ភ្នំពេញ៖ ឯកឧត្តម គង់ ភោគ រដ្ឋលេខាធិការ និងជាអ្នកនាំពាក្យកិច្ចប្រជុំអាស៊ាន បញ្ជាក់ថាការចូលជាសមាជិក នៃសទ្ធិសញ្ញាមិត្តភាព និងកិច្ចសហប្រតិបត្តិការតំបន់អាស៊ីអាគ្នេយ៍ គឺជាសមទ្ធិផលដ៏ធំមួយសម្រាប់អាស៊ាន និងនិយាយដោយឡែកសម្រាប់ កម្ពុជាដែលជាប្រធានប្តូរវេនឆ្នាំនេះ។

ឯកឧត្តម គង់ ភោគ បានថ្លែងថា អាស៊ានជាអង្គការតំបន់ដែលបើកចំហរសម្រាប់កិច្ចសហប្រតិបត្តិការជាមួយបណ្តាប្រទេសនានា ទៅលើវិស័យសេដ្ឋកិច្ច សង្គមកិច្ច វប្បធម៌ជាដើម ហើយបណ្តាប្រទេសទាំងនោះ ក៏អាចក្លាយជាដៃគូយុទ្ធសាស្ត្រគ្រប់ជ្រុងជ្រោយរបស់អាស៊ាន ដូច្នេះ ការបញ្ចូលអ៊ុយក្រែនជាសមាជិក TAC នៅពេលនេះ គឺជាការពង្រីកវិសាលភាពនៃការធ្វើការរួមគ្នាដើម្បីសន្តិភាពនៅក្នុងតំបន់ និង ពិភពលោក។

ការចូលជាសមាជិកTAC របស់អ៊ុយក្រែន ធ្វើឡើងដោយមានវត្តមានរបស់រដ្ឋមន្ត្រីការបរទេស លោក Dmytro Kuleba ជាមួយនឹងបណ្តាមេដឹកនាំអាស៊ានរួមទាំងឯកឧត្តម ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិកម្ពុជា។

គួរកត់សម្គាល់ថា ការបញ្ចូលអ៊ុយក្រែនជាសមាជិកTACពេលនេះ ធ្វើឡើងនាអំឡុងពេលដែលប្រទេសមួយនេះកំពុងរ៉ាំរ៉ៃដោយសង្រ្គាមជាមួយនឹងរុស្ស៊ីតាំងពីខែកុម្ភៈឆ្នាណ២០២២មកម្ល៉េះ ដែលបញ្ហានេះ ទទួលបានការគាំទ្រពីសហគមន៍អាស៊ាននិយាយជារួម និង និយាយដោយឡែកពីកម្ពុជាក្នុងការបោះឆ្នោតនៅអង្គការសហប្រជាជាតិចំនួន៣លើក។

បន្ថែមពីនេះ នៅមុនការចុះហត្ថលេខាមួយសប្តាហ៍ ប្រមុខរដ្ឋអ៊ុយក្រែន ឯកឧត្តម Vlodymir Zelenskyy ក៏បានជួបជាមួយសម្តេចតេជោ ហ៊ុនសែន នាយករដ្ឋមន្ត្រី តាមទូរស័ព្ទដផស្នើសុំសម្តេចតេជោ ហ៊ុន សែន ដើម្បីថ្លែងការណ៍នៅក្នុងកិច្ចប្រជុំកំពូលអាស៊ាន។ ក៏ប៉ុន្តែយ៉ាងណាសំណើរបស់អ៊ុយក្រែន ត្រូវបានបដិសេធដោយអាស៊ាន ដោយសារតែអាស៊ានមានជំហររួមគឺកុងសង់ស៊ីស។

អ៊ុយក្រែនបានក្លាយជាសមាជិកទី៥០នៃសន្ធិសញ្ញាមិត្តភាព និងដៃគូសហប្រតិបត្តិការរបស់អាស៊ាន ខណៈដែលអេស្ប៉ាញដែលត្រូវចូលជាមាជិកទី៥១ បានអវត្តមាន ដោយសារបញ្ហាផ្ទៃក្នុង។ នេះបើតាមការបញ្ជាក់បន្ថែមពី ឯកឧត្តម គង់ ភោគ។

សូមបញ្ជាក់ថា សន្ធិសញ្ញាមិត្តភាព និងសហប្រតិបត្តិការ Treaty of Amity and Cooperation(TAC) បានបង្កើតឡើងនៅថ្ងៃទី២៤ ខែកុម្ភៈ ឆ្នាំ១៩៧៦ ក្នុងកិច្ចប្រជុំកំពូលអាស៊ាននៅកោះបាលី ប្រទេសឥណ្ឌូនេស៊ី ។ TAC មានគោលការណ៍គោរពទៅវិញទៅមកនូវឯករាជ្យ អធិបតេយ្យភាព សមភាព បូរណភាពដែនដី និងអត្តសញ្ញាណជាតិរបស់សមាជិកទាំងអស់ សិទ្ធិរបស់រដ្ឋនីមួយៗក្នុងការរស់នៅរួចផុតពីការជ្រៀតជ្រែក ការធ្វើវិច្ឆេទកម្ម ឬការបង្ខិតបង្ខំពីខាងក្រៅ ការមិនជ្រៀតជ្រែកចូលកិច្ចការផ្ទៃក្នុងរបស់ប្រទេសនីមួយៗ ការដោះស្រាយទំនាស់ ឬជំលោះនានាដោយសន្តិវិធី បោះបង់ចោលការគំរាមកំហែង ឬការប្រើប្រាស់កម្លាំងការសហការគ្នាយ៉ាងល្អរវាងសមាជិកទាំងអស់៕ អត្ថបទ៖ សូដាវណ្ណ​