ភ្នំពេញ ៖ ក្រុមហ៊ុនជប៉ុន URATA (CAMBODIA) CO., LTD ជាក្រុមហ៊ុនបរទេសដំបូងគេមួយដែលរាជរដ្ឋាភិបាលកម្ពុជា តាមរយៈក្រសួងរៀបចំដែនដី នគរូបនីយកម្ម និងសំណង់ សម្រេចផ្ដល់អាជ្ញាប័ណ្ណត្រួតពិនិត្យ និងបញ្ជាក់សំណង់ទូទៅកម្រិត១ នៅក្នុងប្រទេសកម្ពុជា។ ពិធីផ្ដល់អាជ្ញាប័ណ្ណ ធ្វើឡើងសម្របពេលសម្ពោធក្រុមហ៊ុនដែលបានរៀបចំធ្វើនៅ​ក្រសួងរៀបចំដែនដីនគរូបនីយកម្ម និងសំណង់ នាព្រឹកថ្ងៃទី ២៨ ខែតុលា ឆ្នាំ ២០២២។

លោក URATA Kazuya ប្រធានក្រុមហ៊ុន URATA (CAMBODIA) CO., LTD. បានថ្លែងថា ក្នុងនាមជាក្រុមហ៊ុនបរទេសទី១ ដែលបានទទួលអាជ្ញាប័ណ្ណត្រួតពិនិត្យ និងបញ្ជាក់សំណង់ទូទៅកម្រិត១ គឺជាការទាមទារក្នុងការផ្លាស់ប្តូរបច្ចេកទេស​សំណង់របស់ជប៉ុន។ លោកបន្តថា ក្រុមហ៊ុនរបស់លោកមានទំនួលខុសត្រូវខ្ពស់ ក្នុងការផ្តល់សេវាកម្មត្រួតពិនិត្យ និងបញ្ជាក់សំណង់ និងជួយបច្ចេកទេសសាងសង់របស់ប្រទេសកម្ពុជាអោយមានភាពរីកចម្រើន ដើម្បីការពារ សុខមាលភាព, ទ្រព្យសម្បត្តិ, និងធានានូវគុណភាព សុវត្ថិភាពរបស់សំណង់។ ព្រមទាំងជួយគាំទ្រលើការអភិវឌ្ឍន៍លើបច្ចេកទេសសាងសង់នៅក្នុងប្រទេសកម្ពុជា និងបានអនុវត្តទៅលើ SDGs ដែលដាក់ចេញដោយអង្គការសហប្រជាជាតិ ដើម្បីដោះស្រាយបញ្ហាសង្គមទូទាំងពិភពលោក ហើយដើម្បីធានាថា បច្ចេកទេសសំណង់នៅកម្ពុជា អាចអភិវឌ្ឍន៍បានត្រឹមត្រូវស្របតាមច្បាប់។

ឯកឧត្តម MIKAMI Masahiro ឯកអគ្គរាជទូតវិសាមញ្ញ និងពេញសមត្ថភាពជប៉ុន ប្រចាំព្រះរាជាណាចក្រកម្ពុជា បានមាន​ប្រសាសន៍​បន្តថា អាជ្ញាប័ណ្ណត្រួតពិនិត្យ និងបញ្ជាក់សំនង់ គឺជាផ្នែកមួយនៃច្បាប់សំណង់ឆ្នាំ២០១៩ ពួកយើងសប្បាយរីករាយ​ដែលពួកយើង​បានដើរតាមច្បាប់។ ឯកឧត្តមបានបន្តទៀតថា រដ្ឋាភិបាលជប៉ុនកំពុង​តែជួយផ្នែកបច្ចេកទេសដល់ក្រសួងរៀបចំដែនដី នគរូបនីយកម្ម និងសំណង់ ដែលជាផ្នែកនៃការប្តេជ្ញា៣ឆ្នាំ ដែលចាប់ផ្តើមកាលពីឆ្នាំ២០២០។ ការប្រឹងប្រែងនេះ គឺដើម្បីអភិវឌ្ឍន៍ និងកំណត់ស្តង់ដារ​នៅក្នុងច្បាប់សំណង់។ នៅក្នុងឆ្នាំចុងក្រោយនេះ យើងមានគម្រោងក្នុងការ បញ្ចប់ក្នុងការងារ​ពង្រាងស្តង់ដារ​សំណង់។

ក្នុងឱកាសនោះដែរ ឯកឧត្តម ថេង ច័ន្ទសង្វារ រដ្ឋលេខាធិកាក្រសួងរៀបចំដែន ដី នគរូបនីយកម្ម និងសំណង់ បានថ្លែង​សរសើរដល់​ក្រុមហ៊ុន URATA ដែលបានបង្ហាញនូវការជឿជាក់ដល់សេដ្ឋកិច្ចរបស់កម្ពុជា។ ឯកឧត្តមបានបន្តថា ក្រោមកិច្ចសហការរបស់ ក្រសួងដែនដី នគរូបនីយកម្ម ទេសចរណ៍ និងសាធារណការជប៉ុន និងក្រសួងដែនដីរបស់ព្រះរាជាណាចក្រកម្ពុជា ច្បាប់សំណង់​ត្រូវបានអនុម័តក្នុងឆ្នាំ២០១៩។ ក្នុងច្បាប់សំណង់នេះ ការងារត្រួតពិនិត្យ និងបញ្ជាក់សំណង់ មានតួនាទីធ្វើអោយ​សំណង់មានភាព​ត្រឹមត្រូវតាមច្បាប់ និងបទដ្ឋានបច្ចេកទេស ដើម្បីធានាបាននូវគុណភាព សុវត្ថិភាព ការពារទ្រព្យសម្បត្តិ និងសុខមាលភាព​របស់ម្ចាស់សំណង់ អ្នកប្រើប្រាស់សំណង់ និងសាធារណជន។ជាមួយគ្នានេះឯកឧត្តមក៏បានថែ្លងអំណរគុណដល់ការគាំទ្រពីសំណាក់រដ្ឋាភិបាល និងប្រជាជនជប៉ុន មកដល់ប្រទេសកម្ពុជា​ជា​ច្រើនវិស័យ ដូចជាហេដ្ឋារចនាសម្ព័ន្ធ ផ្លូវថ្នល់ ស្ពាន ប្រព័ន្ធធារាសាស្ត្រ ទឹកស្អាត និងការបង្វឹកដល់សិស្ស និងមន្ត្រីរាជការ៕ អត្ថបទ ៖ សុជាតា