ភ្នំពេញ៖ ព្រះបរមរាជវាំង ចាប់ពីថ្ងៃទី១ ខែធ្នូ ឆ្នាំ២០២២តទៅ ​បានអនុញ្ញាតឲ្យភ្ញៀវទេសចរជាតិ និងអន្តរជាតិ ​អាចចូលទស្សនាកម្សាន្ត ​ក្នុងព្រះបរមរាជវាំងវិញបានហើយ​ បន្ទាប់ពីមានការធូរស្រាល នៃជំងឺកូវីដ-១៩ ​ដែលបានអូសបន្លាយ ​នារយៈពេលប្រមាណ៣ឆ្នាំមកនេះ ។

យោងតាមលិខិតរបស់ក្រសួងព្រះបរមរាជរាំង ​ផ្ញើទៅក្រសួងទេសចរណ៍​ កាលពីថ្ងៃទី១៧ ខែវិច្ឆិកា ឆ្នាំ២០២២ ​បានឲ្យដឹងថា ការអនុញ្ញាតនេះ ​បន្ទាប់ពីមានព្រះរាជតម្រិះដ៏ខ្ពង់ខ្ពស់បំផុតរបស់ ព្រះករុណាជាអម្ចាស់ជីវិតលើត្បូង​ និងសម្ដេចព្រះមហាក្សត្រី ព្រះវររាជមាតាជាតិខ្មែរ ជាទី​គោរព​សក្ការៈបំផុត ។

ព្រះបរមរាជវាំង​ ជាទីតាំងទេសចរណ៍ដ៏ធំមួយ ​ក្នុងចំណោមទីតាំងភ្ញៀវទេសចរណ៍ក្នុងក្រុងភ្នំពេញ ដែលទាក់ទាញទាំងភ្ញៀវទេសចរអន្តរជាតិច្រើនជាង​ ភ្ញៀវទេសចរជាតិ ។ តែសម្រាប់​ភ្ញៀវទេសចរ​ជាតិ ព្រះបរមរាជវាំងគឺជាទីតាំងតំបន់ទេសចរណ៍ដែលបង្ហាញពីវប្បធម៌ ​និងទំនៀមទំលាប់ខ្មែរ។

សូមជម្រាបថា ដោយសារការរីករាលដាលនៃជំងឺកូវីដ១៩ ​ក្រសួងព្រះបរមរាជវាំង សម្រេចផ្អាកការ​អនុញ្ញាត​ឱ្យភ្ញៀវទេសចរជាតិ ​និងអន្តរជាតិ​ ចូលទស្សនាព្រះបរមរជាវាំង ​ចាប់ពីថ្ងៃទីថ្ងៃទី១៨ ខែមីនា ឆ្នាំ២០២០ រហូតដល់មានការជូនដំណឹងជាថ្មី។ ​តែនៅពេលនេះ ក្រសួង​បានជូនដំណឹងជាថ្មីហើយ ដោយ​អនុញ្ញាតឱ្យភ្ញៀវចូលទស្សនាឡើងវិញ ​ចាប់ពីខែធ្នូខាងមុខនេះ។

គួរបញ្ជាក់ថា ប្រទេសក្នុងពិភពលោក រួមទាំងកម្ពុជាផងដែរ ​បានជួបនូវវិបត្តិនៃជំងឺកូវីដ-១៩ ដែល​បានផ្ទុះឡើងចាប់ពីចុងឆ្នាំ២០១៩មក ​ហើយវិស័យដែលប៉ះពាល់ខ្លាំងជាងគេ​ គឺវិស័យទេចរណ៍ ដែល​មានការហាមឃាត់ និងបានបិទ ​មិនឲ្យភ្ញៀវទេសចរដើរលេងកម្សាន្ត ឬបិទការធ្វើដំណើរឆ្លង​ទៅប្រទេសនីមួយៗ ។

សម្រាប់ប្រទេសកម្ពុជា បន្ទាប់ពីប្រជាពលរដ្ឋបានអនុវត្តតាមវិធាន​ការ​សុខាភិបាល និងបានចាក់​វ៉ាក់សាំង ដ៏ច្រើនលើសលុប ​ធ្វើឲ្យប្រទេសមានភាពធូរស្រាលច្រើន ​ពីវិបត្តិជំងឺកូវីដ-១៩ រហូត​មាន​ការបើកដំណើរការប្រទេសឡើងវិញគ្រប់វិស័យ ហើយចាប់ផ្ដើមទទួលភ្ញៀវទេសចរមកពីក្រៅ​ប្រទេស ​និងបានធ្វើឲ្យវិស័យនេះ ​កំពុងដំណើរការឡើងវិញជាបណ្ដើរៗផងដែរ ៕អត្ថបទ៖ បាន សុខរិទ្ធិ