​វាយ​កូន​បាល់៖ ​ព្រឹត្តិការណ៍​វាយ​កូន​បាល់​តំណាង​ឲ្យ​ប្រទេស Davis Cup ឆ្នាំ២០២១ នេះ​នឹង​រៀបចំ​នៅ ​៣ទីក្រុង ៣ប្រទេស​រួមមាន​ទីក្រុង Innsbruck ប្រទេស​អូទ្រីស, ទីក្រុង Turin ប្រទេស​អ៊ីតាលី និងទីក្រុង Madrid ប្រទេស​អេ​ស្ប៉ា​ញ ដែល​នឹង​ចាប់ផ្ដើម​ពី​ថ្ងៃ​ទី២៥ ខែ​វិច្ឆិកា​ដល់​ថ្ងៃទី៥ ខែ​ធ្នូ​។​

​​Davis Cup ឆ្នាំ​២០២០ កន្លងទៅ​ត្រូវ​បាន​លុបចោល ​ដោយសារ​មេរោគ​រាតត្បាត Covid-19 ខណៈ ១៨ ប្រទេស​ដែល​មាន​ឈ្មោះ​មិនបាន​ប្រកួត​ឆ្នាំមុន នឹង​ត្រូវ​ប្រកួត​នៅ​ឆ្នាំនេះ​។​ ​សហព័ន្ធ​កីឡា​វាយ​កូន​បាល់​អន្តរជាតិ​បាន​ឲ្យ​​ដឹង​ថា ការប្រកួត​នឹង​មាន​រយៈពេល ១១​ថ្ងៃ មិនមែន ៧​ថ្ងៃ​ដូច​រាល់​ឆ្នាំ​ឡើយ​។ ​​ទីក្រុង​នីមួយៗ​នឹង​ត្រូវ​ទទួល​ការប្រកួត​ចំនួន​ ២ពូ​ល​ដែល​រួមមាន​ទីក្រុង Madrid ប្រទេស​អេ​ស្ប៉ា​ញ​ទទួល​ការ​ប្រកួត​ពូ​ល A មាន​អេ​ស្ប៉ា​ញ រុស្ស៊ី អេ​ក្វា​ដ័​រ និង​ពូ​ល B មាន​កាណាដា កា​ហ្សា​ក់​ស្ថាន និង​ស៊ុយអែត​។ ​ទីក្រុង Innsbruck ប្រទេស​អូទ្រីស​ទទួល​ពូ​ល C រួមមាន​ក្រុម​ចក្រភព​អង់គ្លេស បារាំង ឆេ​ក និង​ពូ​ល F មាន​អូទ្រីស ស៊ែ​ប និង​អាល្លឺម៉ង់​។

​​ចំណែក​ទីក្រុង Turin ប្រទេស​អ៊ីតាលី​ទទួល​ពូ​ល D មាន​អូស្ត្រាលី ក្រូ​អាស៊ី និង​ហុង​គ្រី រួម​ជាមួយ​នឹង​ពូ​ល E មាន​សហរដ្ឋ​អាមេរិក អ៊ីតាលី និង​កូ​ឡុំ​ប៊ី​។ ​នៅ​វគ្គ ៨​ក្រុម​ចុងក្រោយ ២​ប្រកួត​ធ្វើ​នៅ​ទីក្រុង Innsbruck និងទីក្រុង Turin ក្រៅ​ពី​នោះ​វគ្គ ៨​ក្រុម​ចុង​ក្រោយ​ ២ប្រកួត​ទៀត​ធ្វើ​នៅទីក្រុង Madrid ប្រទេសអេ​ស្ប៉ា​ញ បូករួម​ទាំង​វគ្គ​ពាក់កណ្ដាល​ផ្ដាច់ព្រ័ត្រ និង​ផ្ដាច់ព្រ័ត្រ​ផង​ដែរ​នៅ​ថ្ងៃ​ទី​៥ ខែ​ធ្នូ ឆ្នាំ​២០២១​៕

​អត្ថបទ​៖​នាង សុភា​វុ​ធ