ភ្នំពេញ៖ មន្ត្រីជាន់ខ្ពស់ក្រសួងសង្គមកិច្ច អតីតយុទ្ធជន និងយុវនីតិសម្បទា រួមទាំង តំណាងអង្គការយូនីសេហ្វ ប្រចាំតំបន់ និងថ្នាក់ដឹកនាំដទៃទៀត បាននាំយកអំណោយ ចែកជូនកុមាររងគ្រោះដោយទឹកជំនន់ ដែលរស់នៅក្នុងមណ្ឌលអង្គការសង្គ្រោះជនអស់សង្ឃឹមទី២ នៅខេត្តបន្ទាយមានជ័យ។
ឯកឧត្តម តូច ចាន់នី អគ្គនាយកសេវាសង្គមកិច្ច តំណាងឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា រួមទាំងតំណាងអង្គការ យូនីសេហ្វ ប្រចាំតំបន់ និងថ្នាក់ដឹកនាំដទៃទៀត បានចុះសួរសុខទុក្ខនិងនាំយកអំណោយផ្ដល់ជូនដល់ កុមាររងគ្រោះជាង ១០០នាក់ ដោយទឹកជំនន់រស់នៅក្នុងមណ្ឌលអង្គការសង្គ្រោះជនអស់សង្ឃឹមទី២ ស្ថិតនៅ ឃុំឬស្សក្រោក ស្រុកមង្គលបូរី ខេត្តបន្ទាយមានជ័យ នាថ្ងៃទី១៩ ខែតុលា ឆ្នាំ២០២២។
អំណោយទាំងនោះ រួមមាន អង្ករ ៥០គីឡូចំនួន១៥ប៉ាវ មី១០កេះ ទឹកត្រី ១០យួរ ទឹកស៉ីអ៉ីវ ១០យួរ ត្រីខ១កេះ សាប៊ូ ១១៥ដុំ សាប៊ូម្សៅ ១២គីឡូ ទឹកផ្លែឈើ ៥កេះ និងថវិកា ៥០ម៉ឺនរៀល។
ខណ:ចុះសួរសុខទុក្ខនិងផ្ដល់អំណោយជូនកុមារនេះ ឯកឧត្តម តូច ចាន់នី បានសម្តែងការអរគុណដល់បណ្ដាអង្គការនានាដែលបានធ្វើកិច្ចសហប្រតិបត្តការផ្តល់សេវាដល់កុមាររងគ្រោះ និងងាយរងគ្រោះកំពុងជួបការលំបាកនៅកម្ពុជា។
ឯកឧត្តម ក៏បានកោតសរសើរ និងសង្ឃឹមយ៉ាងមុតមាំថា អង្គការនឹងបន្តកិច្ចសហប្រតិបត្តិការល្អជាមួយគ្នា ដោយផ្តោតសំខាន់ទៅលើការផ្តល់សេវាដល់កុមាររងគ្រោះ និងងាយរងគ្រោះដែលកំពុងជួបការលំបាក ដើម្បីឆ្លើយតបនឹង ផែនការយុទ្ធសាស្ត្ររបស់រាជរដ្ឋាភិបាល ក៏ដូចជាក្រសួង សំដៅការពារឧត្តមប្រយោជន៍របស់កុមារ។
ក្នុងឱកាសនោះ លោកអគ្គនាយក ក៏បានពាំនាំនូវការផ្តាំផ្ញើសាកសួរសុខទុក្ខពីសំណាក់លោករដ្ឋមន្ត្រី វង សូត ដល់ក្មួយៗកុមារដែលកំពុងស្នាក់នៅ និងបុគ្គលិកមើលថែកុមារ ដែលបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំមិនទុកអោយពួកគាត់រស់នៅដោយឯកោឡើយ។
ជាមួយគ្នានេះ សូមបងប្អូន ក្មួយៗមានការប្រុងប្រយ័ត្នខ្ពស់ចំពោះការកើតឡើងនូវគ្រោះថ្នាក់ផ្សេងៗជាយថាហេតុ ពិសេសត្រូវប្រកាន់ភ្ជាប់នូវអនាម័យល្អកុំអោយមានជម្ងឺផ្សេងៗផងដែរ៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
