ភ្នំពេញ ៖ ថ្ងៃទី១៣ ខែវិច្ឆិកា ឆ្នាំ២០២២ នៅព្រលានយន្តហោះអន្តរជាតិភ្នំពេញ ឯកឧត្ដម ទេសរដ្ឋមន្ត្រី លី ធុជ ប្រធានសហព័ន្ធបាល់បោះ​រទេះជនពិការ​កម្ពុជា បានអញ្ជើញទទួលស្វាគមន៍ និងអបអរសាទរចំពោះអត្តពលិកកីឡាការិនីបាល់បោះរទេះជនពិការកម្ពុជា ដែលបានទទួលពានរង្វាន់លេខ១ ពីការចូលរួមប្រកួតបាល់បោះរទេះជនពិការអន្តរជាតិលើកទី១នៅសាធារណរដ្ឋឥណ្ឌា ចាប់ពីថ្ងៃទី០៦-១១ ខែវិច្ឆិកា ឆ្នាំ២០២២។ ពិធីស្វាគមន៍នេះ មានចូលរួមពីតំណាងគណៈកម្មាធិការជាតិប៉ារ៉ាឡាំពិកកម្ពុជា អង្គការ ICRC និងមូលនិធិព្រីនស៍ ផងដែរ។

ឯកឧត្ដម ទេសរដ្ឋមន្ត្រី លី ធុជ បានមានប្រសាសន៍ថា ការប្រកួតនេះ មានប្រទេសចូលរួមចំនួន ០៨ រួមមាន កម្ពុជា ឥណ្ឌា លីបង់ លីប៊ី នេបាល់ ស៊ីរី ហ្កាសា(ILOT) និងបង់ក្លាដេស ទាំងអត្តពលិកបុរស និងនារី ប៉ុន្តែប្រភេទកីឡាបាល់បោះរទេះជនពិការនារី មានបីប្រទេសរួមមាន កម្ពុជា ឥណ្ឌា និងនេប៉ាល់ ដែលបានចូលរួមប៉ុណ្ណោះ។ កីឡាការិនីកម្ពុជា បានទទួលជ័យជម្នះទាំង៥ប្រកួត ដើម្បីឈានដល់ការទទួលពានរង្វាន់លេខ១ ដូចជា ៖

១/. កម្ពុជា ប្រកួតជាមួយ ឥណ្ឌា ដោយលទ្ធផលបន្ទុក កម្ពុជា ៥៨ ទល់នឹង ១៤ ឥណ្ឌា

២/. កម្ពុជា ប្រកួតជាមួយ នេប៉ាល់ ដោយលទ្ធផលបន្ទុក កម្ពុជា ៥៦ ទល់នឹង ២២ នេប៉ាល់

៣/. កម្ពុជា ប្រកួតជាមួយ នេប៉ាល់ ដោយលទ្ធផលបន្ទុក កម្ពុជា ៥០ ទល់នឹង ២៥ នេប៉ាល់

៤/. កម្ពុជា ប្រកួតជាមួយ ឥណ្ឌា ដោយលទ្ធផលបន្ទុក កម្ពុជា ៤៤ ទល់នឹង ២៦ ឥណ្ឌា

៥/. វគ្គផ្តាច់ព្រ័តកម្ពុជា ប្រកួតជាមួយ ឥណ្ឌា ដោយលទ្ធផលបន្ទុក កម្ពុជា ៥៥ ទល់នឹង ១៤ ឥណ្ឌា

ឯកឧត្ដម ទេសរដ្ឋមន្ត្រី លី ធុជ បានលើកឡើងថា នេះគឺជាជ័យជម្នះ បានមកពីកិច្ចខិតខំប្រឹងប្រែងរបស់កីឡាការិនីជាតិរបស់យើង និងការគាំទ្រយ៉ាងពេញទំហឹងពី សម្តេចតេជោ នាយករដ្ឋមន្រ្តី ដែលតែងតែយកចិត្តទុកដាក់ និងលើកកម្ពស់វិស័យកីឡាជាតិកម្ពុជា។ លោកបានវាយតម្លៃខ្ពស់ចំពោះសមត្ថភាពនៃការលេងរបស់កីឡាការិនីជាតិ ទោះបីមានពិការភាពក៏ដោយ ប៉ុន្តែទឹកចិត្ត​និងឆន្ទះ​គឺមុះមុតណាស់ និងមិនពិការឡើយ ព្រមទាំងបានចូលរួមនាំមកនូវកិត្តិយសជូនជាតិមាតុភូមិកម្ពុជា ផងដែរ។

ឯកឧត្ដម ទេសរដ្ឋមន្ត្រី បានបន្តទៀត អាស៊ានប៉ារ៉ាហ្គេមឆ្នាំ២០២៣ គឹជាគោលដៅចំបងរបស់​សហព័ន្ធកីឡាបាល់​បោះរទេះ​ជនពិការកម្ពុជាក្នុងការទទួលយកនូវមេដាយមាស ហើយយើងនឹងបន្តធ្វើការជាមួយគ្រប់ភាគីពាក់ព័ន្ធ ដើម្បីគាំទ្រ និងលើកម្ពស់សមត្ថភាពសម្រាប់ការចូលរួមការប្រកួតនៅក្នុងឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ ៕