ភ្នំពេញ៖ សាលាមធ្យមវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ បានប្រកាសជ្រើសរើសសិស្សានុសិស្ស មានបំណងចង់ប្រឡងចូលរៀនជំនាញសិល្បៈ នៅសាលាតូរ្យតន្ត្រី របាំ ល្ខោន សៀក និងសិល្បៈសូនរូប ក្នុងឆ្នាំសិក្សា២០២២-២០២៣ ការជ្រើសរើសនេះ នឹងផុតកំណត់ការទទួលពាក្យនៅថ្ងៃទី១៥ ខែធ្នូ ឆ្នាំ២០២២ និងកាលបរិច្ឆេទប្រឡងនៅថ្ងៃទី២០ ខែធ្នូ ឆ្នាំ២០២២ និងកន្លែងចែកពាក្យ និងទទួលពាក្យប្រឡង នៅការិយាល័យសិក្សា នៃសាលាមធ្យមវិចិត្រសិល្បៈ។
បើតាមលោក ហេង កំសាន្ត នាយកស្តីទី សាលាមធ្យមវិចិត្រសិល្បៈ បានប្រាប់BTV ព័ត៌មាន នាព្រឹកថ្ងៃទី១៣ ខែតុលា ឆ្នាំ២០២២នេះថា សាលានឹងរៀបចំការប្រឡងជ្រើសរើសសិស្សានុសិស្សឱ្យចូលរៀនតាម សាលាជំនាញទាំង៥ខាងលើ ដោយឥតបង់ថ្លៃ លើជំនាញឯកទេសត្រូវជ្រើសរើស ដូចជា៖
១.សាលាតូរ្យតន្ត្រី -ចម្រៀង៖ អាយ៉ៃ, ចម្រៀងជាពួក និងចម្រៀងបុរាណ និងក្លារីណែត, ឧបករណ៍តន្ត្រីសម័យ៖ វីយូឡុងវីយូឡាព្យាណូសែលឡូ, កុងត្រីបាស់ត្រុំប៉ែត, ស្លុតសាក់សូ ឧបករណ៍តន្ត្រីបុរាណ៖ ចាប៉ីដងវែង, ស្រឡៃ, ទ្រអ៊ូទ្រសោ, ឃឹម, គងតូចគងធំតាខ, រនាតឯក និងរនាតធុង។
២.សាលារបាំ -ឯកទេស៖ របាំបុរាណ របាំប្រពៃណី និងល្ខោនខោល។
៣.សាលាល្ខោន -ឯកទេស៖ ល្ខោនបាសាក់ ល្ខោនយីកេ និងល្ខោននិយាយ។
៤.សាលាសៀក -ឯកទេស៖ កាប, លោតលើកម្រាល, ទន់ភ្លន់, ទោង, លំនឹង, ត្រែះ, បច្ចេកទេសលើលំហ, បាល្លេ។
៥.សាលាសិល្បៈសូនរូប -ឯកទេសគំនូរ៖ គំនូរបុរាណ, គំនូរលម្អលើក្រណាត់, គំនូរផ្សាយ និងគំនូរវិចិត្រកម្ម -ឯកទេសចម្លាក់៖ ចម្លាក់ពុម្ព, ចម្លាក់ប្រាក់, ចម្លាក់ស្មិត, ចម្លាក់ឈើ, ខ្មុកស្មាច់ និងកុលាលភាជន៍។
ជាមួយគ្នានោះដែរសិស្សានុសិស្ស កំពុងហាត់រៀនត្រៀមប្រឡងមធ្យមសិក្សាបឋមភូមិ ចំនួន០៣រូប ដែលរៀនលើជំនាញសិល្បៈរបាំបុរាណ បានលើកឡើងស្រដៀងគ្នាថា ការរៀនលើជំនាញនេះ គឺស្រលាញ់ និងមានបំណងចូលរួមលើកស្ទួយ ថែរក្សា វិស័យសិល្បៈវប្បធម៌របស់យើងឲ្យបានគង់វង្ស។
ទន្ទឹមនឹងនោះលោក ហេង កំសាន្ត បានសង្កត់ធ្ងន់ថា ក្នុងឆ្នាំសិក្សា២០២១-២០២២នេះ មានលោកគ្រូ អ្នកគ្រូ ទាំងថ្នាក់មូលដ្ឋាន ថ្នាក់ថ្នាល ថ្នាក់មធ្យមសិក្សាបឋមភូមិ ហៅថាឌីប្លូម និងថ្នាក់មធ្យមសិក្សាទុតិយភូមិ ហៅថាបាក់ឌុប សរុបជាង៣០០នាក់ ក្នុងនោះសាលាមធ្យមវិចិត្រសិល្បៈ មានកម្មវិធីសិក្សាចំនួន២៖ ទី១.ចំណេះទូទៅ ស្របតាមកម្មវិធីក្រសួងអប់រំ យុវជន និងកីឡា និងទី២.បច្ចេកទេសជំនាញសិល្បៈទាំង៥៕អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
