​កូរ៉េខាងជើង៖ ប្អូនស្រី​របស់​មេដឹកនាំ​ប្រទេស​កូរ៉េខាងជើង Kim Jong Un បាន​រិះគន់​កូរ៉េខាងត្បូង​ខ្លាំង​ៗ​ចំពោះ​ការពិចារណា​ដាក់ទណ្ឌកម្ម ​ជា​ឯកតោភាគី​បន្ថែម​ទៀត​មក​លើ​ប្រទេស​កូរ៉េខាងជើង ដោយ​និយាយ​ថា ​ចំណាត់​ការ​បែបនេះ​នឹង​បន្ថែម​ប្រេង​លើ​កំហឹង​របស់​ទីក្រុង​ព្យុងយ៉ាង​។

សេចក្តីថ្លែងការណ៍​របស់​លោក​ស្រី Kim Yo Jong នៅ​ថ្ងៃ​ព្រហស្បតិ៍​នេះ​បាន​ធ្វើឡើង​ បន្ទាប់ពី​ការ​និយាយ​លើក​ឡើង​របស់​អ្នកនាំពាក្យ​ក្រសួងការបរទេស​កូរ៉េខាងត្បូង​។ អ្នកនាំពាក្យ​រូប​នេះ​បាន​និយាយ​កាលពី​ថ្ងៃ​អង្គា​រថា ទីក្រុង​សេ​អ៊ូ​ល​កំពុង​ពិចារណា​ការ​ដាក់​ទណ្ឌកម្ម​បន្ថែមទៀត ប្រសិន​បើ​កូរ៉េខាងជើង​បង្ក​បញ្ហា​ដូចជា​ការ​សាកល្បង​នុយក្លេអ៊ែរ​។​ លោក​​ស្រី Kim Yo Jong និយាយ​ថា ប្រសិន​បើ​សហរដ្ឋអាមេរិក និង​កូរ៉េខាងត្បូង​នៅតែ​ជំនះ​ចំពោះ​ការ​ដាក់​ទណ្ឌកម្ម នោះ​កូរ៉េខាងជើង​នឹង​អនុញ្ញាត​ឱ្យ​ពួកគេ​ធ្វើ​បែប​នេះ​មួយ​ពាន់​ដង​។ លោកស្រី​បាន​រិះគន់​ប្រធានាធិបតី​កូរ៉េខាងត្បូង​លោក Yoon Suk-yeol ផង​ដែរ ដែល​លោក Yoon បាន​ស្វែងរក​កិច្ច​សហប្រតិបត្តិការ​ជិតស្និទ្ធ​ជាមួយអាមេរិក​។​

​ដោយ​និយាយ​សំដៅ​ទៅលើ​អ្នក​កាន់​តំណែង​មុន​លោក Yoon លោកស្រី​និយាយ​ថា ទីក្រុង​សេ​អ៊ូ​ល​ពុំ​មែន​ជា​គោលដៅ​របស់​កូរ៉េខាងជើង​នោះ​ទេ នៅពេលដែល​លោក Moon Jae-in កាន់​តំណែង​។ លោក​ស្រី​និយាយថា ការដាក់ទណ្ឌកម្ម និង​សម្ពាធ​ខ្លាំង​ពី​សហរដ្ឋអាមេរិក ​និង​កូរ៉េខាងត្បូង​នឹង​ជំរុញ​ឱ្យ​មាន​អរិភាព​ និង​កំហឹង​ពី​សំណាក់​កូរ៉េខាងជើង​។ លោក​ស្រី Kim Yo Jong បាន​ចេញ​សេចក្តី​ថ្លែងការណ៍​មួយ​កាលពី​ថ្ងៃ​អង្គារ​ ដោយ​ថ្កោលទោស​សហរដ្ឋអាមេរិក​ផង​ដែរ​។ អ្នក​ជំនាញ​កូរ៉េខាងត្បូង​និយាយ​ថា កូរ៉េខាងជើង​អាច​នឹង​បង្ក​បញ្ហា​បន្ថែម​ទៀត ខណៈ​អះអាង​ថា ​មាន​តម្រូវការ​ដើម្បី​ទប់ទល់​សម្ពាធ​ពី​សហរដ្ឋអាមេរិក និង​កូរ៉េខាងត្បូង​៕

អត្ថបទ៖ ប៊ុនថន