាជរដ្ឋាភិបាល, ខាងកប៉ាល់ និងខាងភាគីក្រុមហ៊ុន KrisEnergy។
ការវិនិយោគរបស់ក្រុមហ៊ុន KrisEnergy បន្ទាប់ពីបានប្រកាសក្ស័យធុន ក្រសួងរ៉ែ និងថាមល បានដកអាជ្ញារប័ណ្ណធ្វើអាជីវកម្ម ចំពោះប្រាក់តម្កល់ចំនួនប្រមាណ ៥លានដុល្លារ របស់ក្រុមហ៊ុន KrisEnergy រាជរដ្ឋាភិបាលបានដកហូតយកតាមកិច្ចព្រមព្រៀងផងដែរ។
ដោយឡែក ចំពោះប្លុកដែលដកពីក្រុមហ៊ុន KrisEnergy បើតាមប្រសាសន៍របស់ឯកឧត្តម ជៀប សួរ បានឲ្យដឹងថា បច្ចុប្បន្នប្លុកនេះ ត្រូវបានក្រុមហ៊ុនមកពីប្រទេសកាណាមួយ បានចាប់អារម្មណ៍ និងកំពុងសិក្សា ជជែកពិភាគ្សាគ្នា ដើម្បីអភិវឌ្ឍន៍ប្លុកនេះបន្ត៕ អត្ថបទ៖ សុន រ៉ាឌី