បាត់ដំបង៖ អនុវត្តន៍តាមបទបញ្ជាដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា ឯកឧត្តម សុខ លូ អភិបាលខេត្តបាត់ដំបង និងលោកជំទាវ បាន ស្រីមុំ អភិបាលខេត្តប៉ៃលិន បាន​ជួបគ្នា​នៅព្រំប្រទល់ខេត្ត ​ដើម្បីពិនិត្យកែសម្រួលព្រំប្រទល់ខេត្តទាំងពីរសំដៅ​បង្ក​លក្ខណៈងាយ​ស្រួលដល់ប្រជាជនទាំងសងខាង។

ជំនួបនេះ បានធ្វើឡើងនាថ្ងៃទី១៨ ខែតុលា ឆ្នាំ២០២២ នៅចំណុចស្ពានភ្នំដំបង ស្ថិតនៅក្នុងភូមិ​សាស្ត្រ​ឃុំមានជ័យ ​ស្រុកសំឡូត​ ខេត្តបាត់ដំបង។ ក្នុងជំនួបនេះ ថ្នាក់ដឹកនាំនៃខេត្តទាំងពីរ​បាន​ចុះពិនិត្យ និងផ្ទៀងផ្ទាត់នូវចំណុចភូមិសាស្ត្រដែលត្រូវរៀបចំកែ​សម្រួលព្រំប្រទល់​រដ្ឋបាលឡើងវិញ​ឱ្យបានច្បាស់លាស់។

ថ្នាក់ដឹកនាំនៃខេត្តទាំងពីរ បានឯកភាពគ្នាជាគោលការណ៍ជាក់លាក់លើប្លង់ផែន​ទី​កំណត់យក​ស្ទឹងបរឡាង ​ក្នុងភូមិសាស្ត្រឃុំមានជ័យ ​និងផ្នែកខ្លះទៀតក្នុងឃុំសំឡូត ធ្វើជាព្រំប្រទល់ខេត្ត។ដោយឡែកនៅក្នុងស្រុកកំរៀង ​កំណត់យកស្ទឹងមង្គលបុរី ​ស្ថិតក្នុងភូមិសាស្ត្រនៃឃុំកំរៀង និង​ផ្នែកខ្លះទៀត​ក្នុងឃុំតាក្រី ​ដើម្បីធ្វើជាព្រំប្រទល់ខេត្ត។

អភិបាលខេត្តទាំងពីរ បានជំរុញដល់មន្ទីរដែនដីនៃខេត្តទាំងពីរ ឱ្យបន្តជួបគ្នាដើម្បីធ្វើការងារជំនាញ​ឱ្យបានកាន់តែលម្អិតច្បាស់លាស់ថែមទៀតក្នុងការផ្ទៀងផ្ទាត់ផែនទីរបស់ខេត្តនីមួយៗ​ឱ្យបានត្រឹមត្រូវ​ជាក់លាក់។

គួរបញ្ជាក់ថា ​ផ្ទៃដីដែលត្រូវកែសម្រួលផ្ទៀងផ្ទាត់កំណត់ព្រំប្រទល់​រដ្ឋបាលជាក់លាក់​ជាថ្មីឡើងវិញ​រវាងខេត្តទាំងពីរ ក្នុងនោះយ៉ាងហោចណាស់ផ្ទៃដីប្រមាណជាង១ម៉ឺនហិកតា​ក្នុង​ភូមិសាស្ត្រ​ខេត្តបាត់ដំបង ​ត្រូវប្រគល់​ទៅឱ្យខេត្តប៉ៃលិន កាន់កាប់៕