កោះកុង៖​ មន្រ្តីសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំខេត្តកោះកុង បានបើកយុទ្ធនាការព្រមៗគ្នា ដើម្បីចុះវាស់មាត្រសាស្រ្តចំណុះប្រេងសាំង និងគុណភាពចំណីអាហារដែលកំពុងដាក់នៅលើទីផ្សារ។

ក្រុមការងារ ក.ប.ប ខេត្តកោះកុង បានចុះធ្វើមាត្រសាស្រ្តស្ថានីយ ​និងដេប៉ូលក់ប្រេងសាំងចំនួន​២កន្លែង ​នៅក្នុងឃុំប៉ាក់ខ្លង ស្រុកមណ្ឌលសីមា ​និងចុះត្រួតពិនិត្យគុណភាពទំនិញចំណី​អាហារ​នៅផ្សារខ្មែរឥស្លាម ភូមិ៤ សង្កាត់ដងទង់។

លោក សាំង សេងឃី ប្រធានសាខាការពារអ្នកប្រើប្រាស់ ​កិច្ចការប្រកួតប្រជែង និងបង្រ្កាប​ការ​ក្លែងបន្លំ​ខេត្តកោះកុង​ បានឱ្យដឹងនៅថ្ងៃទី១១ ​ខែតុលា ឆ្នាំ២០២២ថា មន្រ្តីរបស់លោក​បាន​ផ្តោត​យកចិត្ត​ទុកកដាក់តេស្តចំណុះប្រេងសាំង ​ព្រមទាំងសារធាតុគីមីហាមឃាត់​ផ្សេងៗ​លើទំនិញ​ឧបភោគបរិភោគ​ និងទំនិញវេចខ្ចប់ដែលកំពុងដាក់តាំងលក់នៅលើទីផ្សារ។

លោក សាំង ​សេងឃី បន្ថែមទៀតថា​ ជាលទ្ធផលនៃការចុះពិនិត្យតាមលក្ខណៈបច្ចេកទេសបន្លែ ផ្លែឈើ ​ត្រីសាច់សរុបចំនួន១៨មុខ កំពុងដាក់លក់នៅក្នុងផ្សារខ្មែរឥស្លាម ពុំបានរកឃើញ​ការ​ផ្ទុកសារធាតុគីមីនោះទេ។ រីឯចំណុះប្រេងសាំងវិញ ក៏អនុលោមទៅតាមបទដ្ឋាន​បច្ចេកទេស​កំណត់ផងដែរ។

ជាមួយនឹងការរឹតបន្តឹងពិនិត្យគុណភាពចំណីអាហារ ​និងប្រេងសាំង ត្រូវបានប្រជាពលរដ្ឋអ្នក​ប្រើប្រាស់​ បង្ហាញការគាំទ្រចំពោះវិធានការទប់ស្កាត់ ​និងបង្រ្កាបរបស់មន្រ្តីជំនាញ ប្រសិនរក​ឃើញអាជីករ​ ឬធុរកិច្ចជនណាប្រព្រឹត្តខុសឆ្គង ដើម្បីធានាបានការលើកកម្ពស់សុខភាព​របស់អតិថិជន។

ប្រជាពលរដ្ឋ ជឿជាក់ថា មន្រ្តីជំនាញនឹងបន្តតាមដានរកអាជីករ និងធុរកិច្ចជនណាដែល​លួចលាក់​លក់ដូរទំនិញគ្មានគុណភាព ក៏ដូចជាប្រេងសាំងមិនគ្រប់ចំណុះជាប្រចាំការ ​ប្រកបដោយតម្លាភាព និងយុត្តិធម៌។

យោងតាមច្បាប់ស្តីពីការការពារអ្នកប្រើប្រាស់ កិច្ចការប្រកួតប្រជែង ​និងបង្រ្កាបការក្លែងបន្លំ ត្រង់​មាត្រា៤១ ចំពោះអាជីករ និងធុរកិច្ចជនណាដែលមន្រ្តីជំនាញរកឃើញ​ប្រព្រឹត្តល្មើស​នឹង​រងការផាកពិន័យ​អន្តរការណ៍​ និងដកហូតទំនិញខុសច្បាប់ទាំងនោះរក្សា​ទុកបំផ្លាញចោល៕អត្ថបទ៖ ឈឹម មករា