ភ្នំពេញ៖ ក្រសួងសុខាភិបាលបានប្រកាសនៅថ្ងៃនេះថា មនុស្ស ១៨១នាក់ទៀត ត្រូវបានរកឃើញឆ្លងមេរោគកូវីដ១៩ ខណៈអ្នកជំងឺ ៤០នាក់ទៀត ត្រូវបានអនុញ្ញាតឱ្យចាកចេញពីមន្ទីរពេទ្យក្រោយជាសះស្បើយពីជំងឺកូវីដ១៩។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបាននិយាយថា ករណីឆ្លងថ្មីដល់ទៅ ១៧៨នាក់ សុទ្ធតែពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ និង ៣ករណី ជាករណីនាំចូល ដែលត្រូវបានរកឃើញលើអ្នកដំណើរមកពីក្រៅប្រទេស ២នាក់ និងពលករខ្មែរមកពីប្រទេសថៃ ១នាក់។
បើតាមក្រសួងសុខាភិបាល ករណីឆ្លងថ្មីទាំង ១៧៨នាក់ ត្រូវបានរកឃើញនៅរាជធានីភ្នំពេញច្រើនជាងគេរហូតដល់ ១៤០នាក់ បន្ទាប់មកខេត្តស្វាយរៀង ១៤ករណី ខេត្តព្រះសីហនុ ៨ករណី ខេត្តព្រៃវែង ៦ករណី ខេត្តសៀមរាប ៤ករណី ខេត្តកណ្ដាល ៣ករណី និង ១ករណីៗនៅខេត្តព្រះវិហារ និងសៀមរាប។
គិតមកដល់ថ្ងៃនេះ កម្ពុជារកឃើញមនុស្សសរុបដល់ទៅ ៤ ៦៩៦នាក់ហើយបានឆ្លងមេរោគកូវីដ១៩នៅទូទាំងប្រទេសគិតចាប់តាំងពីចុងខែមករាឆ្នាំមុនមក ក្នុងនោះអ្នកឆ្លងពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ មានរហូតដល់ទៅ ៤ ១៦០ករណី។
ក្រសួងសុខាភិបាលក៏បានប្រកាសផងដែរថា អ្នកជំងឺកូវីដ១៩សរុប ២ ២៥២នាក់ហើយ ត្រូវបានព្យាបាលជាសះស្បើយ ក្នុងនោះមានទាំងករណីជាសះស្បើយថ្មី ៤០នាក់ទៀត ដែលត្រូវបានប្រកាសប្រកាសនៅថ្ងៃនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
