គុនចម្រុះ៖ ​កីឡា​ការិនី​ខ្មែរ​-​អាមេរិក អែម សុ​វណ្ណា​រី បាន​រង​របួស​ស្មា​ទៅ​ហើយ អំឡុង​ពេល​នាង​ហ្វឹកហាត់​ដើម្បី​ត្រៀម​ជំនួប​ដ៏​ធំ​លើស​ង្វៀន ONE Championships ជាមួយ​កីឡា​ការិនី​ជើង​ខ្លាំង​អាមេរិក Colbey Northcutt ក្នុង​ព្រឹត្តិការណ៍ ONE: TNT IV នា​ថ្ងៃ​ទី​២៨ ខែ​មេសា ឆ្នាំ​២០២១ ខាងមុខ។​

​អ្នកលេង​គុន​ចម្រុះ​រូប​នេះបាន​បញ្ជាក់​លើ​បណ្ដាញ​សង្គម​របស់​ខ្លួន​ថា នាង​បាន​រង​របួស​អំឡុង​ពេល​ហ្វឹកហាត់​កាលពី​ម្សិលមិញ ដែល​បង្ខំ​ឲ្យ​នាង​ត្រូវ​ផ្អាក​ការ​ហ្វឹក​ហាត់​ភ្លាមៗ។ ទន្ទឹម​ជាមួយគ្នា នាង​បាន​អរគុណ​មិត្តភ័ក្ដិ និង​ពេទ្យ​នៅ​កន្លែង​ហ្វឹកហាត់​ដែល​បាន​ជួយ​សម្រួល​ភ្លាមៗ បន្ទាប់ពី​នាងរង​របួស​ផង​ដែរ។​ ​យ៉ាងណាមិញ សុ​វណ្ណា​រី មិនបាន​លម្អិត​នូវ​ស្ថានភាព​របួស​របស់​ខ្លួនអាច​បង្ក​ផល​ប៉ះពាល់ ឬ​ធ្វើ​ឲ្យ​ខកខាន​ឡើង​សង្វៀន​ប្រកួត​ជាមួយ​កីឡា​ការិនី​អាមេរិក Colbey Northcutt លើស​ង្វៀន ONE នា​ចុងខែ​នេះ​នោះ​ទេ គ្រាន់តែ​នាង​បញ្ជាក់​ថា នឹង​ធ្វើ​បច្ចុប្បន្នភាពបន្ទាប់ពី​របួស​បាន​ធូរស្បើយ និង​អាច​ចូល​ហ្វឹកហាត់​វិញ​បាន។​ ​សូម​បញ្ជាក់​ថា ក្រោយ​ផ្ដួល​កីឡា​ការិនី​កូរ៉េខាងត្បូង Choi Jeong Yun ត្រឹម​ទឹក​ទី​២ កាលពី​ចុងខែ​មករា អែម សុ​វណ្ណា​រី ត្រូវ​បាន​ផ្គូផ្គង​ឲ្យ​ប៉ះ​កីឡា​ការិនី​អាមេរិក Colbey Northcutt វិញ​ម្ដង បន្ទាន់​ពី​គណៈ​កម្មការ​សម្លឹង​ឃើញ​សមត្ថភាព​អ្នក​ទាំង២ ​ប្រហាក់​ប្រហែល​គ្នា តែ​សោកស្ដាយ ខណៈ​ការប្រកួត​សល់​ពេល​ត្រឹម ១៥​ថ្ងៃនាង​បែរជា​ជួប​បញ្ហា​របួស​បែបនេះ។​

​គួរ​ដឹង​ថា អែម សុវណ្ណារ៉ា គឺជា​កីឡា​ការិនី​កូន​ខ្មែរ​កើត​នៅ​អាមេរិក ដែល​មាន​ឪពុកម្ដាយ​សុទ្ធតែ​ជន​ជាតិ​ខ្មែរ។ កីឡា​ការិនី​រហស្សនាម The Sweet Savage នេះមាន​បទពិសោធន៍​លើស​ង្វៀន ONE Championship ៣​ដង ឈ្នះ២ និង​ចាញ់១។ សម្រាប់​ជ័យជម្នះ​លើក​ទី​១ នាង​បាន​ផ្ដួល​កីឡា​ការិនី​អ៊ុយ​ក្រែ​ន Iryna Kyselova ត្រឹម​ទឹក​ទី​១ កាលពី​ឆ្នាំ​២០១៨ និង​ជ័យជម្នះ​លើក​ទី​២ គឺ​ផ្ដួល​កីឡា​ការិនី​កូរ៉េ Choi Jeong Yun កាលពី​ចុងខែ​មករា​កន្លងទៅ៕

​អត្ថបទ៖ លី ឈុន​ឡា