ភ្នំពេញ៖ ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍ និងជាប្រធានគណៈកម្មាធិការជាតិ​គ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ (គ.ជ.អ.អ) បានស្នើឲ្យវិស័យ​ឯកជនពង្រឹងការគាំទ្រជួយដល់សហគមន៍ក្នុងស្រុក​ ជៀសវាងនូវស្ថានភាព “ពងមាន់ មេមាន់” ដែលជះផលអាក្រក់ដល់វិស័យអេកូទេសចរណ៍ផងដែរ។

នៅក្នុងពិធីបើកវេទិកាជាតិអេកូទេសចរណ៍ លើកទី៣ កាលពីថ្ងៃទី២១​ ខែវិច្ឆិកា​កន្លងទៅ នៅរាជធានី​ភ្នំពេញ ឯកឧត្តមបណ្ឌិត ថោង ខុន បានមានប្រសាសន៍ថា ក្នុងគោលបំណងដើម្បីជំរុញឲ្យវិស័យ​អេកូទេសចរណ៍​ឲ្យកាន់តែល្អប្រសើរទៅមុខបន្ថែមទៀត វិស័យឯកជនត្រូវជំរុញដល់ការរៀបចំ​កញ្ចប់​ទស្សនកិច្ចទៅកាន់សហគមន៍ ​និងត្រូវប្រើប្រាស់សេវារបស់សហគមន៍ឲ្យបានច្រើន និងត្រូវរៀបចំ​នូវព្រឹត្តិការណ៍ដែលពាក់ព័ន្ធនឹងសហគមន៍ ដូចជាពិធីបុណ្យអេកូទេសចរណ៍ និងព្រឹត្តិការណ៍​កីឡា​ទេសចរណ៍នៅតាមតំបន់អេកូវទេសចរណ៍សំខាន់ៗ​នៅទូទាំងប្រទេស។

ក្នុងឱកាសនោះ ឯកឧត្តមរដ្ឋមន្រ្តី ថោង ខុន បានស្នើឲ្យក្រសួង ស្ថាប័នពាក់ព័ន្ធ បង្ហាញនូវគោល​នយោបាយ និងផែនការសកម្មភាពអាទិភាព ​ក្នុងការជំរុញការដោះស្រាយទៅលើបញ្ហាសំខាន់ៗ ដូចជា ​ការស្ថាបនាផ្លូវតភ្ជាប់ទៅតំបន់សហគមន៍ ​ការ​ផ្គត់ផ្គង់​អគ្គិសនី/ទឹកស្អាត ការព្យាបាល​ជំងឺគ្រុនចាញ់ ការបន្តតំឡើងប្រព័ន្ធទូរស័ព្ទនិងប្រព័ន្ធអ៊ិនធើណេត​ ការគ្រប់គ្រងសំរាម និង​បញ្ហាផ្សេងៗ​របស់សហគមន៍ ​ពិសេសឆ្លើយតបតាមតម្រូវការជាក់ស្តែងរបស់ប្រជាពលរដ្ឋមូលដ្ឋាន។

ជាមួយគ្នានេះ ​លោកស្រី ហួន ស្រីនិច ម្ចាស់សិប្បកម្មអំបុកស្រីនិច ​លក់ចំណីម្ហូបអាហារ និងលោក យិន សូរិយា ប្រធានក្រុមហ៊ុន Mekong Booking ​លក់ផលិតផលកែវយិត និងតេឡេស្កុប បានបង្ហាញ​ក្តីសង្ឃឹមថា​ ក្រោយឆ្លងកាត់នូវវិបត្តិឆ្លងរាលដាលនៃជំងឺកូវីដ១៩ នឹងអាចរកប្រាក់ចំណូលបានច្រើន​ឡើងវិញ ​ជាពិសេសតាមរយៈការអភិវឌ្ឍ​វិស័យអេកូទេសចរណ៍​ និងសហគមន៍ទេសចរណ៍។

តាមការរំពឹងរបស់រាជរដ្ឋាភិបាលកម្ពុជា ​បានសង្ឃឹមថា ​នៅឆ្នាំ២០២៣ខាងមុខ នឹងអាចទាក់ទាញ​ភ្ញៀវទេសចរ​ផ្ទៃក្នុងប្រមាណ ១១លាននាក់ ​តាមផែនការដែលបានដាក់ចេញ និងភ្ញៀវទេសចរណ៍​អន្តរជាតិ​ប្រមាណ ៧លាននាក់ ​រហូតដល់ឆ្នាំ២០២៦ ឬឆ្នាំ២០២៧ ជាមួយភាពមិនប្រាកដ​ប្រជា​នៃវិបត្តិជំងឺកូវីដ-១៩​ និងវិបត្តិសកលលោកនានា ​ខណៈដែលរយៈពេល ១០ខែ​ ឆ្នាំ២០២២នេះ កម្ពុជា​ទទួលបានភ្ញៀវអន្តរជាតិប្រមាណ ១,៥លាននាក់ ​និងរំពឹងថា នឹងទទួលបានប្រមាណ ២លាននាក់ សម្រាប់ឆ្នាំ២០២២នេះ៕អត្ថបទ៖ ឈិត បូរ៉ាវី