ព្រះសីហនុ៖ ក្នុងគោលដៅអបអរពិធីបុណ្យសមុទ្រលើកទី៩ ជុំទី៣ ដែលនឹងប្រព្រឹត្តទៅចាប់ពីថ្ងៃទី៩ ដល់ថ្ងៃទី១១ ខែធ្នូ ឆ្នាំ២០២២ និងដើម្បីជំរុញការចូលរួមក្នុងយុទ្ធនាការកម្ពុជា ជា“គោលដៅ​ទេសចរណ៍​ស្អាត បៃតង និងសុវត្ថិភាព” និងចលនា ប្រឡងប្រណាំង “ទីក្រុងស្អាត រមណីយដ្ឋាន​ស្អាត សេវាល្អបដិសណ្ឋារកិច្ចល្អ”។

ក្រសួងទេសចរណ៍ បានចេញសេចក្ដីណែនាំលេខ ០០៨ ចុះថ្ងៃទី៦ ​ខែតុលា ឆ្នាំ២០២២ ឱ្យមន្ទីរ​ទេសចរណ៍​ខេត្តគោលដៅតំបន់ឆ្នេរ ​(ខេត្តព្រះសីហនុ កោះកុង កំពត និងខេត្តកែប) ត្រូវ​បន្ត​ចុះ​ណែនាំ​ដល់គ្រប់មូលដ្ឋាន​អាជីវកម្មទេសចរណ៍ ​ដោយបន្តអនុវត្តឱ្យបានខ្ជាប់ខ្លួន នូវវិធាន​សុវត្ថិភាព​ទេសចរណ៍ និតិវិធីប្រតិបត្តិស្តង់ដាអប្បបរមា (SOP)។

ផ្ដល់កិច្ចសហការល្អជាមួយ​សមត្ថកិច្ចគ្រប់ ជាន់ថ្នាក់ដើម្បីធានារក្សាសន្តិសុខ សុវត្ថិភាព សណ្តាប់​ធ្នាប់​សាធារណៈ ភាពស្អាត​ ពិសេសចំពោះសេវាកម្មមួយចំនួន ដែលតម្រូវឱ្យមានការយកចិត្តទុក​ដាក់​ខ្ពស់​អំពីសុវត្ថិភាព (ការដឹកជញ្ជូន កីឡាទេសចរណ៍ ​សកម្មភាពទេសចរណ៍ ដែលមាន​លក្ខណៈផ្សងព្រេងជាដើម)។

ត្រូវរៀបចំចំណតឱ្យបានគ្រប់គ្រាន់​សម្រាប់ជូនភ្ញៀវទេសចរ ​ដែលមកទទួល យកសេវាកម្ម​របស់ខ្លួន។ ត្រូវតុបតែងលម្អទាំងផ្នែកខាងក្នុង​ និងខាងក្រៅអាជីវកម្ម ​ត្រូវបង្ហាញនូវវប្បធម៌ខ្មែរ អត្តសញ្ញាណខ្មែរ ទំនៀមទម្លាប់ ប្រពៃណីខ្មែរ។ ផ្នែកខាងក្រៅអាជីវកម្ម ត្រូវមានតុបតែងភ្លើងលម្អ និង​ដាក់បង្ហាញ​ ទង់ជាតិនៃព្រះរាជាណាចក្រកម្ពុជា។

ផ្នែកខាងក្នុងអាជីវកម្មត្រូវដាក់តាំង​ព្រះឆាយាល័ក្ខណ៍​ព្រះមហាក្សត្រ ​នៃ​ព្រះរាជាណា ចក្រកម្ពុជា​ទាំង៣។ ត្រូវដាក់បង្ហាញផលិតផល​ ឬសេវាកម្មរបស់ខ្លួនជាសាធារណៈតាមគ្រប់ទម្រង់ ​និងត្រូវ​មាន​បញ្ជាក់ពីតម្លៃ ​និងលក្ខខណ្ឌអនុវត្តផ្សេងៗឱ្យបានច្បាស់លាស់។ត្រូវក្រើនរំលឹកនិងបណ្ដុះបណ្ដាលបុគ្គលិកអំពីបដិសណ្ឋារកិច្ច​ និងជំនាញដែលចាំបាច់។ ត្រូវយកចិត្តទុកដាក់ចំពោះបន្ទប់ទឹកសាធារណៈ​ ត្រូវលាងសម្អាតជាប្រចាំ​ និងឱ្យបាន​ញឹកញាប់។ ត្រូវអនុវត្តរាល់​បទប្បញត្តិ​ជាធរមាន ​និង​រាល់​ការ​ណែនាំ​របស់ក្រសួងទេសចរណ៍ ​និងរដ្ឋបាលខេត្ត៕ អត្ថបទ៖ គង់ ប៊ុនថា