ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានចេញ​បទបញ្ជា​យ៉ាងម៉ឹងម៉ាត់ជាថ្មីម្តងទៀត ទៅដល់អាជ្ញាធរគ្រប់លំដាប់ថ្នាក់ទាំងអស់ ត្រូវតែ​មាន​ឆន្ទៈខ្ពស់បន្ថែមទៀតក្នុងការទប់ស្កាត់ ​និងបង្ក្រាបឱ្យបាននូវបទល្មើសគ្រឿង ប្រសិនបើមិន​ប្រញាប់ប្រញាល់​ទប់ស្កាត់​ឲ្យបានទាន់ពេលវេលានាពេលនេះទេ វានឹងមានផលវិបាក​នៅ​ក្នុងសង្គមជាតិ នាពេលខាងមុខនេះ។

ក្នុងឱកាសសម្ពោធដាក់ឱ្យប្រើប្រាស់ជាផ្លូវការ ​នូវអគារទំនើប​ហ្វឹកហាត់​បាញ់​គ្រាប់ពិតអាវុធខ្លី និង​ជួប​សំណេះសំណាល​ជាមួយថ្នាក់​ដឹកនាំ ​គ្រូ​នគរបាលជាតិ ​និង​មន្ដ្រី​នៃបណ្ឌិត្យសភា​នគរបាល​កម្ពុជា នាព្រឹកថ្ងៃទី១៩ ខែតុលា ឆ្នាំ២០២២នេះ នៅឃុំដីឥដ្ឋ ស្រុកគៀនស្វាយ ​ខេត្តកណ្តាល សម្ដេចក្រឡាហោម ស ខេង បានលើកឡើងនាពេលបច្ចុប្បន្ននេះ កម្ពុជាគឺជាប្រទេសរងគ្រោះ​ដោយ​ពួក​ឧក្រិដ្ឋ​ជន​យកធ្វើជាទីកន្លែងប្រព្រឹត្តបទល្មើស​ ដូចជា​ឧក្រិដ្ឋ​កម្មឆ្លងដែន បទល្មើសជួញដូរ​មនុស្សខុសច្បាប់ ​ព្រមទាំងបទល្មើសគ្រឿងញៀនជាដើម។

សម្តេចក្រឡាហោម បានបញ្ជាក់ថា កម្ពុជាមិនមែនជាប្រទេសដែលប្រើប្រាស់ និងផលិត​គ្រឿង​ញៀន​ទាំងស្រុងនោះឡើយ​ ប៉ុន្ដែវាក្លាយទៅជាទីកន្លែងផលិតនូវសារធាតុញៀនផ្សំ​ តាម​រយៈគីមីផ្សំ ដែលផលិតផលពាក់កណ្ដាលសម្រេច ​ត្រូវបាននាំចូលមកកម្ពុជា។

សម្ដេច បន្ដថា នៅពេលនាំចូលនូវផលិតផល​ពាក់​កណ្ដាលសម្រេច ​ចំពោះ​សាធារធាតុគីមីទាំង​ឡាយ​ផ្សំតាមរូបមន្ដ​របស់ពួកគេនោះ ​យកទៅលាក់​ ដើម្បីយកកម្ពុជាធ្វើជាទីតាំងផលិត រួចហើយ​នាំ​ចេញទៅប្រទេសទី៣ ​ក្នុងមួយផ្នែកចែកចាយនៅកម្ពុជា។

សម្តេចប្រមុខក្រសួងមហាផ្ទៃ ​បានសង្កត់ធ្ងន់ថា«បញ្ហានេះ(គ្រឿងញៀន) យើងចាំបាច់ត្រូវមាន​ការ​ប្ដេជ្ញាចិត្តប្រកបដោយឆន្ទៈខ្ពស់ ក្នុងការទប់ស្កាត់ ​បង្ក្រាបនូវបទល្មើសនេះឱ្យខានតែបាន ពីព្រោះ​ផលលំបាក ​នៃសង្គមរបស់យើងវានឹងកើត​មាននៅពេលខាងមុខ ប្រសិនបើយើងមិនបានយកចិត្ត​ទុកដាក់បង្ក្រាប​ និងដោះស្រាយបញ្ហាទាំងនេះចាប់ពីពេលនេះតទៅនោះទេ»។

ជាមួយគ្នានោះដែរ សម្តេចក្រឡាហោម ក៏បានលើកឡើងជាសំនួរផងដែរថា តើអ្វីទៅ​ហៅថា​ផលវិបាក? គឺវាប៉ះពាល់ដំបូងបំផុត ​ធនធានមនុស្ស ​មនុស្សពេញវ័យ ​ជាដើម គឺនឹងក្លាយទៅ​ជាអ្នក​ជក់គ្រឿងញៀន។

ទន្ទឹមនឹងនេះ បញ្ហាសន្ដិសុខ សណ្ដាប់ធ្នាប់ ​ចោលលួច ​ចោលប្លន់ ជាដើម វានឹងកើតមានឡើង​ផងដែរ។​សម្ដេច បានឱ្យដឹងទៀតថា ជាក់ស្ដែងបញ្ហាទាំងនេះបានកើត​មានឡើងរួចទៅហើយ នៅតាមបណ្ដា​ប្រទេស​មួយ​ចំនួនក្នុងតំបន់។

សម្ដេចក្រឡាហោម ឧបនាយករដ្ឋមន្ដ្រី ​ក៏បានណែនាំឲ្យអាជ្ញាធរត្រូវបង្ក្រាបទាន់​ពេលវេលានូវ​ល្បែង​អនឡាញ និងល្បែងគ្រប់ប្រភេទ​ នៅតាមមូលដ្ឋានរបស់ខ្លួនផងដែរ។ ​ជាងនេះទៅទៀត សម្ដេច​ក៏បានណែនាំដល់អាជ្ញាធរ ត្រូវបង្ក្រាបបទល្មើស ​ការជួញដូរមនុស្សព្រោះថា កម្ពុជាគឺជាប្រទេស​រងគ្រោះហើយដើម្បីលុបបំបាត់បទល្មើសទាំងនេះរាជរដ្ឋាភិបាលកម្ពុជា ​និងក្រសួមហាផ្ទៃបាន​ដាក់​ចេញគោលនយោបាយ ភូម-ឃុំមានសុវត្ថិភាពផងដែរ។

យ៉ាងណាក៏ដោយសម្តេចក្រឡាហោម ស ខេង ឧបនាយករដ្ឋមន្រ្តី ​ក៏បានថ្លែងអំណរអគុណចំពោះ បងប្អូន​សមត្ថកិច្ចទាំងអស់ដែលបានខិតខំថែរក្សា​សន្តិសុខសណ្តាប់ធ្នាប់សង្គម និងបាន​ខិតខំយ៉ាងសកម្មក្នុងការទប់ស្កាត់បទល្មើសនានា ​កាលពីពេលកន្លងមកផងដែរ បើទោះបីជា​សកម្មភាពខ្លះវានៅមានភាព ​ចន្លោះប្រហោងក៏ដោយនោះ៕អត្ថបទ៖ បានចក់