សៀមរាប៖ ដើម្បីធានាសន្ដិសុខ សុវត្ថិភាព សណ្ដាប់ធ្នាប់សាធារណៈជូនគណៈប្រតិភូ នៃកិច្ចប្រជុំរដ្ឋ​មន្ដ្រី​ការពារជាតិអាស៊ាន (ADMM Reatreat) និងកិច្ចប្រជុំរដ្ឋមន្ដ្រីការពារជាតិអាស៊ានបូក លើកទី៩ (ADMM Plus) ដែលនឹងប្រព្រឹតទៅចាប់ពីថ្ងៃទី២១ដល់ថ្ងៃទី២៣ ខែវិច្ឆិកានេះ ខេត្ដសៀមរាប ត្រៀមកម្លាំងសមត្ថកិច្ចការពារជាង ២ពាន់នាក់ ។

ឧត្ដមសេនីយ៍ សឿន សេន អ្នកនាំពាក្យស្នងការដ្ឋាននគរបាល ខេត្ដសៀមរាប បានឱ្យដឹងថា ការប្រើប្រាស់​កម្លាំងជាង២ពាន់នាក់នេះ ​គឺមានកម្លាំងនគរបាល ​កម្លាំងអង្គភាពនគបាលបេតិកភណ្ឌ អង្គភាព​នគរបាលទេសចរណ៍ ​និងកម្លាំងកងរាជ​អាវុធហត្ថ​កង​ទ័ពអាកាស កងវរសេនា​តូច​ស៊ើបការណ៍ ​នៃយោធភូមិភាគទី៤ ដោយដាក់នៅតាមគោលចំនួន ​៣២គោលដៅ រួមមាន​ច្រកទ្វារព្រលានយន្ដហោះអន្ដរជាតិសៀមរាប ​និងនៅតាមដងផ្លូវសំខាន់ៗ និងបណ្ដាគោលដៅ​សំខាន់​ជាច្រើនកន្លែងទៀត។

លោក បានបន្ដថា​ កម្លាំងទាំងនេះ ​បានត្រៀមរួចជាស្រេច ទាំង៣២គោលដៅ ​ក្នុងខេត្ដសៀមរាប។

លោកបានអំពាវនាវដល់ប្រជាពលរដ្ឋឱ្យចូលរួមជាមួយកងកម្លាំងសមត្ថកិច្ចគ្រប់ទីតាំង ដើម្បីរក្សា​សណ្ដាប់ធ្នាប់​សាធារណៈ​ សុខសុវត្ថិភាពជូនគណប្រតិភូ ​នៃកិច្ចប្រជុំការពារជាតិអាស៊ាន ដែល​ធ្វើឡើងនៅក្នុងខេត្ដសៀមរាបនេះ។

សមត្ថកិច្ច បានណែនាំដល់អ្នកគ្រប់គ្រងសណ្ឋាគារនានា ដែលនឹងត្រូវប្រើប្រាស់សម្រាប់បម្រើដល់ កិច្ចប្រជុំនេះ ​ឱ្យយកចិត្តទុកដាក់ខ្ពស់ ក្នុងការរៀបចំ ដើម្បីរក្សាបាននូវសណ្តាប់ធ្នាប់ របៀបរៀបរយ និងសុវត្ថិភាព ​សេចក្តីថ្លៃថ្នូរ ​ចៀសវាង​នូវបញ្ហាកើតឡើងជាយថាហេតុ។

កិច្ចប្រជុំរដ្ឋមន្ដ្រីការពារជាតិអាស៊ាន (ADMM Reatreat) និងកិច្ចប្រជុំរដ្ឋមន្ដ្រីការពារជាតិអាស៊ានបូក លើកទី៩ (ADMM Plus) នឹងប្រព្រឹត្តទៅចាប់ពីថ្ងៃទី២១ដល់ថ្ងៃទី២៣ ខែវិច្ឆិកា នេះ ដែលកិច្ចប្រជុំនេះ​នឹង​មានវត្តមានថ្នាក់ដឹកនាំយោធាជាន់ខ្ពស់មកពីបណ្តាប្រទេសក្នុងតំបន់អាស៊ាន បណ្តាប្រទេស​ដៃគូអភិវឌ្ឍន៍ ​និងប្រទេសមហាអំណាចក្នុងពិភពលោកផងដែរ ៕អត្ថបទ៖ ឈិត សាវី