ភ្នំពេញ ៖ រាជធានីភ្នំពេញ នៃព្រះរាជាណាចក្រកម្ពុជា និងទីក្រុងឡាណាកា នៃសាធារណរដ្ឋស៊ីប បានធ្វើពិធីចុះហត្ថលេខាលើ លិខិតបញ្ជាក់សុឆន្ទៈ ស្តីពីការបង្កើតចំណងមិត្តភាព និងកិច្ចសហប្រតិបត្តិការជាមួយគ្នា។

ក្នុងគោលបំណងដើម្បីពង្រីកចំណងមិត្តភាព និងការយោគយល់គ្នាទៅវិញទៅមករវាងប្រជាជនរាជធានីភ្នំពេញ នៃព្រះរាជាណាចក្រកម្ពុជា និងប្រជាជនទីក្រុងឡាណាកា នៃសាធារណរដ្ឋស៊ីប នៅរសៀលថ្ងៃទី១៣ ខែតុលា ឆ្នាំ២០២២ ឯកឧត្តម ឃួង ស្រេង អភិបាលរាជធានីភ្នំពេញ បានជួបពិភាក្សាការងារជាមួយលោក Andreas Vyras អភិបាលក្រុងឡាណាកា នៃសាធារណរដ្ឋស៊ីប និងបានធ្វើពិធីចុះហត្ថលេខាលើ លិខិតបញ្ជាក់សុឆន្ទៈ ស្តីពី ការបង្កើតចំណងមិត្តភាព រវាងរាជធានីភ្នំពេញ នៃព្រះរាជាណាចក្រកម្ពុជា និងទីក្រុងឡាណាកា នៃសាធារណរដ្ឋស៊ីប ដែលជំនួបពិភាក្សាការងារ និងពិធីចុះហត្ថលេខារវាងទីក្រុងទាំងពីរបានធ្វើឡើងនៅសាលារាជធានីភ្នំពេញ។

ក្នុងឱកាសនោះ ឯកឧត្តម ឃួង ស្រេង បានលើកឡើងពីការកកើតរាជធានីភ្នំពេញ ដែលមានអាយុកាលជាង៥សតវត្សរ៍ ពិសេសលើកពីរបប ប៉ុល ពត ដែលបានធ្វើឲ្យកម្ពុជាធ្លាក់ដល់ចំណុចសូន្យ ។ ប៉ុន្តែនៅឆ្នាំ១៩៧៩ សម្តេចតេជោ ហ៊ុន សែន បានរំដោះប្រទេសជាតិចេញពីរបបនេះ និងធ្វើឲ្យកម្ពុជា ពិសេសរាជធានីភ្នំពេញមានការអភិវឌ្ឍរីកចំរើនលើគ្រប់វិស័យរហូតមកដល់សព្វថ្ងៃនេះ។ ស្របជាមួយនិងការអភិវឌ្ឍន៍នេះ ឯកឧត្តម ឃួង ស្រេង ក៏បានលើកឡើងពីបញ្ហាប្រឈមមួយចំនួនផងដែរ ដូចជាការកកស្ទះចរាចរណ៍ ការដោះស្រាយបញ្ហាលំនៅដ្ឋានមិនរៀបរយ និងបញ្ហាកា​រទប់​ស្កាត់​ជម្ងឺកូវីដ-១៩ជាដើម ដែលបញ្ហាទាំងនេះ រដ្ឋបាលរាជធានីភ្នំពេញបាននឹងកំពុងដោះស្រាយយ៉ាងសកម្មផងដែរ និងបានកសាងមន្ទីរពេទ្យ​សម្រាប់​ព្យាបាលជម្ងឺកូវីដ-១៩ និងព្យាបាលជម្ងឺផ្សេងៗទៀតដ៏ធំមួយនៅក្នុងរាជធានីភ្នំពេញ។

ឯកឧត្តម ឃួង ស្រេង បានបន្ថែមថា សម្រាប់រាជធានីភ្នំពេញបានចងសម្ព័ន្ធមេត្រីភាពជាមួយទីក្រុងជាច្រើននៅលើពិភពលោក ហើយថ្ងៃនេះ​រាជធានភ្នំពេញក៏មានកិត្តិសយដែលបានចុះហត្ថលេខា លើ លិខិតបញ្ជាក់សុឆន្ទៈ ស្តីពី ការបង្កើតចំណងមិត្តភាព រវាងរាជធានីភ្នំពេញ​នៃ​ព្រះរាជាណាចក្រកម្ពុជា និងទីក្រុងឡាណាកា នៃសាធារណរដ្ឋស៊ីប។ ឯកឧត្តម ឃួង ស្រេង បានបង្ហាញពីបំណងចង់​ឲ្យរាជធានីភ្នំពេញ​ក្លាយជាទីក្រុងវៃឆ្លាតនៅពេលដ៏ខ្លីខាងមុខនេះ។

លោក Andreas Vyras អភិបាលក្រុងឡាណាកា ក្នុងឱកាសនោះបានមានប្រសាសន៍លើកឡើងពីភាពរីកចំរើនលើគ្រប់វិស័យរបស់រាជធានីភ្នំពេញ ដែលលោកនឹកស្មានមិនដល់ ហើយអ្វីដែលពិសេសថែមទៀតនោះ កម្ពុជាក៏ដូចជារាជធានីភ្នំពេញ គ្រប់គ្រងបានយ៉ាងល្អជុំវិញ​ការរាតត្បាត​នៃ​ជម្ងឺកូវីដ-១៩ ដោយលោកសុំរៀនសូត្រពីបទពិសោធន៍ទាំងនេះពីកម្ពុជា ។ បន្ថែមពីនេះក្នុងគោលបំណងពង្រីកចំណងមិត្តភាព និងការយោគយល់​គ្នាទៅវិញទៅមករវាងប្រជាជននៃទីក្រុងទាំងពីរ អ្វីជាបទពិសោធន៍របស់ទីក្រុងឡាណាកាមាន នឹងយកមកចែករំលែកជូនរាជធានីភ្នំពេញ ដែលមាន​ដូចជា ចំណតឆ្លាតវៃ ភ្លើងបំភ្លឺឆ្លាតវៃ ការគ្រប់គ្រងសំណល់រឹងឆ្លាតវៃជាដើម ៕អត្ថបទ ៖ ប្រាក់ វ៉ាន់ដា