ភ្នំពេញ៖ ពិធីបិទមហាសន្និបាតវិសាមញ្ញរបស់ស.ស.យ.ក. បានបញ្ចប់អង្គមហាសន្និបាតរបស់ខ្លួន នារសៀលថ្ងៃទី២៧ ខែវិច្ឆិកា ឆ្នាំ២០២២ ក្រោមអធិបតីភាពដ៏ខ្ពស់ខ្ពស់របស់ឯកឧត្តមបណ្ឌិត ហ៊ុន ម៉ាណែត ប្រធានកិត្តិយសនៃសហភាពសហព័ន្ធយុវជនកម្ពុជា ឯកឧត្តម ហ៊ុន ម៉ានី ប្រធាន​សហភាព​សហព័ន្ធយុវជនកម្ពុជា ​អនុប្រធាន និងសមាជិក សមាជិកា ស.ស.យ.ក. ប្រតិភូតំណាង​ទូទាំង​ប្រទេសសរុបប្រមាណ ១៥០០ នាក់។

មហាសន្និបាត បានពិនិត្យសម្រេចនិងអនុម័តលើការងារសំខាន់ៗមួយចំនួនរបស់ខ្លួន ដូចជា របាយការណ៍​សកម្មភាពការងារសម្រេចបាន ឆ្នាំ២០១៨-២០២៣​ ផែនការយុទ្ធសាស្រ្ត «យុវជនក្នុង​បុព្វហេតុជាតិមាតុភូមិ ២០២៣ ២០២៨» ​និង​បាន​អនុម័ត​លើវិសោធនកម្ម​លក្ខន្តិកៈ​របស់ខ្លួនផងដែរ។

សូមជម្រាបដែរថា ឯកឧត្តមបណ្ឌិត ហ៊ុន ម៉ាណែត ត្រូវបានគណៈកម្មាធិការកណ្ដាលស.ស.យ.ក. បោះឆ្នោតជ្រើសតាំង​ជាប្រធានកិត្តិយស ស.ស.យ.ក. ។

ដោយឡែក​គណៈកម្មាធិការកណ្តាល​ក៏បានបោះឆ្នោតជ្រើសតាំង ​ឯកឧត្តម ទៀ សីហា ជា​អនុប្រធាន​ស.ស.យ.ក. ព្រមទាំង​សមាជិក សមាជិកា ​នៃគណៈអចិន្ត្រៃយ៍បន្ថែមចំនួន០៩រូប រួមជា​មួយសមាជិក​សមាជិកា​គណៈកម្មាធិការកណ្ដាលថ្មីបន្ថែមចំនួន ២០៣រូប ​កាលពីរសៀលថ្ងៃទី២៦ ខែវិច្ឆិកា ឆ្នាំ២០២២នេះ៕ អត្ថបទ រដ្ឋា