ភ្នំពេញ៖ ឧត្តមសេនីយ៍ឯក គឹម វណ្ណា នាយកមជ្ឈមណ្ឌលស្រាវជ្រាវយុទ្ធសាស្ត្រយោធាអគ្គបញ្ជាការ បានលើក ឡើងថា ការញុះញុងឲ្យកងកម្លាំងប្រដាប់អាវុធធ្វើការបះបោផ្ដួលរំលំរាជរដ្ឋាភិបាលស្របច្បាប់ គឺជាអំពើខុសច្បាប់ ដែលត្រូវតែប្រឆាំងដាច់ខាត និងថ្កោលទោសយ៉ាងដាច់អាហង្ការ ចំពោះទណ្ឌិតសម រង្ស៊ី មេក្រុមឧទ្ទាមជាពូជក្បត់ជាតិ។
ក្នុងពិធីបើកវគ្គបណ្ដុះបណ្ដាលផ្ទៃក្នុង ទ្រឹស្ដីស្រាវជ្រាវយុទ្ធសាស្ត្រ និងវិទ្យាសាស្ត្រយោធា នៅអគ្គបញ្ជាការដ្ឋាន នៅថ្ងៃនេះ ឧត្តមសេនីយ៍ឯក គឹម វណ្ណា បានលើកឡើងថា សម្ដេចតេជោ ហ៊ុន សែន ជាស្ថាបនិកមគ្គទេសក៍ឯកនៃនយោបាយឈ្នះ ឈ្នះ នាំមកនូវសន្តិភាពពេញលេញជូនជាតិមាតុភូមិ ធ្វើឱ្យមានការអភិវឌ្ឍប្រទេសជាតិលើគ្រប់វិស័យមកដល់សព្វថ្ងៃនេះ ដែលនេះជាគុណបំណាច់ដ៏ធំធេង។
ឯកឧត្តម បានរំលឹកអំពីតម្លៃនៃសន្តិភាព ដោយសង្កត់ធ្ងន់ទៅលើការលះបង់ខ្ពស់របស់សម្ដេចតេជោ ហ៊ុន សែន ក្នុងដំណើរសង្គ្រោះ និងរំដោះជាតិប្រជាជនពីរបបខ្មែរក្រហម ដូច្នេះត្រូវរួបរួមគ្នាទាំងស្មារតី និងឆន្ទៈប្រុងប្រយ័ត្នខ្ពស់ក្នុងការប្រយុទ្ធប្រឆាំងបច្ចាមិត្តលើគ្រប់សមរភូមិ មិនត្រូវចាញ់ឧបាយកលញុះញង់របស់សមាសភាពឧទ្ទាមមួយក្តាប់តូច ដែលមានបំណងចង់បំផ្លិចបំផ្លាញ និងផ្ដួលរំលំរាជរដ្ឋាភិបាលតាមគ្រប់រូបភាព។
ឧត្តមសេនីយ៍ឯក បានជំរុញឲ្យយោធិនទាំងអស់ ត្រូវប្ដេជ្ញាការពារឲ្យបានដាច់ខាតនូវសុខសន្តិភាពការពាររដ្ឋធម្មនុញ្ញ នៃព្រះរាជាណាចក្រកម្ពុជា ការពារព្រះមហាក្សត្រ ការពាររាជរដ្ឋាភិបាល ការពារឯករាជ្យ និងអធិបតេយ្យជាតិ ព្រមទាំងអនុវត្តឲ្យបាននូវរាល់គោលនយោបាយការដឹកនាំរបស់រាជរដ្ឋាភិបាលដើម្បីរក្សាការពារសន្តិភាព សុខដុមរមនារបស់ប្រជាពលរដ្ឋ និងការអភិវឌ្ឍប្រទេសជាតិ។
ឧត្តមសេនីយ៍ឯក បានផ្ដាំផ្ញើដល់យោធិនគ្រប់រូប ត្រូវ គោរពឲ្យបានម៉ឺងម៉ាត់រាល់បទបញ្ជារបស់រាជរដ្ឋាភិបាល ក្រសួងការពារជាតិ អគ្គបញ្ជាការដែលបានប្រគល់ជូន គោរពឱ្យបានម៉ឺងម៉ាត់នូវច្បាប់រដ្ឋធម្មនុញ្ញរបស់ព្រះរាជាណាចក្រកម្ពុជា ច្បាប់ស្ដីពីលក្ខន្តិកៈទូទៅ នៃកងយុទ្ធពលខេមរភូមិន្ទនិងច្បាប់ផ្សេងៗទៀតរបស់រដ្ឋ។ ត្រូវយកចិត្តទុកដាក់ពង្រឹងកម្លាំងឲ្យបានល្អ និងប្រើប្រាស់ធនធានមនុស្សឲ្យបានសមស្របតាមការចាត់តាំង ក្នុងការធានាបានប្រសិទ្ធភាពជាក់ស្ដែងក្នុងការបំពេញភារកិច្ច ត្រូវយកចិត្តទុកដាក់ហ្វឹកហ្វឺន និងសកម្មភាពចូលរួមរៀនសូត្របន្ថែមទៀត ឲ្យបានត្រឹមត្រូវ លើកកម្ពស់ស្មារតីគ្រប់គ្រងថែរក្សាសម្ភារបរិក្ខារ គ្រឿងបំពាក់តាមលក្ខណៈបច្ចេកទេស ដើម្បីធានាប្រើប្រាស់បានយូរអង្វែង។ ត្រូវបន្តកិច្ចសហប្រតិបត្តិការល្អជាមួយអាជ្ញាធរដែនដីគ្រប់លំដាប់ថ្នាក់ ដើម្បីរួមចំណែកអនុវត្តគោលនយោបាយភូមិឃុំមានសុវត្ថិភាព ពិសេសជំរុញការងារចុះមូលដ្ឋានឲ្យបានខ្លាំងក្លា និងត្រូវចៀសឲ្យឆ្ងាយពីគ្រឿងញៀន និងគ្រឿងស្រវឹង៕ អត្ថបទ៖ ឆៃ សំអូន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
