​​រុស្ស៊ី​​៖ អង្គភាព​​ផ្ដល់សេវា​សង្រ្គោះ​បន្ទាន់រដ្ឋ​​របស់​អ៊ុយក្រែន​ ​បាន​បញ្ចេញ​រូបភាព​កាលពីថ្ងៃចន្ទ​​​អំពី​​ក្រុមអ្នក​ពន្លត់​អគ្គិភ័យ​​​កំពុង​​ព្យាយាម​ពន្លត់​អណ្ដាតភ្លើង​​​បង្កឡើងដោយ​ការវាយប្រហារ​មីស៊ីល​​​លើ​​រដ្ឋធានី​របស់​ប្រទេស​នេះ​។

អង្គភាពផ្ដល់សេវាសង្រ្គោះបន្ទាន់របស់អ៊ុយក្រែន ​​និយាយថា​ មនុស្ស​យ៉ាងហោចណាស់​១៤​នាក់ស្លាប់ និង​​៩៧នាក់រងរបួស ​ក្នុង​ការវាយប្រហារ​ទាំង​ព្រឹកថ្ងៃចន្ទ​​​នៅទូទាំង​អ៊ុយក្រែន ដែលជា​ការ​វាយប្រហារដាក់គោលដៅ​ដ៏ធំបំផុត​​ ​​​និង​ច្រើន​កន្លែង​បំផុត​មិនធ្លាប់​មាន​​​ចាប់​តាំងពីថ្ងៃដំបូង​នៃ​សង្គ្រាម​ ។

លោក​ប្រធានាធិបតី​​​​រុស្ស៊ី Vladimir Putin ​បាន​ព្រមាន​​​ថា ​​​​​ការវាយប្រហារ​​​ណាមួយ​បន្ថែម​ទៀត​របស់​ភេរវករ​​​អ៊ុយក្រែន​​​ មកលើទឹកដី​រុស្ស៊ី នឹង​ត្រូវជួប​ប្រទះការឆ្លើយ​តប​ដោយយោធា​ដ៏ខ្លាំងក្លា។​ការថ្លែងបែបនេះ ​របស់​លោក​មាន​ឡើង​​​​បន្ទាប់ពី​ការវាយប្រហារ​ដោយ​មីស៊ីលជាច្រើនគ្រាប់លើ​​​រដ្ឋ​ធានី Kiev និង​តំបន់​ជាច្រើន​​ទូទាំង​អ៊ុយក្រែន ​កាលពី​ព្រឹកថ្ងៃចន្ទ​។

លោក​​ Putin ​បានបញ្ជាក់​ថា ​​ទាហាន​រុស្ស៊ី ​​បាន​​បើក​ការវាយប្រហារ​ដ៏ធំ​​​​ដោយប្រើ​អាវុធ​​បាញ់ស៊ីប​គោលដៅ​រយៈចម្ងយា​ឆ្ងាយ​​ ​លើ​​​​ទីតាំងថាមពល ​ការគ្រប់គ្រង​​ផ្នែកយោធា​និង​ទំនាក់​ទំនង​​របស់​អ៊ុយក្រែន ។

​ការឆ្លើយតបនេះ ​កើតឡើង​​២​​ថ្ងៃ បន្ទាប់ពី​ការបំផ្ទុះ​ដែល​បាន​បំផ្លិចបំផ្លាញ​ស្ពាន​យុទ្ធសាស្ត្រ គ្រីម៉េ​ ដែល​ក្រុម​មន្ត្រី​​ក្នុងទីក្រុង​ Kiev អះអាង​​ថា​ខ្លួនជា​អ្នក​វាយប្រហារ​។

ទីក្រុង​ Moscow និយាយថា ​​ការវាយប្រហារ​​នៅក្នុង​ប្រទេស​អ៊ុយក្រែន ​​​​បាន​សម្រេចគោលដៅ​​របស់ខ្លួន​​ហើយ​។

អ្នកនាំពាក្យ​​​ក្រសួង​ការពារជាតិ​រុស្ស៊ី លោក Igor Konashenkov ​បាន​និយាយថា ​​ការវាយប្រហារ​ទាំង​នោះ ​​បានប​ណ្ដាលឲ្យ​​​បាត់បង់​ទាហាន​អ៊ុយក្រែន​ជាង​៤០​នាក់ ​ រថក្រោះ៥គ្រឿង ​យាន្តប្រយុទ្ធ​​​៤​គ្រឿង និង​រថយន្តដឹក​​សម្ភារៈ​១៥​គ្រឿង​​៕​​អត្ថបទ៖ សុខមាន