ភ្នំពេញ៖ នៅថ្ងៃទី២៨ ខែវិច្ឆិកានេះ ឯកឧត្តម សំរាំង កំសាន្ត រដ្ឋលេខាធិការក្រសួងវប្បធម៌​និង​វិចិត្រសិល្បៈ ​បាន​អញ្ជើញ​បានបើកការប្រឡង​សញ្ញាប័ត្រ​សិល្បៈ​ និង​ស្នាតកបត្រសិល្បៈ សម្រាប់ឆ្នាំសិក្សា២០២១ -២០២២ ​ទៅលើសិស្សប្រមាណជាង ១៦០នាក់របស់សាលាមធ្យមសិក្សាវិចិត្រសិល្បៈ។

ឯកឧត្តម ហេង កំសាន្ត ​នាយកស្តីទីសាលាមធ្យមសិក្សាវិចិត្រសិល្បៈ​ ថ្លែងថា ​នៅក្នុងចំណោមការ​ប្រឡងបញ្ចប់ការសិក្សាសិស្សចំនួន ១៦០នាក់នោះ ​មានសិស្សប្រឡងបញ្ចប់សិក្សាយក​សញ្ញាប័ត្រ​សិល្បៈដែលមានតម្លៃស្មើសញ្ញបត្របឋមភូមិមានចំនួន៧៨នាក់​ ស្រី ៤៤នាក់ និង​សិស្សប្រឡង​បញ្ចប់ការសិក្សាយក​សញ្ញាប័ត្រ​ស្នាតកបត្រសិល្បៈមានចំនួន៨២នាក់​ ក្នុងនោះស្រី ៣៧នាក់ ដែលបានបង្កើតស្នាដៃសិល្បៈសម្រាប់ប្រឡងមានចំនួន១០១ស្នាដៃសិល្បៈ។

បើតាមបណ្តាសិស្សានុសិស្សថ្លែងថា​ នៅក្នុងដំណើរការសិក្សាឯកទេសសិល្បៈនេះ គឺយើងបាន​សិក្សាតាំងពីអាយុ៩ឆ្នាំមក​ម្ល៉េះ ​ហើយការសិក្សានោះប្រឈមការលំបាកច្រើន ប៉ុន្តែយើង​នៅតែចង់សិល្បៈវាខ្លាំងណាស់ ​ដើម្បីថែរក្សាតម្លៃវប្បធម៌សិល្បៈខ្មែរឲ្យ​បាន​គង់វង្ស។

បេក្ខជន បេក្ខនារី​ ក៏បានថ្លែងដែរថា ​នៅពេលដែលគេប្រឡងជាប់ស្នាតកបត្រសិល្បៈនេះទៅ សិស្ស​មួយ​ចំនួនធំគេនឹងបន្តការសិក្សានៅសកលវិទ្យាល័យភូមិន្ទវិចិត្រសិល្បៈ​ទៅតាមមុខជំនាញ​ដែលគេពេញចិត្ត ហើយខ្លះទៀត គេនឹងបង្កើតក្រុមសិល្បៈសំដែងរកចំណូលខាងក្រៅផងដែរ។

យ៉ាងណាក៏ដោយ ​ឯកឧត្តម សំរាំង កំសាន្ត រដ្ឋលេខាធិការក្រសួងវប្បធម៌ ​និងវិចិត្រសិល្បៈ ក៏បានថ្លែង​ឲ្យបណ្តាបេក្ខជន ​បេក្ខនារីទាំងអស់​ខិតខំ​សំដែង ប្រឡង​សំដែង​សិល្បៈទៅ​តាមកម្រិត​បទដ្ឋាន​ដែលសាលាបានបង្រៀន។

សូមបញ្ជាក់ថា ​ការប្រឡងបញ្ចប់សិក្សាយកសញ្ញាបត្រសិល្បៈ និងយកស្នាតកបត្រ​សិល្បៈនៃ​សាលាមធ្យម​សិក្សាវិចិត្រសិល្បៈឆ្នាំសិក្សា២០២១​ ឆ្នាំ២០២២នេះមាន២ដំណាក់កាល ៖ ដំណាក់កាលទី១ ប្រឡងផ្នែកចំណេះដឹងទូទៅ ​រយៈពេល២ថ្ងៃ ​ដោយបានចាប់ផ្តើមនៅថ្ងៃទី២១ ខែវិច្ឆិកា ​និងដំណាក់កាលទី២ ​ប្រឡងផ្នែកសំដែងរំបាំសិល្បៈ រយៈពេល៣ថ្ងៃ ដោយបាន​ចាប់ផ្តើម​នៅថ្ងៃទី២៨ ខែវិច្ឆិកានេះ៕ អត្ថបទ ស៊ុម សុខជា