កំពង់ឆ្នាំង៖ ក្រោយពីការខិតខំរបស់ប្រជាពលរដ្ឋ អាជ្ញាធរក្រុងខេត្ត និងសង្កាត់ ថ្មីៗនេះ ក្រុង​កំពង់ឆ្នាំង នឹងគ្រងតំណែងជ័យលាភីទីក្រុងស្អាត « ផ្ការំដួល៣ទង » ពីរាជរដ្ឋាភិបាល ។ នេះ​ជា​លើក​ទី១ ហើយ ដែលកាលកន្លងទៅ ក្រុងកំពង់ឆ្នាំងបានត្រឹមតែ ផ្ការំដួល២ទង ២លើក​ជាប់​គ្នា​តែ​ប៉ុណ្ណោះ ។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានថ្លែងនៅព្រឹកថ្ងៃទី០៦ ខែធ្នូ ឆ្នាំ​២០២២​នេះថា ជ័យលាភីនេះ ជាលទ្ធផលនៃការខិតខំប្រឹងប្រែងរបស់អាជ្ញាធរពាក់ព័ន្ធ និងប្រជាពលរដ្ឋ ក្នុង​រយៈពេលពេញ៣ឆ្នាំកន្លងមក ។ យើងមិនត្រូវមានមោទនភាពចំពោះជ័យលាភីនេះ ដោយ​ភ្លេច​បន្ត​ធ្វើការងារនោះឡើយ យើងនឹងមិនទម្លាក់ដៃឡើយ គឺនឹងរក្សាជ័យលាភីខាងលើ និង​បង្កើន​ពិន្ទុ​ឱ្យខ្ពស់ជាងលើកមុនៗទៀត ។ ទៅមុខនេះ ខេត្តមានគោលការណ៍ស្ដារ និង​អភិវឌ្ឍ​ហេដ្ឋា​រចនាសម្ព័ន្ធក្នុងក្រុងមួយចំនួន ដូចជាកែលម្អផ្លូវទាងអស់ក្នុងក្រុងកំពង់ឆ្នាំង អោយ​ទៅ​ជា​ផ្លូវ​កៅស៊ូ​AC និងប៊េតុង ។ ឯកឧត្តមអភិបាលខេត្ត ក៏បានអរគុណដល់ប្រតិបត្តិករណ៍ ទេសចរណ៍ និង​ប្រជាពលរដ្ឋគ្រប់រូប ដែលបានចូលរួមក្នុងការងាររៀបចំក្រុងនាពេលកន្លងមក ដែល​ធ្វើ​ឱ្យ​មាន​លទ្ធផល​ដូចមានថ្ងៃនេះ។

គួរបញ្ជាក់ថា មូលដ្ឋាននៃការវាយតម្លៃទីក្រុងស្អាត ផ្អែកលើសូចនាករចំនួន៧ ចំណុច ។ ទី១ សូច​នាករ គោលនៃការរៀបចំ និងគ្រប់គ្រងបរិស្ថាន, ទី២ សូចនាករនៃភាពស្អាត, ទី៣ សូច​នាករ​នៃ​ការ​គ្រប់គ្រងសំណល់, ទី៤ សូចនាករនៃការបញ្ជ្រាបការយល់ដឹង, ទី៥ សូចនាករនៃតំបន់បៃតង, ទី៦ សូចនាករសុវត្ថិភាពសុខាភិបាល សន្តិសុខ និងសណ្តាប់ធ្នាប់ទីក្រុង, និងទី៧ សូចនាករ នៃ​ហេដ្ឋា​រចនាសម្ព័ន្ធ និងសម្បទាទេសចរណ៍ ។ លំដាប់ ពិន្ទុ សម្រាប់ជ័យលាភី «ផ្ការំដួល ៣ទង» ចន្លោះ​ពី​៥៨ និង៧៧ នៃលក្ខណៈវិនិច្ឆ័យ ៕ អត្ថបទ៖ ហុង វាស្នា