សៀមរាប៖ ភ្ញៀវទេសចរជាតិ និងអន្ដរជាតិ ប្រមាណជាង៩ម៉ឺននាក់ បានដើរកម្សាន្តតាមរមណីយដ្ឋាននានាក្នុងខេត្តសៀមរាប នាពិធីបុណ្យអុំទូកអកអំបុក និងសំព្រះខែកាលពីថ្ងៃទី៧ ខែវិច្ឆិកា ឆ្នាំ២០២២នេះ។

របាយការណ៍របស់លោក ង៉ូវ សេងកាក់ ប្រធានមន្ទីរទេសចរណ៍ខេត្ដសៀមរាប បានឱ្យដឹងថា មានទេ សចរជាតិ និងបងប្អូន​ប្រជាពលរដ្ឋក្នុងខេត្ត ប្រមាណ ៨៧.០០០ នាក់ ដែលធ្វើដំណើរកម្សាន្តជាលក្ខណៈគ្រួសារ។ ពួកគាត់ដើរកំសាន្ដទៅកាន់រមណីយដ្ឋាមួយចំនួនដូចជា រមណីយដ្ឋានអង្គរមានចំនួនប្រមាណ ៦៣.៦០០ នាក់ រមណីយដ្ឋានឧទ្យានជាតិភ្នំគូលែនមានចំនួប្រមាណ ៨.៤០០ នាក់ តំបន់ទន្លេសាបមានចំនួនប្រមាណ ១.៦០០ នាក់។ សហគមន៍ទេសចរណ៍-អេកូទេសចរណ៍ និងតំបន់ផ្សេងៗមានចំនួនប្រមាណ ១៣.៤០០ នាក់។ របាយការណ៍ដដែលបន្ដថា ក្នុងចំណោមភ្ញៀវទេសចរជាង៩ម៉ឺននាក់នោះ មានភ្ញៀវទេសចរបរទេសផ្ទៃក្នុងចំនួន ៥.៨១៧ នាក់។ 

ក្នុងឱកាសព្រះរាជពិធីបុណ្យអ៊ំទូក តាមការចុះពិនិត្យតាមបណ្តាសេវាស្នាក់នៅក្នុងក្រុងសៀមរាប មកដល់ពេលនេះ បានកក់បន្ទប់ពេញអស់ហើយ។ លោកបន្ដថា កន្លែងទេសចរណ៍ដែលទាក់ទាញអ្នកភ្នំពេញ និងតាមបណ្តាខេត្តខ្លាំង ពួកគាត់ទៅទស្សនាផលិតផលទេសចរណ៍ Angkor Wildlife and Aquarium តាមគោលដៅទេសចរណ៍តំបន់អង្គរ តាមសហគមន៍ទេសចរណ៍ ពេលយប់នៅតំបន់ Pub Street ផងដែរ៕ អត្ថបទ៖ ឈិត សាវី