កំពត៖ ដើម្បីជំរុញវិស័យទេសចរណ៍ឱ្យបានកាន់តែមានភាពទាក់ទាញ ​និងសម្បូរបែប ​ក៏ដូចជា​ជំរុញ​ការងារ​អភិវឌ្ឍន៍​តំបន់ឆ្នេរសមុទ្រខេត្តកំពតឱ្យបានស្អាត ​សក្ដិសម​ជា​ខេត្តគោលដៅទេសចរណ៍ ឆ្លើយ​តបតម្រូវការ ​ភ្ញៀវទេសចរជាតិ-អន្តរជាតិ​ អាជ្ញាធរខេត្តកំពត ​គ្រោង​នឹងបង្កើត​ឆ្នេរខ្សាច់​កម្សាន្ត​ថ្មី​មួយ​កន្លែងទៀត ​នៅកណ្តាល​សមុទ្រ​ ខាង​មុខកំពង់ផែ​ទេសចរណ៍​អន្តរជាតិ។

ក្នុងពេលចុះពិនិត្យទីតាំងរៀបចំពិធីប្រណាំងទូក អកអំបុក និងសំពះព្រះខែ ក៏ដូចជាចុះពិនិត្យ​វឌ្ឍនភាព ​នៃការស្ថាបនាឆ្នេរព្រែកកំពត​ នៅថ្ងៃទី២១ ខែតុលានេះ ​ឯកឧត្តម ម៉ៅ ធនិន អភិបាល​ខេត្ត​កំពត ​បានឱ្យដឹងថា ក្នុងពេលឆាប់ៗខាងមុខនេះ​ ខេត្តកំពត មានគម្រោងបង្កើត​ឆ្នេរខ្សាច់​កម្សាន្តថ្មី​មួយបន្ថែមទៀត ​ដែល​មានទីតាំងក្នុងស្រុកទឹកឈូ​ ពោល​គឺនៅខាងចុងឃ្លងនាវាចូលចត នៅកំពង់ផែទេសចរណ៍អន្តរជាតិ ។

ឯកឧត្តម បានបញ្ជាក់ថា ​ឆ្នេរខ្សាច់ ​ដែលគ្រោងនឹងបង្កើតនេះ​ នឹងមានទំហំ៥ហិកតា និង​មាន​ការ​រៀបចំ​ឲ្យ​មានជា​សួនកម្សាន្តផ្សេងៗផងដែរ។

ពិធីប្រណាំងទូក អកអំបុក និងសំពះព្រះខែ ក្នុងខេត្តកំពត នឹងត្រូវរៀបចំធ្វើនៅថ្ងៃទី៦-៧-៨ ​ខែវិច្ឆិកា ឆ្នាំ២០២២​ នៅតាម​បណ្តោយឆ្នេរខ្សាច់ដងព្រែកកោះស្មៅ ​ក្នុងឃុំជុំគ្រៀល​ ស្រុកទឹកឈូ ដែល​ទីតាំង​នោះ អាចទទួលអ្នកចូលរួមទស្សនាបានប្រមាណ៤ម៉ឺននាក់ឡើង។

ក្នុងពិធីនោះ​ ក៏​មានការប្រណាំងទូកង ១២គូ ​ការសំដែងសិល្បៈ ​ការ​បង្ហាញ​ក្បាច់​គុនល្បុក្កតោ ពិព័រណ៍​ភូមិមួយផលិផលមួយ ​ការប្រគុំតន្ត្រី ​បាញ់កាំជ្រួច​ ម៉ូតូហោះលើអាកាស និងល្បែង​កម្សាន្ត​ផ្សេងៗ​ជាច្រើនទៀត​ ដើម្បីបង្កភាពសប្បាយ​ដល់ភ្ញៀវទេសចរ ​និងប្រជាពលរដ្ឋ៕ អត្ថបទ៖ អន សារឹម