មណ្ឌលគិរី៖ នារីវ័យ ១៨ឆ្នាំម្នាក់បានស្លាប់នៅពាក់កណ្ដាលផ្លូវ កំឡុងពេលបញ្ជូនទៅសង្គ្រោះនៅមណ្ឌលសុខភាពអូរអាម រួមទាំងលោកអធិការរងម្នាក់ទៀតបានរងរបួសក្នុងហេតុការណ៍រន្ទះបាញ់ ដែលបានកើតឡើងនៅវេលាម៉ោង ៩:២០នាទីថ្ងៃទី១៦ មេសា ២០២១។
សមត្ថកិច្ចមូលដ្ឋានបានរាយការណ៍ថា មានភ្លៀង ១មេធំបានបង្អុរមកនៅព្រឹកនេះ ហើយក៏មានករណីរន្ទះបាញ់ដែលកើតឡើងនៅគីឡូ 37 ភូមិត្រពាំងផ្អេរ ឃុំស្រែខ្ទុម ស្រុកកែវសីមា ខេត្តមណ្ឌលគិរីបណ្ដាលឲ្យជនរងគ្រោះ ឈ្មោះ គង់ ច្រិច ភេទស្រីអាយុ ១៨ឆ្នាំ ជនជាតិខ្មែរ មុខរបរកសិករ រស់នៅភូមិឃុំខាងលើបានស្លាប់។ សមត្ថកិច្ចបន្តថា ក្នុងហេតុការដដែលក៏បានបង្កឲ្យជនរងគ្រោះម្នាក់ទៀតឈ្មោះ កែវ សាវុធ ហៅមុត ភេទប្រុស អាយុ ៥២ឆ្នាំ មុខរបរ អធិការរងស្រុកកែវសីមា (របួសស្រាល) ដែលកើតឡើងនៅចំណុចចរាចរណ៍បិតការឆ្លងខេត្ត នាភូមិឆ្នែង ឃុំស្រែខ្ទុម ស្រុកកែវសីមា ខេត្តមណ្ឌលគិរី។ បច្ចុប្បន្នសពឈ្មោះ គង់ ច្រិច ត្រូវបានបងប្អូនយកទៅធ្វើបុណ្យតាមប្រពៃណី។ ចំណែកឈ្មោះ កែវ សាវុធ កំពុងព្យាបាលនៅមណ្ឌលសុខភាពអូរអាម៕ អត្ថបទ៖ អ៊ិត ភីរុណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
