ភ្នំពេញ៖ យុវជនអាស៊ាន មកពីប្រទេសជាសមាជិកអាស៊ាន ទាំង១០ បានចំណាយពេលពេញ​មួយ​ព្រឹក សម្រាប់ទស្សនកិច្ចរាជធានីភ្នំពេញ។ ទស្សនកិច្ចនេះ ធ្វើឡើងមុនជំនួបជាមួយថ្នាក់ដឹកនាំ​អាស៊ាន​ចូល​មកដល់នៅរសៀលនេះ។

យុវជនអាស៊ាន ចំនួន២០រូប ជាតំណាងប្រទេសសមាជិកអាស៊ានទាំង ១០ប្រទេស បានធ្វើ​ទស្សនកិច្ច​ពេញមួយព្រឹកនៅរាជធានីភ្នំពេញ នៅថ្ងៃទី ១០​វិច្ឆិកា ឆ្នាំ២០២២នេះ។

ទស្សនកិច្ចនេះ ​ចាប់ផ្ដើមទស្សនា​ សួនច្បារនៅវិមានឯករាជ្យ ​មណ្ឌបព្រះបរមរតនកោដ្ឋ ព្រះបរមរាជវាំង ​សារមន្ទីរឥសានវរ្ម័ន​ និងផ្សារធំថ្មី។

កំឡុងពេលទស្សនកិច្ចរាជធានីភ្នំពេញនេះ ពួកគេជាយុវជន បង្ហាញនូវភាពរីករាយដែល​បានចូលរួម​ជាមួយកម្មវិធីអាស៊ាន។ ពួកគេបន្តថា​ នេះជាកម្មវិធីអស្ចារ្យ ដែលពួកគេជាយុវជនមានឱកាស​ជួប​ជាមួយថ្នាក់​ដឹកនាំអាស៊ាន​ដោយផ្ទាល់នៅរសៀលនេះ។ ​ជាពិសេសនេះជាឆ្នាំយុវជនអាស៊ាន ដែលបង្ហាញ​សារៈសំខាន់របស់យុវជន សម្រាប់ការរីកចំរើនរបស់ជាតិសាសន៍នីមួយៗ។

បន្ទាប់ពីបញ្ចប់ទស្សនកិច្ច​ យុវជនអាស៊ានទាំង ២០ រូប ក៏នឹងមានជំនួបជាមួយថ្នាក់ដឹកនាំអាស៊ាន​ដោយ​ផ្ទាល់ផងដែរ នៅរសៀលនេះ។ ​ ក្នុងជំនួបជាមួយថ្នាក់ដឹកនាំ ​គឺនឹងមានយុវជនចំនួន ២ រូប គឺ​យុវជនកម្ពុជា ​និងយុវជនមកពីប្រទេស​ឥណ្ឌូនេស៊ី ​ឡើងថ្លែង ជំរាបជូនដល់ថ្នាក់ដឹកនាំ​អាស៊ាន​ផងដែរ៕ អត្ថបទ៖គឹមហុក