កណ្ដាល៖ បណ្តាអាជ្ញាធរមូលដ្ឋាននៅខេត្តកណ្តាល បានបង្កើនការចុះជូនដំណឹងពលរដ្ឋតាមខ្នងផ្ទះ ជម្រុញពលរដ្ឋគ្រប់អាយុ ១៨ឆ្នាំត្រូវទៅចុះឈ្មោះបោះឆ្នោតនៅតាមឃុំសង្កាត់ ខណៈការត្រួត​ពិនិត្យ​បញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ ​ប្រព្រឹត្តទៅតាមសាលាឃុំសង្កាត់ចាប់ពីថ្ងៃទី២០ ខែតុលា រហូតដល់ថ្ងៃទី៨ ខែធ្នូឆ្នាំ២០២២នេះ។

លោក គីម ម៉េង អាជ្ញាធរភូមិព្រែកសំរោង សង្កាត់តាខ្មៅ ក្រុងតាខ្មៅខេត្តកណ្តាល បានថ្លែងប្រាប់​BTV នៅថ្ងៃទី១ខែវិច្ឆិកានេះថា អាជ្ញាធរគ្រប់ភូមិទាំងអស់បាន​ចុះផ្សព្វផ្សាយ​ចាក់មេក្រូបំពងសំលេង​នៅតាមខ្នងផ្ទះតាមភូមិរួចហើយ។ រហូតមកដល់ពេលនេះ មានពលរដ្ឋទើប​គ្រប់អាយុមួយចំនួន​បាន​ទៅចុះឈ្មោះបោះឆ្នោតរួចហើយ ហើយខ្លះទៀត​ នៅមិនទាន់បានទៅចុះឈ្មោះ និងទៅត្រួត​ពិនិត្យ​ផ្ទៀងផ្ទាត់ឈ្មោះរបស់ខ្លួន ​នៅក្នុងបញ្ជីឈ្មោះបោះឆ្នោត។

ពលរដ្ឋថ្លែងថា ការយឺតយ៉ាវ ​ការទៅត្រួតពិនិត្យឈ្មោះ​ និងចុះឈ្មោះបោះឆ្នោត គឺដោយសារគេជាប់​រវល់ការងារ ហើយខ្លះទៀត ​មិនទាន់បានធ្វើអត្តសញ្ញាណបណ្ណសញ្ជាតិខ្មែរ។

ប្រធានការិយាល័យចុះឈ្មោះឆ្នោតសង្កាត់តាខ្មៅ លោក ព្រីង ថុន បានថ្លែងថា ក្នុងរយៈពេល​១២ថ្ងៃនេះ ​ការិយាល័យបានទទួលពលរដ្ឋគ្រប់អាយុ១៨ឆ្នាំជាច្រើន​មកចុះឈ្មោះបោះឆ្នោត ក្នុងនោះ មន្ត្រី បានផ្តល់ការសម្របសម្រួលតាមនីតិវិធី គ.ជ.ប ជាច្រើនទៀតជូនពលរដ្ឋដូចជាការ​ស្នើសុំ​ផ្លាស់ប្តូរ​ទីតាំងបោះឆ្នោត ​ខ្លះមាន​អត្តសញ្ញាណ​បណ្ណ​ហួសសុពលភាព និង​ខ្លះ​បាត់​អត្តសញ្ញាណ​បណ្ណ​ជាដើម ដោយ​ធ្វើយ៉ាងណាឲ្យគាត់ទទួលបានសិទ្ធចូលរួមបោះឆ្នោត​និងជិតមូលដ្ឋាន​គាត់។

សូមបញ្ជាក់ថា ​ដំណើរការត្រួតពិនិត្យឈ្មោះ ​និងការចុះឈ្មោះបោះឆ្នោតឆ្នាំ២០២២ ក្នុងរយៈពេល​១១ថ្ងៃដំបូង គ.ជ.ប បានទទួលពលរដ្ឋចុះឈ្មោះបោះឆ្នោតថ្មី មានចំនួនជាង ​១៥ម៉ឺននាក់ ឈ្មោះ​ដែល​ត្រូវលុបចេញពីបញ្ជីឈ្មោះឆ្នោតមានជាង ៩ម៉ឺននាក់ អ្នកកែតម្រូវទិន្នន័យមានជាង ១ម៉ឺននាក់ និងអ្នកផ្ទេរទីលំនៅមានជិត៥ម៉ឺននាក់៕ អត្ថបទ៖ ស៊ុមសុខជា