ភ្នំពេញ៖ ពិធីបុណ្យកឋិនទាន ត្រូវបានចាប់ផ្តើមរៀបចំពិធី​ប្រារព្ធ​នៅតាមវត្តអារាម ​ក្នុងរយពេល ២៩ថ្ងៃ ចាប់ពីថ្ងៃទី១១​ ខែតុលា នេះតទៅ។ តាមវត្តអារាម ​គឺទទួលរៀបចំធ្វើពិធីបុណ្យនេះ ដើម្បីថ្វាយប្រគេន​ត្រៃចីវរ ​និងគ្រឿងបរិវាកឋិននានារបស់ប្រជាពុទ្ធបរិស័ទជូនវត្ត និង​ព្រះសង្ឃ​គង់ចាំព្រះវស្សានៅក្នុងវត្ត។

បើតាមព្រះឥន្ទសិរីវង្ស តាត វិបុល ព្រះរាជាគណៈថ្នាក់កិតិ្តយស ​នៃព្រះរាជាណាចក្រកម្ពុជា គង់នៅវត្តឧណ្ណាលោម រាជធានីភ្នំពេញ ​មានថេរដីកានៅថ្ងៃទី១១ ខែតុលានេះថា មកដល់ពេលថ្ងៃនេះ ​តាមទីវត្តនីមួយៗនៅទូទាំងប្រទេស ​គឺបានកំណត់ថ្ងៃរួចហើយ ត្រៀម​ធ្វើបុណ្យកឋិន ហើយវត្តក៏​បានជម្រាប​អញ្ជើញ​ពុទ្ធបរិស័ទ​ជិតឆ្ងាយរួចហើយដែរ ធ្វើពិធី​ដង្ហែរអង្គកឋិនទាននេះ ​ចូលទីវត្តអារាមរួចហើយដែរ ​ក្នុងរយៈពេល២៩ថ្ងៃចាប់ពីថ្ងៃ ​១រោច ខែអស្សុជដល់ថ្ងៃទី១៥កើត ​ពេញបូរមី ខែ​កត្តិក ​ដើម្បីថ្វាយប្រគេនស្បងត្រៃចីវរជូន​ព្រះសង្ឃ និង​គ្រឿងបរិវាកឋិននានាទៀតសម្រាប់កសាងវត្ត។

ព្រះឥន្ទសិរីវង្ស តាត វិបុល មានថេរដីកា បន្តថា ចាប់ពីថ្ងៃនេះទៅ ពលរដ្ឋដែលប្រជាពុទ្ធបរិស័ទ​គ្រប់រូបអាចធ្វើបុណ្យកឋិនទាននេះ​នៅវត្តអារាមមបាន ​ដោយរៀបចំគ្រឿងស្បងត្រៃចីវរ ទៅរក្សាទុកនៅឯវត្តបាន ​ដើម្បីរងចាំដល់ថ្ងៃកំណត់ដែលវត្តរៀបចំពិធីបុណ្យកឋិន។

បុណ្យ​កឋិនទាន ជា​កាល​ទាន​មួយ​ដ៏​ថ្លៃថ្លា​ក្នុង​ព្រះពុទ្ធសាសនា​មាន ​ផលានិសង្ស​ខ្ពស់ ទាំង​ទាយក ទាយិកា និង​បដិគ្គាហក ជាទី​ជ្រះថ្លា​របស់​ពុទ្ធបរិស័ទ​ខ្មែរ តែងតែ​ប្រារព្ធ​ធ្វើឡើង ​រៀងរាល់ឆ្នាំ មាន​រយៈពេល​កំណត់​តែ ២៩​ថ្ងៃ ​ដោយ​វត្ត​នីមួយៗទទួល​អង្គ​កឋិន​បានតែ​មួយ​លើក​ប៉ុណ្ណោះ​។

ទាក់ទងនឹងការរៀបចំពិធីនៅក្នុងអំឡុងការ​ប្រារព្ធ​ពិធីបុណ្យកឋិនទាននោះដែរ ​ឯកឧត្តម សេង សុមុន្នី រដ្ឋលេខាធិការ ​និងជាអ្នកនាំពាក្យក្រសួងធម្មការ ​និងសាសនា បានអំពាវនាវ​ប្រជាពលរដ្ឋ​ពុទ្ធបរិស័ទ និង​ព្រះសង្ឃ ត្រូវ​បន្តអនុវត្តវិធានការសុខាភិបាល ​ទប់ស្កាត់ការផ្ទុះឡើងវិញ​នៃ​មេរោគ​កូវីដ១៩ ​ខណៈ​បច្ចុប្បន្ន​មេរោគកាចសាហាវនេះនៅមិនទាន់​ទៅ​ណាឆ្ងាយពីយើងនោះទេ៕ អត្ថបទ ស៊ុម សុខជា