ភ្នំពេញ៖ នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ បានបន្តក្រើន​រំលឹក​ដល់មន្រ្តីនគរ បាលគ្រប់អង្គភាពទាំងអស់ត្រូវខិតខំឲ្យបានសកម្មបន្ថែមទៀត ក្នុងកិច្ចការពារ​សន្តិសុខ សណ្តាប់ធ្នាប់ សាធារណៈ ជាពិសេសទប់ស្កាត់ បង្ការរាល់បទល្មើសផ្សេងដូចជាបញ្ហា​គ្រៀងញៀន​ អំពើឆក់ប្លន់ជាដើម។

ថ្លែងនៅក្នុងឱកាសអញ្ជើញប្រកាសចូលកាន់តំណែង ​នាយកមន្ទីរប្រឆាំងបទល្មើសគ្រឿងញៀន និងប្រធាននាយកដ្ឋានកណ្ដាលសណ្ដាប់ធ្នាប់សាធារណៈ ​នៃអគ្គស្នងការដ្ឋាននគរបាលជាតិ នាព្រឹកថ្ងៃទី ២៦ ខែតុលា ឆ្នាំ២០២២នេះ នាយឧត្តមសេនីយ៍ នេត សាវឿន ​បានលើកឡើងថា ប្រធាន​អង្គភាពដែលទើបប្រកាស​ចូលកាន់តំណែងនេះត្រូវ​ពង្រឹងលើកិច្ចការងារភារកិច្ច​របស់ខ្លួន​ដែល​រាជរដ្ឋាភិបាលប្រគល់ជូន និងរក្សាសាមគ្គីភាពផ្ទៃក្នុងអង្គភាព ​សំដៅចូលរួមទប់ស្កាត់ បង្ការ បង្ក្រាប ​និងរក្សាសន្ដិសុខ ​សណ្ដាប់ធ្នាប់សាធារណៈ។

ជាមួយគ្នានោះដែរ នាយឧត្តមសេនីយ៍ នេត សាវឿន​ ក៏បានណែនាំឲ្យពង្រឹងរបៀបរបបធ្វើការ អាកប្បកិរិយា​កងកម្លាំងរបស់មន្ដ្រីនគរបាលចរាចរណ៍, ពង្រឹងសណ្ដាប់ធ្នាប់តាមដងផ្លូវ ពិសេស​ចិញ្ចើម​ផ្លូវ​ដើម្បីកាត់បន្ថយការកកស្ទះ, ​ពង្រឹងសមត្ថភាព​មន្ដ្រីនគរបាលចរាចរណ៍ ដោយ​បង្កើតឲ្យមានវគ្គបណ្ដុះបណ្ដាល, ហាមដាច់ខាតប្រើប្រាស់​នូវពាក្យសម្ដី​មិនសមរម្យទៅ​កាន់​ប្រជាពលរដ្ឋជាដើម។

ដោយឡែក សម្រាប់នាយកមន្ទីរប្រឆាំងបទល្មើស​គ្រឿងញៀនថ្មី​និង​កម្លាំង​ទាំងអស់តែ​ខិតខំ​បន្ថែម​ទៀតក្នុង​ការ​ប​ង្រ្កាបបទល្មើសគ្រឿងញៀន​ ដោយសារតែកម្លាំងរបស់មន្ទីរជាកម្លាំងថ្នាក់ជាតិ។យ៉ាងណាក៏ដោយ នាយឧត្តមសេនីយ៍ ​ក៏បានថ្លែងនូវការកោតសរសើរកម្លាំងមន្ទីរប្រឆាំងបទល្មើស​គ្រឿងញៀន ​ដែលបានខិតខំបង្ក្រាប ​និងទប់ស្កាត់ការជួញដូរគ្រឿងញៀន ហើយ​រក្សាឲ្យបាននូវ​ចំណុច​ល្អ​ជៀសវាង​នូវ​បាតុភាព​អសកម្ម​ផ្សេងៗ ​ដែល​អាចកើតមាន៕អត្ថបទ៖ បាន ចក់