ភ្នំពេញ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានជំរុញដល់បណ្តា ប្រទេសអាស៊ានដែលជាសមាជិកទាំងអស់ បង្កើនការយកចិត្តទុកដាក់ខ្ពស់លើសុខុមាលភាព ពលករទេសន្តរ ប្រវេសន៍ ដោយឈរលើមូលដ្ឋានការអនុវត្តសិទ្ធិការងារ និងកិច្ចគាំពារសង្គមជាដើមសម្រាប់ពលករទេសន្តរ ប្រវេសន៍។
នៅក្នុងពិធីបើកវេទិកាអាស៊ាន ស្តីពីទេសន្តរប្រវេសន៍ការងារលើកទី១៥ ក្រោមមូលបទ “ការបើកដំណើរការឡើង វិញនៃទេសន្តរប្រវេសន៍ការងារ និងកិច្ចសហប្រតិបត្តិការក្នុងតំបន់” នៅព្រឹកថ្ងៃទី១៩ តុលា ឆ្នាំ២០២២នេះ នៅរាជធានីភ្នំពេញ ដោយមានការអញ្ជើញចូលរួមពីគណៈប្រតិភូនៃបណ្តារដ្ឋសមាជិកអាស៊ាន លេខាធិការ ដ្ឋានអាស៊ាន សហព័ន្ធ និយោជកអាស៊ាន អង្គការសហជីពអាស៊ាន សមាគមនិយោជក សហជីព អង្គការសង្គម ស៊ីវិលនៃបណ្តារដ្ឋសមាជិកអាស៊ាន ក្រុមការងារសម្រាប់ពលករទេសន្តរប្រវេសក៍អាស៊ាន និងតំណាងអង្គការ អន្តរជាតិសរុបប្រមាណ ១០០នាក់ ឯកឧត្តមរដ្ឋមន្ត្រី បានមានប្រសាសន៍ថា ដោយសារការធ្វើទេសន្តរប្រវេសន៍ ការងារជាបាតុភូតសង្គមដែលមិនអាចលុបបំបាត់បាន ការការពារ និងលើកកម្ពស់សិទ្ធិរបស់ពលករទេសន្តរ ប្រវេសក៍ គឺជាកិច្ចការដ៏មានសារៈសំខាន់ និងចាំបាច់បំផុត។
ក្នុងបុព្វហេតុនេះ ប្រមុខរដ្ឋាភិបាលនៃបណ្តារដ្ឋសមាជិកអាស៊ានបានដាក់ចេញ និងអនុម័ត នូវសេចក្តីថ្លែងការណ៍អាស៊ានស្តីពីការការពារ និងការលើកកម្ពស់សិទ្ធិពលករទេសន្តរប្រវេសក៍ ក្នុងឆ្នាំ២០០៧ និងឯកច្ឆន្ទភាពអាស៊ាន ស្តីពីការការពារ និងការលើកកម្ពស់សិទ្ធិពលករទេសន្តរប្រវេសក៍ក្នុងឆ្នាំ២០១៧។
ឯកឧត្តមរដ្ឋមន្ត្រី អ៊ិត សំហេង បានលើកឡើងបន្តថា កម្ពុជាបានដាក់ចេញនូវគោលនយោបាយ និងលិខិតបទ ដ្ឋានគតិយុត្តជាច្រើន ដើម្បីគាំពារសិទ្ធិ និងអត្ថប្រយោជន៍ទាំងពលករទេសន្តរប្រវេសក៍កម្ពុជា ដែលទៅធ្វើការនៅបរទេស ទាំងពលករទេសន្តរប្រវេសក៍បរទេសដែលមកធ្វើការនៅកម្ពុជា។
ទន្ទឹមនឹងនេះ កម្ពុជាបានធ្វើ និងកំពុងអនុវត្តកិច្ចព្រមព្រៀងទ្វេភាគី ស្តីពីកិច្ចសហប្រតិបត្តិការលើវិស័យការងារ ជាមួយបណ្តាប្រទេសនានាទាំងនៅក្នុង និងក្រៅតំបន់អាស៊ានផងដែរ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
