កំពង់ឆ្នាំង ៖ លោក ដោក ប៊ុនថុន ប្រធានមន្ទីរធនធានទឹក និងឧតុនិយមបាន​អោយដឹង​នៅពេលថ្មីៗ​នេះថា ទឹកទន្លេឆ្នាំ២០២២នេះ មានកម្ពស់ខ្ពស់ជាងឆ្នាំ២០២១ ជិត៣ម៉ែត្រ ដែលកត្តានេះ​ធ្វើអោយ​ប្រជាកសិករនៅតាមដងទន្លេ មានទឹកគ្រប់គ្រាន់ក្នុងការប្រកបរបរកសិកម្មនៅក្នុងឆ្នាំក្រោយបន្ទាប់​ពីទឹកទន្លេស្រកចុះទៅវិញ ព្រោះទឹកទន្លេបានលិចអាងស្តុកទឹកទាំង​អស់នៅតាមទំនាប​មាត់​ទន្លេសាប។

លោក ដោក ប៊ុនថុន បានបន្តទៀតថា ៖ ទឹកទន្លេសាបឆ្នាំ២០២២នេះ បានឡើងដល់ជិត១០ម៉ែត្រ ដែលធ្វើអោយទំនាបទាំងអស់នៅតាមមាត់ទន្លេសាប ត្រូវបានលិចអស់ ដែលកត្តានេះ ប្រជាពលរដ្ឋ​ដែលមានលំនៅដ្ឋានជាប់មាត់ទន្លេ ឬនៅតាមទំនាបទន្លេ ត្រូវតែប្រុងប្រយ័ត្នអោយ​បានខ្ពស់​ចំពោះកូនចៅរបស់ខ្លួន។ ក៏ប៉ុន្តែ ទឹកធំដែលលិចលង់តាមទីទំនាបទាំងអស់នៅឆ្នាំ២០២២នេះ វាធ្វើអោយបងប្អូនប្រជាកសិករយើងនៅតាមដងទន្លេ អាចប្រកបមុខរបរចិញ្ចឹមជីវិតបានងាយស្រួល និងទទួលផលល្អថែមទៀត ព្រោះទឹកទន្លេបានឡើងលិចអស់អាងស្តុកទឹកនៅតាមបណ្តោយទន្លេសាប ដែលកាលពីឆ្នាំកន្លងៗមកទឹកទន្លេសាបមិនដែលលិចអាងស្តុកទឹកដែលមានកម្ពស់ទាបតែប៉ុណ្ណោះ។ ទឹកទន្លេសាបឡើងធំឆ្នាំនេះ ដោយសារមានរបប២យ៉ាងគឺ ទឹកទន្លេមេគង្គដែលបាន​ហូរចូលមកក្នុង​បឹងទន្លេសាប និងមួយទៀតទឹកភ្លៀងដែលហូរមកពីតាមបណ្តាខេត្តមួយចំនួន​នៅជុំវិញបឹងទន្លេ​សាបផងដែរ ។ លោកបានបន្ថែមថា ទឹកឡើងធំប៉ុនណេះ ឬឡើងធំជាងនេះតិចតួចទៀត វាមិនជាបញ្ហា​អ្វីសម្រាប់ប្រជាកសិករនៅក្នុងខេត្តកំពង់ឆ្នាំងនោះឡើយ ក៏ប៉ុន្តែវា​បានផ្តល់​ផលល្អសម្រាប់បងប្អូនធ្វើដំណាំកសិកម្មនារដូវប្រាំងទៅវិញ ហើយកន្លងមកចាប់ពីឆ្នាំ២០១៥មក គឺក្រសួង​ធនធានទឹក និងឧតុនិយម បានខិតខំប្រឹងប្រែងជួយផ្តល់ជាម៉ាស៊ីន ជាប្រេងដល់​មន្ទីរធនធានទឹក ដើម្បីបូមទឹកដាក់បំពេញអាំងទាំងអស់ដែលទឹកចូលមិនដល់។

ទន្ទឹមនឹងការមានផលល្អសម្រាប់បងប្អូនប្រជាកសិករដែលជាអ្នកធ្វើស្រែប្រាំង ឬដំណាំរួមផ្សំនៅតាមទន្លេក៏ដោយ ក៏មានប្រជាពលរដ្ឋមួយចំនួនដែលរស់នៅតាមមាត់ទន្លេ ឬតំបន់ទំនាបមួយចំនួន បានរងផលប៉ះពាល់ដោយសារទឹកទន្លេសាបនេះផងដែរ ។ ក្នុងរយៈកាលកន្លងមកថ្មីៗនេះ មានបងប្អូនមួយចំនួនបានរងគ្រោះនូវខ្យល់កន្ត្រាក់ ហើយឯកឧត្តម ស៊ុន សុវណ្ណារិទ្ធិ អភិបាលខេត្ត និងជាប្រធានសាខាកាកបាទក្រហមកម្ពុជាខេត្ត បានចុះពិនិត្យ និងផ្តល់អំណោយមនុស្សធម៌េជូនជាបន្តបន្ទាប់ផងដែរ៕ ហុង វាស្នា