កំពង់ស្ពឺ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស សហការណ៍ជាមួយអាជ្ញាធរមូលដ្ឋាន នៅថ្ងៃទី៥-៦ ខែវិច្ឆិកាឆ្នាំ២០២២ បានរៀបចំទីតាំងចាក់វ៉ាក់សាំងបង្ការជំងឺកូវីដ-១៩ និងពិនិត្យសុខភាព ជូនប្រជាពលរដ្ឋ ស្ថិតក្នុងវត្តចំប៉ាចារ៍ ស្រុកគងពិសី ខេត្តកំពង់ស្ពឺ។

ការរៀបចំទីតាំងចាក់វ៉ាក់សាំង និងពិនិត្យសុខភាព ក្នុងវត្តនាពេលនេះធ្វើឡើង ស្របពេលដែលលោកជំទាវវេជ្ជបណ្ឌិត ឱ វណ្ណឌីន និងក្រុមគ្រួសារ ផ្តួចផ្តើមរៀបចំពិធីបុណ្យកឋិនទាន។

នៅឱកាសនោះ លោកជំទាវវេជ្ជបណ្ឌិតឱ វណ្ណឌីន មានប្រសាសន៍ បើទោះបីបច្ចុប្បន្នស្ថានភាពជំងឺកូវីដ-១៩ នៅប្រទេសកម្ពុជា មានភាពធូស្រាលក្តី តែប្រជាពលរដ្ឋមិនត្រូវធ្វេសប្រហែសនោះទេ ជាពិសេសក្នុងឱកាសពិធីបុណ្យអុំទូកនៅពេលខាងមុខ។ ក្រៅពីនេះ លោកជំទាវ បន្តអំពាវនាវដល់ប្រជាពលរដ្ឋ ត្រូវទៅទទួលការវ៉ាក់សាំងបង្ការជំងឺកូវីដ-១៩ ដូសជំរុញទី៣ ទី៤ និងទី៥ ឱ្យបានគ្រប់ៗគ្នា ដើម្បីរក្សាបាននូវភាពស៊ាំបុគ្គល និងភាពស៊ាំសហគមន៍ ធានាបាននូវនិរន៍ភាព នៃការរស់នៅប្រចាំថ្ងៃក្នុងប្រក្រតីភាពថ្មីរបស់បងប្អូនបានយូរអង្វែងតទៅ។

 ប្រជាពលរដ្ឋមកទទួលការចាក់វ៉ាក់សាំងកូវីដ-១៩ បានលើកឡើងដែរថា បន្ទាប់ពីចាក់វ៉ាក់សាំងដូសជំរុញរួចសុខភាពធម្មតា កាត់បន្ថយការឆ្លងជំងឺកូវីដ-១៩ និងមិនចង់ឲ្យប្រទេសកម្ពុជាវិលទៅរកការឆ្លងជំងឺកូវីដ-១៩ ដូចកាលឆ្នាំមុននោះទេ។ លើសពីនេះ ពួកគាត់បានអរគុណដល់រាជរដ្ឋាភិបាល ដែលស្វះស្វែងចាក់វ៉ាក់សាំងជូនប្រជាពលរដ្ឋដោយឥតគិតថ្លៃ។

ការចាក់វ៉ាក់សាំង និងពិនិត្យព្យាបាលជំងឺជូនប្រជាជន កំឡុងពេលធ្វេីកឋិនទានស្ថិតនៅទីតាំងវត្តចំប៉ាចារ៍ ស្ថិតក្នុងភូមិសំរោង ឃុំអង្គពពេល ស្រុកគងពិសី ខេត្តកំពង់ស្ពឺ នាថ្ងៃទី៥-៦ ខែវិច្ឆិកា ឆ្នាំ២០២២ បានចាក់វ៉ាក់សាំងកូវីដ-១៩ ចំនួនសរុប ១០៨ នាក់ និងពិនិត្យព្យាបាលជំងឺសរុបបានចំនួន ៣៤១នាក់ ដោយប្រេីប្រាស់ឱសថដែលជាសទ្ធាជ្រះថ្លាផ្តល់ដោយលោកជំទាវវេជ្ជបណ្ឌិត ឱ វណ្ណឌីន ជាម្ចាស់ដេីមបុណ្យកឋិនទាននេះផ្ទាល់ ទទួលបានពីសប្បុរសជនដែលចូលរួមចាប់មគ្គផលបុណ្យពីអង្គកឋិនទាននេះ។

បច្ចុប្បន្នការចាក់វ៉ាក់សាំងបង្កាជំងឺកូវីដ-19 ត្រូវបានរាជរដ្ឋាភិបាល បន្តចាត់ទុកជាយុទ្ធសាស្រ្តដ៍សំខាន់មួយ ដើម្បីធានានិរន្តរភាព សេដ្ឋកិច្ច និងការរស់នៅជាធម្មតា តាមបែបគន្លថ្មី ជាមួយជំងឺកូវីដ-១៩។ អត្ថបទ៖ទូច សោភ័ណ