ភ្នំពេញ៖ ក្រសួងសុខាភិបាល នៃព្រះរាជាណាចក្រកម្ពុជា ព្រឹកថ្ងៃទី២០ ខែតុលា ឆ្នាំ២០២២នេះ បានប្រកាសដំណើរការអនុវត្តគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២។

ពិធីប្រកាសដំណើការនេះឋិតក្រោមអធិបតីភាពឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល , ឯកឧត្ដម Pablo Kang ឯកអគ្គរដ្ឋទូតប្រទេសអូស្ត្រាលី ប្រចាំកម្ពុជា, ឯកឧត្តម Park Heung-kyeong ឯកអគ្គរដ្ឋទូតសាធារណរដ្ឋកូរ៉េ ប្រចាំកម្ពុជាឯកឧត្តម Udo Weber ទីប្រឹក្សាគោលនយោបាយជាន់ខ្ពស់ ​ទទួលបន្ទុកតំបន់អាស៊ី អាគ្នេយ៍ នៃក្រសួងសហប្រតិបត្តិការ​សេដ្ឋកិច្ចនិងអភិវឌ្ឈន៍ (សាធារណរដ្ឋសហព័ន្ធអាល្លឺម៉ង់), ឯកឧត្តមតំណាងក្រសួង​សេដ្ឋកិច្ចនិងហិរញ្ញវត្ថុ ក្រសួងមហាផ្ទៃ និងក្រសួងផែនការ, លោកស្រី Maryam Salim អ្នកគ្រប់គ្រងប្រចាំប្រទេសកម្ពុជា នៃធនាគារពិភពលោក, លោក Daniel Dulitzky នាយកប្រចាំតំបន់អាស៊ីខាងកើតនិងប៉ាស៊ីហ្វិកទទួលបន្ទុក ការអភិវឌ្ឍធនធានមនុស្ស នៃធនាគារពិភពលោក។

ឯកឧត្តម សាស្រ្តាចារ្យ ម៉ម ប៊ុនហេង បានថ្លែងថា ពិធីប្រកាសដាក់ឱ្យដំណើរការ ជាផ្លូវការ ការ​អនុវត្តគម្រោងលើកកម្ពស់គុណភាព ​និងសមធម៌សុខាភិបាល​ ដំណាក់កាលទី២ ដែលជា​គម្រោងសុខភាពមានវិសាលភាពគ្របដណ្តប់ធំបំផុតដែលមិនធ្លាប់មាន។ ក្នុងនាមក្រសួងសុខាភិបាល ពិតជាមានមោទនភាពដែលបានឃើញ​គម្រោងនេះលេចជា​រូបរាង​ឡើងដើម្បីគាំទ្រដល់ការអនុវត្ត ​ផែនការយុទ្ធសាស្ត្រសុខាភិបាលឈានទៅសម្រេចការគ្របដណ្ដប់​សុខភាពជាសកលនៅឆ្នាំ២០៣០។

ឯកឧត្តម រដ្ឋមន្រី្ត បានបន្ថែមថា ក្នុងអំឡុងពេលដ៏លំបាកនៃការរាតត្បាតជំងឺកូវីដ-១៩ គម្រោងលើក​កម្ពស់​គុណភាព និងសមធម៌ សុខាភិបាល ផ្នែក​ឆ្លើយ​តបគ្រា​អាសន្ន​ត្រូវ​បាន​បង្កើតឡើង ដោយផ្តល់​បន្ថែម​ហិរញ្ញប្បទានចំនួន ​១៤លាន​ ដុល្លារអាមេរិក សម្រាប់គាំទ្រក្រសួងសុខាភិបាល​ក្នុងការអនុវត្ត​ផែន​ការមេឆ្លើយ​តបជំងឺកូវីដ-១៩ របស់កម្ពុជា រួមមានការពង្រឹងសមត្ថភាពធ្វើតេស្ដកូវីដ-១៩ បាន​បង្កើតមន្ទីរពិសោធន៍ថ្នាក់តំបន់ថ្មីចំនួនពីរ​ កន្លែងសម្រាប់ធ្វើតេស្តកូវីដ-១៩ ទិញសម្ភារៈបរិក្ខារពេទ្យ​បំពាក់​ឱ្យមណ្ឌលព្យាបាលបន្ទាន់ជំងឺកូវីដ-១៩​ នៅមន្ទីរពេទ្យជាតិ ​និងខេត្ត ព្រមទាំង​បានទិញរថយន្ត​សង្គ្រោះបន្ទាន់ចំនួន ៦០គ្រឿង។

ឯកឧត្តមសាស្ត្រាចារ្យ ម៉ម ប៊ុនហេង ​បានបញ្ជាក់ទៀតថា ​ដើម្បីធានាសុខភាពសម្រាប់ទាំងអស់គ្នា ការ​គ្របដណ្ដប់សុខភាពជាសកល​ ត្រូវតែសម្រេចឱ្យបាន ទោះបីជាមានបញ្ហាប្រឈមខ្លះៗ​ក៏ដោយ។​ វាគឺជាដំណើរមួយតម្រូវឱ្យប្រព័ន្ធថែទាំសុខភាពបឋមកាន់តែមានគុណភាព ​សមភាព និងអាច​ទៅទទួលសេវាបាន ព្រមទាំងមានការគាំទ្រពីប្រព័ន្ធសុខាភិបាលឌីជីថល ​សមស្រប ដែលអាចផ្តល់ទិន្នន័យសម្រាប់ធ្វើការសម្រេចចិត្ត ការធ្វើផែនការ ការតាមដាននិងការវាយតម្លៃ ការផ្តល់សេវាសុខភាព ការស្រាវជ្រាវ និងនវានុវត្តន៍។

ការប្រើប្រាស់ធនធានរបស់គម្រោងលើកកម្ពស់ គុណភាព និងសមធម៌សុខាភិបាល ដំណាក់​កាលទី២ នឹងចូលរួមចំណែកដោះស្រាយបញ្ហាប្រឈមខាងលើ ប្រកបដោយប្រសិទ្ធភាព និង​ប្រសិទ្ធផល ដើម្បីបង្កើនការប្រើប្រាស់សេវាសុខាភិបាល ​ការពង្រឹងគុណភាព​ និងសមត្ថភាព នៃការ​ផ្តល់សេវាកាន់តែទូលំទូលាយ​ ដោយពង្រីកសេវាជំងឺមិនឆ្លងតាមរយៈការចូលរួមយ៉ាង សកម្មរបស់​សហគមន៍។ ដើម្បីសម្រេចបាន «ចក្ខុវិស័យឆ្នាំ២០៣០» របស់កម្ពុជា ក្នុងការប្រែក្លាយទៅ​ជាប្រទេស​មាន​ចំណូលមធ្យមកម្រិតខ្ពស់ ការធានាសុខភាព ​និងសុខុមាលភាព ព្រមទាំងសម្រេចបានការ​គ្រប​ដណ្ដប់​សុខភាពជាសកលទាមទារធ្វើកំណែទម្រង់​ប្រព័ន្ធសុខាភិបាលរបស់យើងឱ្យកាន់​តែមាន​លក្ខណៈសមស្របតាម​តម្រូវ​ការរបស់ប្រជាជនកម្ពុជា​នាពេលអនាគត តាមរយៈនវានុវត្តន៍ប្រព័ន្ធ​សុខាភិបាល។

ក្នុងកិច្ចខិតខំប្រឹងប្រែងទាំងនេះ ក្រសួងសុខាភិបាលបាន និងកំពុងបញ្ចប់ផែនការ​យុទ្ធសាស្ត្រ​សុខាភិបាល​ដំណាក់កាលទី៤(២០២២-២០៣០) ​យុទ្ធសាស្ត្រឌីជីថលសុខាភិបាល និង​ក្របខណ្ឌ​ជំរុញការអនុវត្តកម្មវិធីថែទាំសុខភាពបឋម ​ដែលចាំបាច់ត្រូវ មានកិច្ចខិតខំប្រឹងប្រែងរួមគ្នា​ទាំង​នៅថ្នាក់ជាតិ ​ថ្នាក់ក្រោមជាតិ ​អាជ្ញាធរមូលដ្ឋាននិងភាគីពាក់ព័ន្ធទាំងអស់៕អត្ថបទ រដ្ឋា