ភ្នំពេញ៖ បណ្តាអ្នករត់ម៉ូតូ និងម៉ូតូកង់បីឬ តុកតុក ដឹកអ្នកដំណើរនៅក្នុងរាជធានីភ្នំពេញមួយចំនួន ស្ថិតក្នុងបណ្តាញសមាគមអង្គការសង្គមស៊ីវិល បាននាំគ្នាចុះឈ្មោះធ្វើបណ្ណបេឡាជាតិ​សន្តិសុខ​សង្គម ហៅកាត់ប័ណ្ណ ប.ស.ស នៅតាម បណ្តាខ័ណ្ឌនានា​នៅក្នុងរាជធានីភ្នំពេញ ដើម្បីទទួលបានរបបថែទាំសុខភាព ។

បើតាម អ្នករត់ម៉ូតូ និងតុកតុក នៅខ័ណ្ឌមានជ័យ ថ្លែងប្រាប់BTV នៅថ្ងៃទី២ ខែធ្នូនេះ បានថ្លែង​អំណរអរគុណរាជរដ្ឋាភិបាល​ ដែលបានពង្រីកសេវាផ្តល់ ប័ណ្ណប.ស.ស មកដល់បណ្តា​អ្នក​ប្រកប​របរសេដ្ឋកិច្ចក្រៅប្រព័ន្ធ ​ដើម្បីទទួល​បានការព្យាបាលពិនិត្យសុខភាព ​និងព្យាបាលជំងឺ នៅ​តាមមូលដ្ឋានសុខាភិបាល​ដោយមិនគិតថ្លៃ ​ហើយការមកធ្វើប័ណ្ណ ប.ស.ស នេះបានគឺ ដោយសារ សមាគមប្រធាន​បណ្តាញរបស់គេកោះហៅឲ្យធ្វើ។

បើតាមឯកឧត្តម ហេង សុផាន់ណារិទ្ធ អគ្គនាយករង និងជាអ្នកនាំពាក្យបេឡាជាតិ​របប​សន្តិសុខ​សង្គម (ប.ស.ស) ថ្លែងថា ​អ្នករត់ម៉ូតូកង់បី ​និងប្រកបរបររត់​តុកតុក​នានា​ អាចចុះឈ្មោះ ធ្វើប័ណ្ណ ប.ស.ស ​បានលុះត្រា ករណីទី១ អ្នករត់ម៉ូតូកង់បី ​ឬអ្នករត់តុកតុកនោះ ធ្វើការងារនៅក្នុង​សមាគម​អង្គការស៊ីវិល ហើយសមាគមនោះត្រូវបង់វិភាគទានទៅឲ្យ​ប.ស.ស ​ជារៀងរាល់ខែ ​ហើយករណីទី២ អ្នករត់ម៉ូតូកង់បី​ និងតុកតុកនៅក្នុងសមាគមផ្សេងទៀត​ ចូលរួមអនុវត្តគម្រោងសាកល្បងរបស់ ប.ស.ស ​ដែលអនុញ្ញាតឲ្យពួកគាត់បង់វិភាគទានដើម្បីទទួលបាន ប័ណ្ណប.ស.ស ។

ឯកឧត្តម ហេង សុផាន់ណារិទ្ធ បញ្ជាក់ថា ការពិតទៅ ​គម្រោងសាកល្បងឲ្យអ្នក​ប្រកបរបរសេដ្ឋកិច្ច​ក្រៅប្រព័ន្ធជាពិសេសលើអ្នកប្រកបរបបរត់ម៉ូតូកង់បីនោះ ​អាចទទួលបានប័ណ្ណប.ស.សនោះ នឹង​ចាប់ផ្តើមអនុវត្តនៅពាក់កណ្តាលខែធ្នូឆ្នាំ២០២២នេះតទៅ។

បើតាមប្រធានបណ្តាញអ្នករត់ម៉ូតូកង់បី ដែលសុំមិនបង្ហាញបានឲ្យដឹងថា ​គ្រប់អ្នករត់ម៉ូតូ និងតុកតុក បានអបសាទរចំពោះ បេឡាជាតិរបបសន្តិសុខសង្គម(ប.ស.ស)ដែលបាន​បើកការអនុវត្ត​គម្រោង​សាកល្បងផ្តល់ប័ណ្ណប.ស.ស សម្រាប់អ្នកប្រកបរបរសេដ្ឋកិច្ចក្រៅប្រព័ន្ធ ​ខណៈលក្ខខ័ណ្ឌ នៃធ្វើបណ្ណ​ប.ស.ស ​បានកំណត់អ្នកប្រកបរបរសេដ្ឋកិច្ចក្រៅប្រព័ន្ធនានា​ប្រមាណ ១០០០នាក់​សាកល្បង ហើយតម្រូវឲ្យមានការបង់វិភាគទាន៤ដុល្លាអាមេរិកក្នុងមួយខែ៕ អត្ថបទ ស៊ុម សុខជា