ភ្នំពេញ៖ មន្ទីរពេទ្យកាល់ម៉ែត សម្ពោធដាក់ឲ្យប្រើប្រាស់ជាផ្លូវការ ម៉ាស៊ីនថតឆ្លុះសរសៃឈាម Siemens Artis One(ស៊ីមិន អាធីស វ័ន) ជំនាន់ចុងក្រោយ ដើម្បីជំរុញការព្យាបាលអ្នកជំងឺ កាន់តែទំនើប មានប្រសិទ្ធភាពខ្ពស់ ស្របតាមស្តង់ដាអន្តរជាតិ។ ការសម្ពោធ​នេះ​ក្រោម​វត្ត​មាន​ឯកឧត្តម​សាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត នៅព្រឹកថ្ងៃទី២៨ ខែតុលានេះ នា​បរិវេណ​មន្ទីរពេទ្យកាល់ម៉ែត។

បើតាមឯកឧត្តមសាស្ត្រាចារ្យ សុខ ជួរ ប្រធានដេប៉ាតឺម៉ង់មជ្ឈមណ្ឌលព្យាបាលជំងឺបេះដូង ឲ្យ​ដឹង​ថា ម៉ាស៊ីនថតឆ្លុះសរសៃឈាម Siemens Artis One ជំនាន់ចុងក្រោយ មាន​អត្ត​ប្រយោជន៍​ សម្រាប់​ក្រុម​គ្រូពេទ្យសង្គ្រោះអ្នកជំងឺដូចជា ការថតឆ្លុះសរសៃឈាមបេះដូង និងព្យាបាល​ដោយ​ដាក់​រឺស័រ ក្នុងជំងឺស្ទះសរសៃឈាមបេះដូងស្រួចស្រាវ និង រ៉ាំរ៉ៃ ការអន្តរាគមន៍ ក្នុង​ការ​ព្យាបាល​ជំងឺ​បេះដូង​ពី​កំណើត ការអន្តរាគមន៍ ក្នុងការព្យាបាលជំងឺ ស្ទះសរសៃឈាមខួរក្បាលស្រួចស្រាវ អា​ច​ថត​ឆ្លុះ និងព្យាបាលជំងឺត្បៀតសរសៃឈាមសរីរាង្គផ្សេងៗ ការព្យាបាលជំងឺលើសសម្ពាធឈាម ដែល​មិន​អាចគ្រប់គ្រងបានដោយថ្នាំការវាយតម្លៃ និងវាស់សម្ពាធឈាមក្នុងបេះដូង សរសៃ​ឈាម​អាក់​អរ សរសៃឈាមសួត ដើម្បីកំណត់ដំណាក់កាល និងពេល​ដែល​ត្រូវ​ព្យាបាល​សំរាប់​ជំងឺ​បេះដូង​ពី​កំណើតមួយចំនួន។

ឯកឧត្តមសាស្ត្រាចារ្យ ឈាង រ៉ា បានថ្លែងថា ម៉ាស៊ីនថតឆ្លុះសរសៃឈាម Siemens Artis One ជំនាន់​ចុង​ក្រោយ នាពេលនេះ និងធ្វើអោយការព្យាបាល ការសង្គ្រោះអ្នកជំងឺកាន់តែលំអិត និង​មាន​ប្រសិទ្ធភាពខ្ពស់បន្ថែមទៀត។ ឯកឧត្តម ក៏បានធ្វើការកោតសរសើរ និងវាយតម្លៃខ្ពស់ ចំពោះ​កិច្ច​ខិតខំប្រឹងប្រែងរបស់ថ្នាក់ដឹកនាំគ្រប់ផ្នែក នៃមន្ទីរពេទ្យកាល់ម៉ែត ក្នុងការលើកស្ទួយ និង​អភិវឌ្ឍន៍​មន្ទីរពេទ្យ ទទួលបានលទ្ធផលដ៏ល្អត្រចះត្រចង់ ក្លាយជា​មន្ទីរពេទ្យ​ឈាន​មុខ​ក្នុង​ប្រទេស។ សមិទ្ធិផលថ្មីនេះ បានឆ្លុះបញ្ចាំងឱ្យឃើញពីសមត្ថភាពដឹកនាំ របស់​សាស្ត្រាចា​រ្យ​ប្រធាន​ដេប៉ាតឺម៉ង់ តាមរយៈកិច្ចខិតខំប្រឹងប្រែងរបស់ក្រុមគ្រូពេទ្យ ក្រុមការងារថែទាំ នៃមជ្ឈ​មណ្ឌល​ព្យាបាល​ជំងឺ​បេះដូងទាំងមូល ដែលបានលះបង់ទាំងកម្លាំងកាយ កម្លាំងចិត្ត យកចិត្តទុក​ដាក់​លើ​ការ​ពិនិត្យ ព្យាបាល អ្នកជំងឺ ព្រមទាំងធ្វើនវានុវត្តន៍បច្ចេកទេសវេជ្ជសាស្ត្រថ្មីៗ ដើម្បីធ្វើ​ឱ្យ​កាន់​តែ​ប្រសើរ​ឡើង​នូវការផ្តល់សេវាពិនិត្យ ព្យាបាល បែបទំនើប មានគុណភាពខ្ពស់ និងមានប្រសិទ្ធភាព​ខ្ពស់ ដោយផ្តល់ទំនុកចិត្តកាន់តែខ្ពស់បន្ថែម ជូនដល់ប្រជាពលរដ្ឋ។

ឯកឧត្តមសាស្រ្តាចារ្យ ឈាង រ៉ា បានថ្លែងអំណរគុណចំពោះក្រុមហ៊ុន យូនីក មេឌីខល ឌីស្រី្ទប៊្យូសិន ខូអិលធីឌី (Unique Medical Distribution Co.,Ltd.) ដែលបាន​សហការ​ជា​មួយ​ក្រុមហ៊ុន មេដត្រូនិក អ៊ិនធើណេសិនណល (Medtronic International) ដែល​បាន​ផ្តល់​ជំនួយ​នូវ​ម៉ាស៊ីន​ថតឆ្លុះសរសៃឈាម បន្ថែមថ្មីនាពេលនេះជាលើកទី២ ដែលមានតម្លៃសរុប 600,000USD (ប្រាំមួយរយពាន់ដុល្លារអាមេរិក) ព្រមទាំង​បាន​បញ្ជូន​អ្នក​ជំនាញ​មក​ជួយ​បង្ហាត់​បង្ហាញ បណ្តុះបណ្តាលនៅកន្លែងផ្ទាល់ និងគាំទ្រ​ឱ្យ​គ្រូពេទ្យ​ឯក​ទេស​មន្ទីរពេទ្យ​ទៅ​សិក្សា​បន្ថែម​នៅ​ក្រៅប្រ​ទេស ដែលសបញ្ជាក់ឱ្យឃើញនូវទឹកចិត្តចូលរួមជួយអភិវឌ្ឍន៍ វិស័យសុខាភិបាល ដែល​ស្រប​តាមគោលនយោបាយរបស់ក្រសួងសុខាភិបាល និងរាជរដ្ឋាភិបាលកម្ពុជា ក្រោម​ការ​ដឹកនាំ​ដ៏ឈ្លាសវៃប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាលសម្តេច តែងតែ​យក​ចិត្ដ​ទុក​ដាក់​គិតគូរ​ជួយ​ឧបត្ថម្ភគាំទ្រ និងផ្ដល់អាទិភាពដល់វិស័យសុខាភិបាល៕ អត្ថបទ៖ រដ្ឋា