​វាយ​កូន​បាល់៖ ​កីឡាករ​​អេ​ស្ប៉ា​ញ Carlos Alcaraz បាន​ក្លាយជា​កីឡាករ​លំដាប់​លេខ ១ ពិភពលោក​នាពេល​បញ្ច​ប់​រដូវ​កាល​ជា​ផ្លូវការ និង​ជា​ប្រវត្តិសាស្ត្រ​នៅក្នុង​ក្របខណ្ឌ​វាយ​កូន​បាល់​បុរស ATP​។​ ​​ស្ថិតក្នុង​វ័យ ១៩ឆ្នាំ Carlos Alcaraz គឺជា​កីឡាករ​វ័យក្មេង​បំផុត​ដែល​បញ្ចប់​ឆ្នាំ​ជា​កីឡា​ករលេខ ១ ពិភពលោកបើ​គិតពី​ឆ្នាំ១៩៧៣​។

​​Alcaraz បានទទួល​ពាន​តំណែង​លេខ ១ ពិភពលោក​របស់ខ្លួន​នៅ​ថ្ងៃ​ព្រហស្បតិ៍​ម្សិលមិញ​នៅ​ទីក្រុង Turin ប្រទេស​អ៊ីតាលី ជា​កន្លែង​ប្រកួត​ពានរង្វាន់ ATP Finals ដែលជា​ពានរង្វាន់​បិទ​រដូវ​កាល​របស់ ATP ដែល​ប្រមូលផ្តុំ​ដោយកីឡាករ​កំពូល​របស់​ពិភពលោក ៨នាក់​។ ​​Rafael Nadal និង Stefanos Tsitsipas សុទ្ធតែ​មានឱកាស​ក្នុង​ឡើងឈរ​លេខ ១ ពិភពលោក​តាមរយៈ​ជ័យជំនះ​នៅ​ទីក្រុង Turin តែ​ពួកគេ​ទាំងពីរ​សុទ្ធតែ​បរាជ័យ​នៅ​ប្រកួត​ដំបូង​របស់ខ្លួន​រៀងៗ​ខ្លួន​នៅក្នុង​ពូ​ល​។ ​​Carlos Alcaraz មិនបាន​ចូលរួម​ការប្រកួត ATP Finals នេះឡើយ​ដោយសារ​បញ្ហា​របួស​រហែ​ក​សាច់ដុំ​ដែល​បាន​បង្ខំ​ឱ្យ​ដកខ្លួន​តាំងពី​ការប្រកួត Paris Masters សប្តាហ៍​មុន​។

​​Carlos Alcaraz មាន​រដូវ​កាលដែល​មិនអាច​បំភ្លេចបាន​របស់ខ្លួន​នៅក្នុង​អាជីព​ត្រឹម​វ័យ ១៩ឆ្នាំនេះ​នៅក្នុង​ឆ្នាំ២០២២ នេះ​ដោយ​ចាប់ផ្តើម​ឆ្នាំ២០២២ ឈរ​លេខ ៣២ ពិភពលោក និង​បាន​ឡើងមក​កាន់​លំដាប់​កំពូល​នៅ​ខែកញ្ញា​។ ​​កីឡាករ​វ័យក្មេង​បំផុត​ដែល​ឈរ​លេខ ១ ពិភពលោក​នៅពេល​បញ្ច​ប់​ឆ្នាំ​ពីមុន​គឺ​កីឡាករ​អូស្ត្រាលី Lleyton Hewitt កាលពី​ឆ្នាំ២០០១ ក្នុង​វ័យ ២០ឆ្នាំ ២៧៥ថ្ងៃ ខណៈដែល Carlos Alcaraz ធ្វើបាន​ក្នុង​វ័យ ១៩ឆ្នាំ ២១៤ថ្ងៃ​៕

​អត្ថបទ​៖​នាង សុភា​វុ​ធ