ភ្នំពេញ៖ នៅថ្ងៃទី១ខែធ្នូនេះ ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានអញ្ជើញបើកសន្និបាតបូកសរុបការងារ លើកទី១២ របស់​សមាគមអ្នកសាងសង់កម្ពុជា​ និងបើកការតាំងពិព័រណ៍ឧស្សាហកម្មសំណង់កម្ពុជា អន្តរជាតិ​ឆ្នាំ២០២២ ដែលនៅក្នុងព្រឹត្តិការណ៍តាំងពិព័រណ៍​មានតាំងពិព័រណ៍​ផលិតផល ​និងសេវាកម្មជាង ២០០០មុខ នៅមជ្ឈមណ្ឌលពិព័រណ៍​កោះពេជ្រ។

ក្នុងឱកាសនេះ ឯកឧត្តម លាង មុនីរិទ្ធ ថ្លែងថា ​សន្និបាតបូកសរុបការងារបស់​សមាគម​អ្នកសាង​សង់​កម្ពុជា ​អមដោយ​ការតាំងពិព័រណ៍​បង្ហាញផលិតផលបំរើឲ្យវិស័យសំណង់ឆ្នាំនេះ គឺបាន​បង្ហាញ​ការអភិវឌ្ឍ ការរីកចំរើនជាច្រើននៃវិស័យសំណង់នៅកម្ពុជាក្រោយបរិបទកូវីដ១៩។

យ៉ាងណាក៏ដោយ ​ឯកឧត្តម លាង មុនីរិទ្ធ នៅក្នុងពិធីនេះ អំពាវនាវភាគីពាក់ព័ន្ធក្នុងវិស័យសំណង់​ទាំងអស់ ​ត្រូវរួមគ្នាគោរពច្បាប់សំណង់ ​ក្រមសីលធម៌ និង​លិខិត​ដ្ឋាន​គតិយុត្តិពាក់ព័ន្ធនានា​ ដើម្បី​ធនា​បាន​ទាំងសុវត្ថិភាព​ អនាម័យ បរិស្ថាន​ សោភ័ណ គុណភាពសំណង់ និងបន្តចូលរួមចំណែកអភិវឌ្ឍន៍សេដ្ឋកិច្ចបន្តរីករចំរើន។

ក្នុងរយៈពេលនេះ៩ខែឆ្នាំ២០២២នេះ ក្រសួងរៀបចំដែនដី ​នគរូបណីយកម្ម ​និងសំណង់បាន​ផ្តល់​លិខិត​អនុញ្ញាត​សាងសង់​ទូទាំងប្រទេសមាន ៣១៧៦គម្រោង ​មាន​ទុនវិនិយោគប្រមាណ ១៩៦៣លាន​ដុល្លាអាមេរិក​ ក្នុងនោះផ្តល់លិខិតអនុញ្ញាតសាងសង់​គម្រោងបណ្តុំលំនៅដ្ឋានបុរី មាន២០គម្រោង​ សង់អគារកំពស់ខ្ពស់ចាប់ពី៥ជាន់ឡើង ​មាន៩៨គម្រោងស្មើ១០០អគារ ។

អ្នកឧកញ៉ា ពុង ឃាវសែ ប្រធានសមាគមអ្នកសាងសង់កម្ពុជា ​ថ្លែងថា នេះជាលើកទី៩ ដែល​សមាគមអ្នកសាងសង់កម្ពុជា ​សហការរៀបចំការតាំងពិព័រណ៍​ឧស្សាហកម្មសំណង់កម្ពុជា ​អន្តរជាតិ ២០២២ ​ខណៈពិព័រណ៍ឧស្សាហកម្មសំណង់ដ៏ធំ​ជាងគេនៅកម្ពុជានេះ បានអាកខានរៀបចំ​២ឆ្នាំ​ជាប់ៗ​គ្នា ដោយសារវិបត្តិកូវីដ១៩។

អ្នកឧកញ្ញា ពុង ឃាវសែ បន្តថា សម្រាប់ជួបជុំរៀបចំសន្និបាត អមដោយមានការតាំងពិព័រណ៍​ឡើងវិញ​នេះ គឺមានក្រុមហ៊ុនចំនួន៧៩ក្រុមហ៊ុន បានរៀបចំស្តង់ប្រមាណ ​១៥០ស្តង់ ដាក់តាំង​បង្ហាញ​ផលិតផល​ជាង២០០០មុខ​ ក្នុងនោះផ្នែកសេវា​កម្ម​មាន​ប្រមាណ​ ៥០ប្រភេទ ដែលមាន​ខ្លះ​ជាផលិតផលក្នុងស្រុក ​ហើយខ្លះក៏មានការនាំចូលមកពីក្រៅប្រទេសរួមមាន៖ ​ចិននិងតំបន់តៃវ៉ាន កូរ៉េ បារាំង ជប៉ុន អាល្លឺម៉ង់ ស៊ុយអ៊ែត ឥណ្ឌា ​និងបណ្តាប្រទេសជាច្រើននៅក្នុងតំបន់អាស៊ាន៕ អត្ថបទ ស៊ុមសុខជា