កំពង់ឆ្នាំង៖ នៅព្រឹកថ្ងៃទី២៩ ខែវិច្ឆិកា ឆ្នាំ២០២២នេះ ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួង​អភិវឌ្ឍន៍ជនបទ បានដឹកនាំគណៈប្រតិភូ គឺលោក យ៉ាន់ ឌុយបូស អភិបាលក្រុង Bussy Saint Georges77 ប្រទេសបារាំង ចុះសហគមន៍ភូមិអណ្តូងឬស្សី ឃុំស្រែថ្មី ស្រុក​រលាប្អៀរ ខេត្តកំពង់ឆ្នាំង ដើម្បីទស្សនកិច្ច​លើការ​ផលិត​ក្អមឆ្នាំង​របស់បងប្អូន​ប្រជាពលរដ្ឋ​នៅទីនោះ។

ក្នុងពេលចុះទស្សនកិច្ច លោក សេង សាលី ប្រធាន​មន្ទីរ​ទេសចរណ៍​ខេត្ត​ បានណែនាំ​ភ្ញៀវ​អោយ​ស្គាល់​នូវ​ផលិតផលកុលាលភាជន៍ខ្មែរ ដែលមុខរបរស្មូនក្អមឆ្នាំង រួមទាំងវត្ថុតាំងលម្អផ្សេងៗទៀត ដែល​ធ្វើពីដីឥដ្ឋក្រហមនេះ គឺជាមុខរបរតពីដូនតា ដែលអ្នករស់នៅខេត្តកំពង់ឆ្នាំង ជាពិសេសអ្ន​ក​ភូមិ​អណ្តូង​ឫស្សី ភូមិក្តីត្នោត និងភូមិត្រពាំងស្បូវ ស្ថិតក្នុងឃុំស្រែថ្មី ស្រុករលាប្អៀរ នៅតែ​រក្សា​បាន​កេរ​ដំណែល​មួយនេះបន្តពី១ជំនាន់ ទៅ១ជំនាន់រហូតមកដល់បច្ចុប្បន្ន ។ គ្រឿងកុលាលភាជន៍ ដែល​ផលិតពីដីឥដ្ឋនេះ មិនត្រឹមតែជាជំនាញអាជីពបន្តជំនាន់នោះទេ ប៉ុន្តែ​ថែម​ទាំង​បង្កើត​បាន​ជា​អត្ត​សញ្ញាណ​ពិសេសមួយផងដែរ សម្រាប់អ្នកខេត្តកំពង់ឆ្នាំងនៅពេលដែលគេបានឃើញក្អម និងឆ្នាំង​ដី​ដែលចេញពីស្នាដៃរបស់ពួកគាត់ ។

លោកបានបន្តថា អ្នកភូមិអណ្តូងឫស្សីប្រមាណ៩០ភាគរយ បាននាំគ្នា​ប្រកប​របរ​ធ្វើ​ក្អម​ឆ្នាំង​នេះ​ដែរ ព្រោះថាគ្មាននរណាម្នាក់ដែលថាមិនចេះជំនាញតពីដូនតាពួកគេនោះទេ ពោល​គឺ​ចេះ​ទាំង​ក្មេង​ទាំង​ចាស់តែម្តង។ ភ្នំក្រាំងដីមាស បានចិញ្ចឹមប្រជាពលរដ្ឋបាន៣ភូមិ ព្រោះភ្នំនេះ គឺជាប្រភព​វត្ថុ​ធាតុ​ដើមដ៏សំខាន់បំផុតដែលអ្នករស់នៅក្នុងភូមិអណ្តូងឫស្សី ភូមិក្តីត្នោត និងអ្នក​ភូមិ​ត្រពាំង​ស្បូវ តែងនាំគ្នាទៅជីកយកដីនៅទីនោះមកប្រើប្រាស់ផលិតជាក្អមឆ្នាំង។

បន្ទាប់​ពី​ទស្សនកិច្ចពីការស្មូនដីរួច ឯកឧត្តមរដ្ឋមន្ត្រីអភិវឌ្ឍន៍ជនបទ និងលោក យ៉ាន់ ឌុយបូស អភិបាលក្រុង Bussy Saint Georges77 ប្រទេសបារាំង បានអញ្ជើញ​ជា​អធិបតី​ក្នុង​ពិធី​ចែក​សម្ភារៈ​សិក្សា អង្ករ និងថវិកា ដល់សិស្សានុ សិស្ស​ក្រីក្រ​ក្នុង​សាលាបឋម​សិក្សាគីរី​សុវណ្ណវង្ស​ចំនួន​១០០នាក់ ដើម្បីជួយសំរួលដល់ជីវភាពប្អូនៗផងដែរ៕ អត្ថបទ៖ ហុង វាស្នា