ភ្នំពេញ៖ មន្ត្រីធនធានទឹករាជធានីភ្នំពេញបានឱ្យដឹងថា កម្ពស់ទឹកនៅទំនប់ប្រាំពីរមករា និងទឹកស្ទឹងព្រែកត្នោតបាននឹងកំពុងស្រកចុះ មិនមានអ្វីគួរឲ្យព្រួយបារម្ភនោះទេ។

លោក ម៉ៅ ប៊ុនធឿន ប្រធានមន្ទីរធនធានទឹក និងឧតុនិយមរាជធានីភ្នំពេញបានប្រាប់ ប៊ីធីវី នៅព្រឹកថ្ងៃទី០៣ ខែតុលា ឆ្នាំ២០២២ថា កម្ពស់ទឹកនៅទំនប់ប្រាំពីរមករាមានការស្រកចុះ បើធៀបទៅហ្នឹងពេលវេលាដូចគ្នាកាលពីថ្ងៃទី០២ តុលាម្សិលមិញ។ នៅព្រឹកថ្ងៃទី០៣ ខែតុលានេះ ខាងមុខទ្វារទឹកមានកម្ពស់ ៤ម៉ែត្រ៧៥ ទាបជាងទំនប់បង្ហៀរ ០ម៉ែត្រ០៥ ។ មន្ត្រីប្រចាំការនៅទ្វារទឹកបានបើកទ្វារធំចំនួន ៤សន្លឹក ដើម្បីរំដោះទឹកកម្ពស់ ១ម៉ែត្រ២០ ដើម្បីបង្ហូរទៅផ្នែកខាងក្រោម កុំឱ្យមានការប្រឈមប្រសិនមានភ្លៀងធ្លាក់ខ្លាំងពីផ្នែកខាងលើ។

ប្រធានមន្ទីរធនធានទឹក និងឧតុនិយមរាជធានីភ្នំពេញបានបន្ថែមថា នៅខាងក្រោយទ្វារទឹក ទឹកមានកម្ពស់ ៥ម៉ែត្រ៧០ បើធៀបនឹងថ្ងៃម្សិលមិញ គឺស្រកចុះ ០ម៉ែត្រ២០ ដែលកាលពីព្រឹកម្សិលមិញទឹកមានកម្ពស់ ៥ម៉ែត្រ៩០ ហើយបើធៀបកម្ពស់ទឹកនៅខាងមុខ និងខាងក្រោយទ្វារទឹក គឺខុសគ្នា ២ម៉ែត្រ០៥។

សូមជម្រាបថា កម្ពស់ទឹកនៅផ្នែកខាងលើពីខេត្តកំពង់ស្ពឺនៅព្រឹកថ្ងៃទី០៣ តុលានេះ នៅស្ថានីយពាមឃ្លៃ ទឹកមានកម្ពស់ ៥ម៉ែត្រ១០ កម្រិតនេះទឹកមានការកើនឡើង ០ម៉ែត្រ៥៤ បើធៀបនឹងព្រឹកម្សិលមិញ ដែលមានកម្ពស់ ៤ម៉ែត្រ៥៦។ នៅឯទំនប់រលាំងជ្រៃ ខាងមុខទ្វារទឹកមានកម្ពស់ ៦ម៉ែត្រ៦២ ទាបជាងកម្ពស់ទ្វារបិទ ០ម៉ែត្រ៣៨។ នៅទំនប់រលាំងជ្រៃ ព្រឹកនេះដែរ មន្ត្រីបានបើកទ្វារទឹកធំរំដោះទឹកចំនួន៣សន្លឹក គឺ១សន្លឹកកម្ពស់ ០ម៉ែត្រ៨០ និង២សន្លឹកទៀតកម្ពស់ ០ម៉ែត្រ៣០ ៕ អត្ថបទ ៖ ប្រាក់ វ៉ាន់ដា