ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន​គណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ ​និងហិរញ្ញប្បទានភេវរកម្ម និង​ហិរញ្ញប្បទានដល់ការរីក សាយភាយអាវុធមហាប្រល័យ ហៅកាថា (គ.ស.ហ) បានរំពឹងថា ក្រុមការងារសកម្មភាពហិរញ្ញវត្ថុ (FATF) ​នឹងដកកម្ពុជាចេញពីបញ្ជីប្រផេះ បន្ទាប់ពីអង្គការនេះ បាន ចុះមកត្រួតពិនិត្យដោយផ្ទាល់នៅកម្ពុជា នាខែមករា ឆ្នាំ២០២៣ ។

ក្នុងឱកាសអញ្ជើញជាអធិបតីក្នុងកិច្ចប្រជុំលើកទី៥ ​គណៈកម្មាធិការសម្របសម្រួល​ថ្នាក់​ជាតិ​ប្រឆាំង​ការ​សម្អាតប្រាក់ ​និងហិរញ្ញប្បទានភេវរកម្ម ​និងហិរញ្ញប្បទាន​ដល់ការរីកសាយភាយ​អាវុធ​មហា​ប្រល័យ​ (គ.ស.ហ) នៅព្រឹកថ្ងៃទី១៧ ខែវិច្ឆិកា នេះ នៅទីស្តីការក្រសួងមហាផ្ទៃ ​សម្ដេចក្រឡាហោម ស ខេង ​បានបញ្ជាក់ថា «ការសម្រេចរបស់FATFឱ្យមានការចុះពិនិត្យផ្ទាល់​ខាងមុខនេះ ជាឱកាស​មាស​ដ៏កម្រ​សម្រាប់កម្ពុជា ​ដើម្បីឈានទៅដកខ្លួនចេញពីបញ្ជីប្រផេះ​ ដែលជាគោលដៅចុងក្រោយ នៃបេសកកម្មរបស់ ​ភាគីទាំងអស់» ។

សម្ដេចក្រឡាហោម បានបបញ្ជាក់ថា ​ការចុះពិនិត្យនេះ ​គឺជាដំណាក់កាលចុងក្រោយ នៅក្នុងក្របខណ្ឌ ​នៃនីតិវិធីរបស់FATF ​មុននឹងសម្រេចដក​កម្ពុជា​ចេញពីបញ្ជីប្រផេះនេះ។

សម្ដេចក្រឡាហោម​ បានបន្ថែមថា​ ដោយសារការដកកម្ពុជាចេញពីបញ្ជីប្រផេះ​ គឺជាកិច្ចការដ៏មាន សារសំខាន់ ​និងជាអាយុជីវិតរបស់ប្រទេសជាតិ ​ទាំងផ្នែកសេដ្ឋកិច្ច ​និងផ្នែកនយោបាយ និង​ដោយសារការ ចុះធ្វើអធិការកិច្ចនេះ ​គឺជាវិញ្ញាសារថ្មីផង ​និង​ស្មុគស្មាញ​ផងសម្រាប់កម្ពុជា ដូច្នេះ​ហើយ​ទើបមានការចាំ ​បាច់ក្នុងការជួបជុំគ្នានៅថ្ងៃនេះ​ ទាំងក្នុងកម្រិតនយោបាយ ទាំងក្នុងកម្រិត​បច្ចេកទេស ដើម្បីរួមគ្នាខិតខំ ​ប្រឹងប្រែងដោះស្រាយបញ្ហាប្រឈមថ្មីនេះ សំដៅត្រៀមលក្ខណៈបាន​ល្អប្រសើរ សម្រាប់កិច្ចការចុងក្រោយ ​ដ៏មានសារសំខាន់នេះ។

សម្ដេចក្រឡាហោម ស ខេង បានបញ្ជាក់បន្ថែមថា «កិច្ចប្រជុំនេះ ធ្វើឡើងក្នុងគោលបំណងដើម្បី វាយតម្លៃអំពីលទ្ធផល ​នៃសេចក្ដីសម្រេចរបស់មហាសន្និបាតក្រុមការងារហិរញ្ញវត្ថុ (FATF) លើ​របាយការណ៍វឌ្ឍនភាពជុំទី១០របស់កម្ពុជា ​និងការដាក់ចេញទិសដៅ​ការងារបន្ត ដើម្បីត្រៀម​លក្ខណៈឱ្យបានល្អ សម្រាប់ការចុះមកពីនិត្យដោយផ្ទាល់ ក្នុងអំឡុងខែមករា ឆ្នាំ២០២៣ សំដៅដកកម្ពុជា​ចេញពីបញ្ជីប្រផេះ របស់FATFនាពេលខាងមុខ»។

សម្ដេចក្រឡាហោម បានរម្លឹកថា នៅក្នុងកិច្ចប្រជុំលើកទី៤ ​កាលពីខែមិថុនា​ ឆ្នាំ២០២២ បន្ទាប់ពី FATF​ បានសម្រេចលើរបាយការណ៍ជុំទី៩របស់កម្ពុជា ​នាពេលកន្លងមក គ្រប់យន្តការពាក់ព័ន្ធ​ទាំងអស់ នៅកម្ពុជា ​បានខិតខំប្រឹងប្រែងក្នុងស្មារតីទទួលខុសត្រូវខ្ពស់ក្នុងការ​អនុវត្តសកម្មភាព​ការងារ ដែលនៅ ​សេសសល់បានកាន់តែល្អ ៕ អត្ថបទ៖ បាន ចក់