​អ៊ុយក្រែន៖ ប្រជាជន​រាប់​រយ​នាក់​បាន​ប្រារព្ធ​ពិធី​អបអរ​នៅ​តំបន់ ​Donetsk និង​ Luhansk ដែល​គ្រប់​គ្រង​ដោយ​រុស្ស៊ី​កាលពី​ថ្ងៃ​សុក្រ ខណៈ​ប្រធានាធិបតី​រុស្ស៊ី​លោក Vladimir Putin បាន​ចុះហត្ថលេខា​លើ​សន្ធិសញ្ញាដើម្បី​ដាក់បញ្ចូល​តំបន់​របស់​អ៊ុយ​ក្រែ​ន​ចំនួន ៤ ​ទៅ​ក្នុង​ប្រទេស​រុស្ស៊ី ដែល​ផ្គើន​ទៅ​នឹង​ប្រទេស​មហាអំណាច​លោក​ខាងលិច​។​

​ប្រជាជន​បាន​ទស្សនា​លើ​ផ្ទាំង​កញ្ចក់​អេក្រង់​ធំ ខណៈ​លោក Putin បាន​ស្វាគមន៍​ប្រមុខ​ដឹកនាំ​ដែល​តែង​តាំង​ដោយ​វិមាន​ក្រឹម​ឡាំង​នៃ​តំបន់​ទាំង​បួន​ក្នុង​ទីក្រុង​មូ​ស្គូ ដោយ​ច្រៀង​ចម្រៀង​ស្នេហា​ជាតិ និង​គ្រវី​ទង់​ជាតិ​រុស្ស៊ី​។​ ប្រជាជន​តំបន់ ​Luhansk និយាយ​ថា ​«​សម្រាប់​ខ្ញុំ​ផ្ទាល់ ខ្ញុំ​កើត​នៅ​ក្នុង​សហភាព​សូវៀត​។ យើង​តែងតែ​ជា​ផ្នែក​មួយ​របស់​សហ​ភាព​នេះ​រួមគ្នា​ជាមួយ​ប្រទេស​រុស្ស៊ី​»។ នៅ​ក្នុង​ពិធី​មួយ​នៅ​វិមាន​ក្រឹម​ឡាំង​លោក ​Putin និង​មេដឹកនាំ​ដែល​តែងតាំង​ដោយ​ទីក្រុង​មូ​ស្គូ​នៅក្នុង​តំបន់​ចំនួន ៤​ របស់​អ៊ុយ​ក្រែ​ន​បាន​ដាក់​ឈ្មោះ​របស់​ពួកគេ​នៅលើ​សន្ធិសញ្ញា​ ដើម្បី​ឱ្យ​ពួកគេ​ចូល​ជាមួយ​រុស្ស៊ី​នៅ​ក្នុង​ពេល​មាន​ជម្លោះ​កើន​ឡើង​ខ្លាំង​ក្នុង​រយៈពេល​ ៧​ខែ​មកនេះ​។

​ពិធី​ចុះហត្ថលេខា​នេះ​ធ្វើឡើង​រយៈពេល​ ៣​ថ្ងៃបន្ទាប់ពី​ការ​បញ្ចប់​នៃ​ការបោះឆ្នោត​ប្រជាមតិរៀបចំឡើង​ដោយ​វិមាន​ក្រឹម​ឡាំង ​ស្តីពី​ការ​ដាក់បញ្ចូល​ជាមួយ​ប្រទេស​រុស្ស៊ី ដែល​ភាព​ស្រប​ច្បាប់​ត្រូវ​បាន​ចោទសួរ​យ៉ាង​ទូលំទូលាយ​ដោយ​ទីក្រុង​គី​វ និង​ប្រទេស​លោក​ខាង​លិច​។​ ​ប្រទេស​រុស្ស៊ី​បាន​ផ្តល់​ឱ្យ​ប្រជាជន​ដែល​រស់​នៅ​ក្នុង​សាធារណរដ្ឋ​ប្រជាមានិត Luhansk នៅ Donetsk តំបន់ Zaporizhzhia និង​តំបន់ Kherson នូវ​សិទ្ធិ​ក្នុង​ការ​ជ្រើសរើស​។ លោក Putin បាន​ចាត់ទុកថា «​ជា​ថ្ងៃ​ប្រវត្តិសាស្ត្រ ជា​ថ្ងៃ​នៃ​ការពិត និង​យុត្តិធម៌​»៕

អត្ថបទ៖ ប៊ុនថន