ភ្នំពេញ៖ ឯកឧត្តមសាស្រ្តាចារ្យ ស៊ា ហួង រដ្ឋលេខាធិការក្រសួងសុខាភិបាល ​បានអះអាងថា ព្រះរាជាណាចក្រកម្ពុជា កំណត់គោលដៅកាត់បន្ថយអត្រាប្រេវ៉ាឡង់ ​នៃភាពពិការភ្នែក មកត្រឹម០,៣៥% នៅឆ្នាំ២០៣០។

ការថ្លែងរបស់ឯកឧត្តមសាស្រ្តាចារ្យ ស៊ា ហួង យ៉ាងដូច្នេះ ក្នុងពិធីបើកសិក្ខាសាលាតម្រង់ទិសស្ដីពី​ការបង្កើតផែនទីបង្ហាញផ្លូវ ​នៃការគ្រប់គ្រង ​និងបង្ការភាពពិការភ្នែកឆ្នាំ២០២១-២០៣០ នៅ​ថ្នាក់ក្រោម​ជាតិ ​និងអបអរសាទរទិវាសុខភាពភ្នែកពិភពលោក​ ២០២២ ដែលរៀបចំឡើង​ដោយ​កម្មវិធីជាតិសុខភាពភ្នែក ​នៃក្រសួងសុខាភិបាល ដោយមានការគាំទ្រពីមូលនិធិថែទាំភ្នែក មូលនិធិហ្វ្រេដហូឡូ អង្គការមិនមែនរដ្ឋាភិបាលជាតិ និងអន្តរជាតិ នាព្រឹកថ្ងៃទី៦ ខែតុលា ឆ្នាំ២០២២នេះ។

ឯកឧត្តម​រដ្ឋលេខាធិការ ​បន្តទៀតថា យើងបានមកជួបប្រជុំគ្នា ​ដើម្បីរៀបចំបង្កើផែនទីបង្ហាញផ្លូវ​ដែល​ឆ្លើយតបទៅ​នឹងយុទ្ធសាស្ត្រជាតិលើកទី៣ ​សម្រាប់​ការបង្ការ ​និងត្រួតពិនិត្យភាពពិការ​ភ្នែក​ឆ្នាំ២០២១-២០៣០។ ​ការវិនិយោគលើកម្មវិធីសុខភាពភ្នែក ​និង ការអនុវត្តសកម្មភាពភ្នែកនានារបស់​ថ្នាក់​ក្រោមជាតិ ​គឺចាំបាច់ខ្លាំងណាស់ដើម្បី​ធានាលើការពង្រឹងគុណភាព និងពង្រីកវិសាលភាព​សុខភាពភ្នែក​ទូទាំងព្រះរាជាណាចក្រកម្ពុជាឈាន​ទៅរកការកាត់បន្ថយអត្រាប្រេវ៉ាឡង់ នៃភាពពិការភ្នែកមកត្រឹម​ ០៣៥% នៅឆ្នាំ ២០៣០។

សម្រាប់ការចូលរួមអបអរសាទរទិវាសុខភាពភ្នែកពិភពលោកក្នុងឆ្នាំ២០២២នេះ ​ឯកឧត្តម សូមលើក​ទឹកចិត្តដល់ ក្រុមគ្រួសារនីមួយៗ​ អ្នកដែលមានសមាជិកគ្រួសារមានអាយុចាប់ពី​ ៤០ឆ្នាំឡើងទៅ អ្នកដែល​មានប្រវត្តិគ្រួសារនៃជំងឺទឹកដក់ក្នុងភ្នែក (សម្ពាធភ្នែកឡើងខ្ពស់ ឬមានផលវិបាកប៉ះពាល់​ដល់គំហើញ) ​អ្នកមានជំងឺ ទឹកនោមផ្អែម ឬលើសឈាម អ្នកដែលមានប្រវត្តិនៃការជក់បារីយូររ៉ាំរ៉ៃ ត្រូវតែទៅរកគ្រូពេទ្យពិនិត្យ​ភ្នែកយ៉ាង ​ហោច​ណាស់បានម្តងដែរក្នុងមួយឆ្នាំ។ យើងនាំគ្នាចូលរួមសកម្មភាព "ស្រឡាញ់ភ្នែករបស់អ្នក!”។

បើតាមឯកឧត្តម សាស្រ្តាចារ្យ ងី ម៉េង ប្រធានកម្មវិធីជាតិសុខភាពភ្នែក និងជានាយកមន្ទីរពេទ្យ​មិត្តភាព​ខ្មែរ-សូវៀត បានឱ្យដឹងថា កាលពីខែឧសភា ឆ្នាំ២០២២កន្លងទៅនេះ ក្រសួងសុខាភិបាល បាន​ផ្សព្វផ្សាយ​ និងដាក់ឱ្យប្រើប្រាស់ផែនការយុទ្ធសាស្ត្រជាតិទី៣ ​សម្រាប់ការបង្ការ និង​ត្រួតពិនិត្យ​ភាពពិការភ្នែកឆ្នាំ២០២១-២០៣០ជាផ្លូវការ​ ដែលមានគោលដៅ ដើម្បីកាត់បន្ថយអត្រាប្រេវ៉ាឡង់ នៃភាពពិការភ្នែកឱ្យនៅត្រឹម០,៣៥% ​នៅឆ្នាំ២០៣០។

ឆ្លើយតបទៅនឹងផែនការ ​យុទ្ធសាស្ត្រថ្នាក់ជាតិ ថ្ងៃនេះយើងទាំងអស់គ្នាចាប់ផ្តើមរៀបចំផែនទី​បង្ហាញ​ផ្លូវដែល​នេះជាសក្ខីភាព​បង្ហាញថាថ្នាក់ក្រោមជាតិ មានការតាំងចិត្តរបស់ខ្លួនយ៉ាងមុតមាំ​ក្នុងការ​ចូលរួមកាត់បន្ថយភាពពិការភ្នែកដែលអាចជៀសវាងបាន។

ថ្លែងក្នុងសិក្ខាសាលាតម្រង់ទិសស្ដីពីការបង្កើតផែនទីបង្ហាញផ្លូវនៃការគ្រប់គ្រង និងបង្ការភាពពិការ​ភ្នែកឆ្នាំ ២០២១-២០៣០ នៅថ្នាក់ក្រោមជាតិ​ និងអបអរសាទរទិវាសុខភាពភ្នែកពិភពលោក ២០២២ ឯកឧត្តម អែន ឌូស ហ្ស៊ីប្រាហ្គ (H.E Andreas Zurbrugg) ​ឯកអគ្គរដ្ឋទូតរង អូស្ត្រាលីប្រចាំព្រះ រាជាណា​ចក្រកម្ពុជា បានថ្លែងថា អ្វីដែលយើងបានធ្វើនូវការបង្កើតផែនទីបង្ហាញផ្លូវនៃការគ្រប់គ្រង និងបង្ការភាពពិការភ្នែកឆ្នាំ ២០២១-២០៣០ នៅថ្នាក់ក្រោមជាតិ ទន្ទឹមនឹងអូស្រ្តាលី និងធ្វើអ្វីៗជា​មួយ​ភាគី​ពាក់ព័ន្ធផ្សេងទៀត ដូចជាការផ្តល់សេវាថែទាំភ្នែក បង្ការ និងទប់ស្កាត់ភាពងងឹតភ្នែក​នៅក្នុងប្រទេសកម្ពុជា។

ឯកឧត្តម ឯកអគ្គរដ្ឋទូតរង អូស្ត្រាលី ប្រចាំព្រះរាជាណាចក្រកម្ពុជា ​ក៏សូមកោតសរសើរនូវជម្រើស ក៏ដូចជាវិសាលភាពនៃផែនការ ​ដែលកម្ពុជា ​បានបង្កើតឡើងផែនទីបង្ហាញផ្លូវនេះ គឺជាប្រភព​មួយជាមគ្គុទេសក៍ សម្រាប់នាំយើងឲ្យដើរត្រូវទិសដៅអនុវត្តន៍ និងមានអ្វីៗដែលជាសម្ភារៈឧបករណ៍ ដែលអូស្រ្តាលី បានជួយគាំទ្រដល់ប្រព័ន្ធសុខភាពនៅកម្ពុជា ជាយូរយារណាស់មកហើយ៕អត្ថបទ រដ្ឋា