ភ្នំពេញ៖ ឯកឧត្តមបណ្ឌិត ហ៊ុន ម៉ាណែត បានថ្លែងថា វិស័យរោងចក្រកាត់ដេរ នៅ​ក្នុង​ប្រទេស​កម្ពុជា បាន​ផ្ដល់នូវការងារដល់ជាប្រជាពលរដ្ឋប្រមាណជាង ៩០ម៉ឺននាក់ រួមទាំង​បានចូលរួម​ចំណែក​ធ្វើ​ឲ្យសេដ្ឋកិច្ចកម្ពុជាសម្រេចបានរង្វង់ ៧ភាគរយ ក្នុងមួយឆ្នាំ នារយៈពេល​ពីរ​ទសវត្សរ៍​កន្លងមក ។

ក្នុងពិធីប្តូរឈ្មោះរបស់សមាគមរោងចក្រកាត់ដេរនៅកម្ពុជា និងការប្រមូលថវិកា ជួយដល់​គម្រោង​សម្តេចតេជោ​សម្រាប់​សកម្មភាពមីន នៅថ្ងៃទី១៧ ខែវិច្ឆិកា ឆ្នាំ២០២២ ឯកឧត្តមបណ្ឌិត មាន​ប្រសាសន៍​ថា ពិតណាស់ វិស័យកាត់ដេរបានដើរតួនាទីយ៉ាងសំខាន់ ក្នុងការអភិវឌ្ឍសង្គម-សេដ្ឋកិច្ច​កម្ពុជា ចាប់តាំងពីគ្រាដំបូង ដែលប្រទេសកម្ពុជាសម្រេចបាននូវសន្តិភាព ក្រោម​ការ​ដឹកនាំ​ដ៏​ប៉ិនប្រសព្វរបស់ សម្តេចតេជោនាយករដ្ឋមន្ត្រី ។

ឯកឧត្តម​បានបន្តថា គិតត្រឹមខែតុលា ឆ្នាំ២០២២ ចំនួនរោងចក្រកាត់ដេរ ដែលចុះបញ្ជីមានចំនួន ១ ៣១៣​រោងចក្រ ដែលបានផ្តល់ការងារដល់កម្មករ-និយោជិតចំនួនជាង ៩០ម៉ឺននាក់ និង​ដោយ​សារ​សមិទ្ធផល ពីវិស័យកាត់ដេរទាំងអស់នេះហើយ ទើប​កម្ពុជា​អាច​សម្រេច​បាន​នូវ​កំណើន​សេដ្ឋកិច្ច​ក្នុង​អត្រាជាមធ្យមប្រមាណ ៧ភាគរយ ក្នុងមួយឆ្នាំ នារយៈពេល​២​ទសវត្សរ៍​ចុង​ក្រោយ​នេះ និងបានកាត់បន្ថយភាពក្រីក្រក្នុងអត្រាមួយគួរជាទីមោទនៈ ។

ជាមួយនេះ ឯកឧត្តមបណ្ឌិត ហ៊ុន ម៉ាណែត បានថ្លែង​អំណរគុណ​ដល់​គ្រប់​ភាគី​ពាក់ព័ន្ធ​ដែល​បាន​ផ្តល់​ការ​ទុកចិត្ត និងជ្រើសរើសយកកម្ពុជាជាគោលដៅក្នុងការវិនិយោគ និង​ពង្រីក​អាជីវកម្ម​របស់​ខ្លួន ដើម្បី​ភាពចម្រុងចម្រើនទាំងក្នុងប្រទេសកម្ពុជា និងក្នុងតំបន់ ។ លើលពីនេះ ក៏ជាការ​រួម​ចំណែក ក្នុងការកាត់បន្ថយនូវភាពក្រីក្រតាមរយៈការបង្កើតឱកាសការងារ ដើម្បី​ជួយ​លើក​កម្ពស់​ដល់​ជីវភាព​ផ្ទាល់របស់ប្រជាពលរដ្ឋ មានជាអាទិ៍ ការទទួលបានបៀវត្ស ដើម្បីចិញ្ចឹមជីវិត និង​ក្រុម​គ្រួសារ ការគាំពារសុខុមាលភាពល្អប្រសើរ និងភាពចម្រុងចម្រើនជាលំដាប់ ។

គួរបញ្ជាក់ថា សមាគមរោងចក្រត់ដេរនៅកម្ពុជា ហៅកាត់ថា GMAC ដោយបានប្តូរថ្មីទៅជា សមាគម​វាយ​នភណ្ឌ​សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា ហៅកាត់ថា TAFTAC ការផ្លាស់ប្តូរឈ្មោះនេះ ដើម្បីជួយពង្រីកវិសាលភាពរបស់សមាគម និង​បង្ហាញ​ពី​គោល​ដៅ​រ​បស់រាជរដ្ឋាភិបាល ក្នុងការធ្វើពិពិធកម្មវិស័យកាត់ដេរ និងវិស័យឧស្សាហកម្មជាទូទៅ សំដៅ​ទាក់​ទាញបន្ថែមនូវសកម្មភាពផលិតកម្ម ដែលមានតម្លៃបន្ថែមខ្ពស់ និងជាមូលដ្ឋានថ្មី នៃ​ការ​អភិវឌ្ឍ​សង្គម-សេដ្ឋកិច្ច ទៅថ្ងៃអនាគត ៕ អត្ថបទ បាន សុខរិទ្ធិ