កណ្ដាល ៖នៅថ្ងៃទី៦ ខែធ្នូឆ្នាំ២០២២នេះ គឺជាថ្ងៃទី២ នៃការប្រឡងមធ្យមសិក្សាទុតិយភូមិឆ្នាំសិក្សា២០២២ ។ សម្រាប់ការប្រឡងនេះ មានបេក្ខជន បេក្ខនារីជិត១ម៉ឺននាក់ នៅខេត្តកណ្តាល បានចូលប្រឡងដោយរលូន ក្រោមការកិច្ចសង្កេតការណ៍ និងការតាមឃ្លាំមើលយ៉ាងដិតដល់បំផុត ពីមន្ត្រី និងបុគ្គលិកស្ម័គ្រចិត្តសង្កេតការណ៍នៃអង្គភាពប្រឆាំងអំពើពុករលួយ។
បុគ្គលិកស្ម័គ្រចិត្តសង្កេតការណ៍នៃអង្គភាពប្រឆាំងអំពើពុករលួយនៅមណ្ឌលវិទ្យាល័យ ហ៊ុន សែន តាខ្មៅ ខេត្តកណ្តាល ថ្លែងថា នៅក្នុងដំណើរការប្រឡងនេះ ក្រុមការងារសង្កេតការណ៍ប្រឆាំងអំពើពុករលួយ បានតាមឃ្លាំមើលដំណើរការប្រឡងតាំងពីខ្លោងទ្វារ រហូតដល់បន្ទប់ប្រឡងនៅគ្រប់បន្ទប់ទំាងអស់ សំដៅតាមដានសកម្មភាពបេក្ខជន និងអនុរក្ស ដើម្បីកុំឲ្យភាពមិនប្រក្រតីកើតឡើង ដូចជាការ សូកប៉ាន់យកសំណៅឯកសារចូលក្នុងបន្ទប់ប្រឡង ការលួចចម្លងគ្នា និងពិនិត្យនាឡិកាទំនើបៗដែលមានផ្ទុកឯកសារផ្សេងៗជាដើម។
នៅក្នុងដំណើរការប្រឡងនេះ ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ បានចុះពិនិត្យមើលការប្រឡងនេះនៅតាមបណ្តាខេត្តមួយចំនួន ហើយតាមមណ្ឌលប្រឡងនោះ គឺសុទ្ធតែមានវត្តមានអ្នកសង្កេតការណ៍របស់អង្គភាពប្រឆាំងអំពើពុករលួយមានបែងចែកគ្នាដាក់នៅគ្រប់បន្ទប់ប្រឡងទំាងអស់។
ឯកឧត្តម ឱម យ៉ិនទៀង បានប្រាប់BTVថា កិច្ចការរបស់អង្គភាពប្រឆាំងអំពើពុករលួយ បន្ទាប់ពីដំណាក់កាលទីមួយនៃការប្រឡងវិញ្ញាសាសរសេរនេះទៅ មន្ត្រីនៃអង្គភាព នឹងបន្តតាមសង្កេតការណ៍នៅដំណាក់កាលទី ២ គឺការធ្វើកំណែ ហើយនឹងបន្តទៅដំណាក់កាលទី ៣ ការកែ រហូតដំណាក់កាលទី ៤ គឺការប្រកាសពិន្ទុលទ្ធផលប្រឡង ។
បេក្ខជន បេក្ខនារីប្រឡងនិងអាណាព្យាបាល បាននិយាយថា ការប្រឡងនេះ គឺមានភាពសុក្រិត្យយុត្តិធម៌ គ្មានសូកប៉ាន់អនុរក្សដើម្បីបានឱកាសងាកមើលគ្នា ចម្លងប្រ៊ីយ៉ុង និងសួរគ្នាជាដើម។
របាយការណ៍មន្ទីរអប់រំយុវជន និងកីឡាខេត្តកណ្តាល៖ ទូទាំងខេត្តកណ្តាល មានបេក្ខជន បេក្ខនារីត្រូវប្រឡងបាក់ឌុបឆ្នាំ២០២២នេះ មានចំនួន១ម៉ឺន១៤៣នាក់ ហើយនៅថ្ងៃទី១នៃការប្រឡង មានបេក្ខជន បេក្ខនារីចូលប្រឡង ៩៩៤៩នាក់ ក្នុងនោះស្រី ៥៤៧៤នាក់ និងមានបេក្ខជន បេក្ខនារី អវត្តមានមិនបានចូលប្រឡងចំនួន១៩៤នាក់៕អត្ថបទ ស៊ុម សុខជា