ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន គ.ជ.ប.ជ បានទទួល មេដាយមាស Great Wall Commemorative Medal ក្នុងសន្និសីទលើកទី១ នៃវេទិកាកិច្ចប្រតិបត្តិការសន្តិសុខសាធារណៈសកល កាលថ្ងៃទី២៩ ខែវិច្ឆិកា ឆ្នាំ២០២២។ នេះបើយោងតាម ការបង្ហោះលើបណ្ដាញសង្គមហ្វេសប៊ុក លោកជំទាវ ជូ ប៊ុនអេង រដ្ឋលេខាធិការ​ក្រសួងមហាផ្ទៃ ជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នាព្រឹកថ្ងៃទី ១ ខែធ្នូ ឆ្នាំ ២០២២ នេះ។

លោកជំទាវ ជូ ប៊ុនអេង បានបញ្ជាក់ថា នាឱកាសនោះ សម្ដេច ស ខេង បានថ្លែងនូវសេចក្តី​សោមនស្ស​រីករាយ ដែលត្រូវបានរដ្ឋាភិបាល និងក្រសួងសន្តិសុខសាធារណៈ នៃសាធារណរដ្ឋ​ប្រជាមានិតចិន ផ្ដល់នូវគ្រឿងឥស្សរិយយស «មេដាយមាស មេដាយប្រាក់ អនុស្សាវរីយ៍មហា​កំពែង» ​ក្នុងឱកាសនៃការប្រារព្ធពិធីដ៏មហោឡារិក វេទិកាកិច្ច​សហប្រតិបត្តិការ​សន្តិសុខ​សាធារណៈសកល លើកទី ៦ ឬហៅថា វេទិកា «លានស៊ីនកាង» (Lianyungang) តាមរយៈវីដេអូពីចំងាយ Conference ។

មានប្រសាសន៍​ចាប់អារម្មណ៍ក្នុងកម្មវិធីសម្តេចបានថ្លែងយ៉ាងដូច្នេះ ការទទួលបាននូវគ្រឿង​ឥស្សរិយយស ប្រកបដោយគុណតម្លៃដ៏វិសេសវិសាលនេះ គឺជាមោទនភាពសម្រាប់រាជរដ្ឋាភិបាល និងក្រសួងមហាផ្ទៃកម្ពុជា ​ដែលជាស្ថាប័នទទួលខុសត្រូវក្នុងភារកិច្ចថែរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។

សម្ដេច បន្ថែមថា ក្នុងន័យនេះ «មេដាយមាស មេដាយប្រាក់ អនុស្សាវរីយ៍មហាកំពែង» មិនត្រឹម​តែជា​ការលើក​ទឹកចិត្តសម្រាប់សម្ដេចផ្ទាល់ ព្រមទាំងថ្នាក់ដឹកនាំអគ្គស្នងការដ្ឋាននគរបាល​ជាតិ​ប៉ុណ្ណោះទេ ប៉ុន្តែគឺជាការលើកទឹកចិត្តដ៏ខ្លាំងក្លាមួយបន្ថែមទៀត ដល់សមត្ថកិច្ចអនុវត្តច្បាប់​របស់​កម្ពុជាទាំងមូល ក្នុងកិច្ចសហប្រតិបត្តិការរបស់ខ្លួន ដើម្បីបម្រើដល់បុព្វហេតុ ជាតិ និងប្រជាជន។

សម្ដេចឧបនាយករដ្ឋមន្ដ្រី ក៏បានចូលរួមអបអរសាទរយ៉ាងក្រៃលែងចំពោះ ​លោក-លោកស្រី ជាថ្នាក់​ដឹកនាំស្ថាប័នអនុវត្តច្បាប់ នៃបណ្តាប្រទេសជាមិត្ត ដែលជាជ័យលាភីនៃមេដាយ​អនុស្សាវរីយ៍​មហាកំពែង​ នាឱកាសនេះ ហើយការទទួលបាននូវគ្រឿងឥស្សរិយយស​ដ៏ឧត្តុង្គឧត្តមនេះ ពិតជា​ឆ្លុះបញ្ចាំង និងជាសក្ខីភាព ​នៃកិច្ចខិតខំប្រឹងប្រែង ការប្តេជ្ញាចិត្ត និងការលះបង់ដ៏ធំធេង​ក្នុងបុព្វហេតុជាតិ និងប្រជាជន។

សម្ដេច ឧបនាយករដ្ឋមន្ដ្រី បានបន្ដទៀតថា «រាជរដ្ឋាភិបាលកម្ពុជា មានឆន្ទៈ និងការប្តេជ្ញាចិត្តខ្ពស់ ក្នុងការប្រយុទ្ធប្រឆាំងឧក្រិដ្ឋកម្មឆ្លងដែនមានអង្គការចាត់តាំងគ្រប់ប្រភេទ​ រាប់ទាំងអំពើជួញដូរ និង​រត់ពន្ធមនុស្ស ហើយបញ្ហានេះមិនអាចប្រទេសណាមួយអនុវត្តតែឯកឯងបាននោះទេ គឺ​ទាមទារចាំបាច់នូវកិច្ចសហការទាំងនៅក្នុងកម្រិតតំបន់​ និងសកលលោក ដើម្បីដោះស្រាយ​បញ្ហា​ប្រឈមជាសកលនេះ» ។

ឆ្លៀតក្នុងឱកាសដ៏វិសេសវិសាលនេះ តាងនាមថ្នាក់ដឹកនាំ និងមន្រ្តី របស់អគ្គលេខាធិការដ្ឋាន គ.ជ.ប.ជ មាន​លោកជំទាវ អនុប្រធានអចិន្រ្តៃយ៍ ​និងលោកជំទាវ ឧ.ឯក អគ្គលេខាធិការ មានក្តី​សោមនស្សរីករាយ​ នឹងបានផ្ញើលិខិតអបអរសាទរគោរពជូន ​សម្តេចក្រឡាហោម ស ខេង ឧបនាយក​មន្រ្តីក្រសួងមហាផ្ទៃ ​និងជាប្រធាន គ.ជ.ប.ជ ​ទទួលបាននូវសុខភាពល្អ កម្លាំងមាំមួន ប្រាជ្ញាឈ្លាស​វៃ អាយុយឺនយូរ ​ដើម្បីដឹកនាំក្រសួងមហាផ្ទៃ ក៏ដូចជារួមចំណែកក្នុងការ​អភិវឌ្ឍ​សង្គមជាតិ ឲ្យកាន់តែមានការរីកចម្រើនជានិរន្តក្រោមការដឹកនាំដ៏គតិបណ្ឌិតរបស់ សម្តេចអគ្គ​សេនា​បតីតេជោ ហ៊ុន សែន នាយករដ្ឋមន្រ្តី ​នៃព្រះរាជាណាចក្រកម្ពុជា ៕