ភ្នំពេញ៖ ក្រសួងអប់រំ យុវជន និងកីឡាន ចាប់ផ្ដើមបង្រៀនសាកល្បងភាសាចិន នៅវិទ្យាល័យចំនួន ២០ ក្នុងខេត្តគោលដៅ មួយចំនួន ដោយការបង្រៀនភាសាចិននេះ​ គឺស្របតាម អនុស្សរណៈនៃការយោគយល់គ្នារវាងក្រសួងអប់រំកម្ពុជា ​និងក្រសួងអប់រំរបស់ប្រទេសចិន។

ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា ​បញ្ជាក់ថា ការដាក់សាកល្បង​អនុវត្តកម្មវិធីអប់រំភាសាចិន ​អនុវត្តនៅតាមវិទ្យាល័យចំនួន ២០ នៅក្នុងខេត្ត ២ ទៅ ៣ប៉ុណ្ណោះ។ សម្រាប់កិច្ចការបច្ចេកទេស ​ក្រសួងអប់រំ យុវជន និងកីឡានឹងបង្កើតគណៈកម្មការ ដើម្បីបន្ត​កិច្ចការជា​មួយភាគី ចិន។

អ្នកនាំពាក្យរូបដដែល បញ្ជាក់ថា​ អនុស្សរណៈនៃការយោគយល់គ្នានេះ​មានគោលបំណងលើក​កម្ពស់​ការផ្លាស់ប្ដូររវាងប្រជាជន និងប្រជាជន ​និងពង្រឹងមិត្តភាពរវាងកម្ពុជា និងសាធារណរដ្ឋប្រជាមានិតចិន។

ពាក់ព័ន្ធនឹងការដាក់បង្រៀនភាសាចិន នៅគ្រឹះស្ថានមធ្យមសិក្សា ​លោកបណ្ឌិត គិន ភា ជា​ប្រធានវិទ្យាស្ថានទំនាក់ទំនងអន្តរជាតិ​ នៃរាជបណ្ឌិតសភាកម្ពុជា មើលឃើញថា កម្មវិធីបង្រៀនភាសាចិន​នៅតាមគ្រឹស្ថានសិក្សាសាលារដ្ឋ នឹងផ្តល់ប្រយោជន៍ច្រើន ព្រោះភាសាចិន ជាភាសាសាកលមួយក្នុងចំណោមភាសាសាកលទាំងប្រាំ។

លោកបណ្ឌិតបន្តថា ភាសាចិន ក្នុងពេលច្ចុប្បន្ន ជាភាសាសំខាន់ក្នុងពាណិជ្ជកម្ម ​នយោបាយ សេដ្ឋកិច្ចទំនាក់ទំនងរវាងប្រជាជននិងប្រជាជន។ ​ភាសាចិននឹងធ្វើឱ្យទំនាក់ទំនង កាន់តែស៊ីជម្រៅ និងគ្រប់ជ្រុងជ្រោយ។

ចំពោះសិស្សដែលកំពុងសិក្សានៅកម្រិតមធ្យមសិក្សា ​គាំទ្រ​ពីការបង្រៀនភាសាចិន ដោយ​ជឿជាក់ថា ការរៀនភាសាបរទេសកាន់តែច្រើន ​គឺកាន់តែល្អ​ ហើយការសិក្សាភាសាចិន អាច​មាន​ទីផ្សារការងារច្រើន ​ខណៈមានអ្នកវិនិយោគចិនជាច្រើននៅកម្ពុជា។

ការបង្រៀនភាសាបរទេសបច្ចុប្បន្ន ក្នុងប្រព័ន្ធអប់រំកម្ពុជាគឺ មានដូចជា៖ ​ភាសាអង់គ្លេស មាន​ពីថ្នាក់ទី៤ ដល់ថ្នាក់ទី១២, ភាសាបារាំង មានពីថ្នាក់ទី៤ ដល់ថ្នាក់ទី១២ ​និងភាសាកូរ៉េ បាន​និងកំពុងអនុវត្តសាកល្បងពីថ្នាក់ទី៧ ដល់ថ្នាក់ទី៩ ​នៅវិទ្យាល័យចំនួន០៦ តាមការស្ម័គ្រចិត្ត​រៀន​សូត្ររបស់សិស្សានុសិស្ស ។ នេះយោងតាមក្រសួងអប់រំ៕ អត្ថបទ៖ គឹមហុក